துபாயில் +2 தேர்வு : மாணவர்கள் சாதனை

துபாய்: துபாயில் நடைபெற்ற பிளஸ் 2 தேர்வில் தேர்வெழுதிய 20 மாணவர்களில் 19 பேர் பாஸாகியுள்ளனர். துபாயில் வசித்து வரும் தமிழர்களுக்காக தமிழர்களால் மேல்நிலைப் பள்ளி நடத்தப்பட்டு வருகிறது. இப்பள்ளியில் தற்போது மேல்நிலைப்பள்ளியி்ல் கலைப்பரிவு வகுப்பு மட்டுமே நடத்தப்பட்டு வருகிறது. இதில் 20 மாணவ, மாணவிகள் பயின்று வரு்கின்றனர். தற்போது இப்பள்ளியில் நடந்து முடிந்த தேர்வில், மாணவர் முகம்மது குப்தீன் ஜாபர் அலி 1,116 மார்க்குகளும், மாணவிகள் ரஷிதா 1,059 ஆயிஷா 1,045 பெற்றுள்ளனர். தமிழகத்தில் தேர்வுகள் துவங்கிய நேரத்தில் துபாயில் இந்திய தூதரக கண்காணிப்பாளர் மேற்பார்வையில் தேர்வுகள் நடத்தப்பட்டு, விடைத்தாள்கள் தமிழக தேர்வு துறைக்கு அனுப்பி வைக்கப்படுகிறது.

தோல்வி பயத்தில் தற்கொலை: தேர்வில் மாணவர் 'பாஸ்'

ஆண்டிபட்டி:பிளஸ் 2 தேர்வில், தோல்வி பயத்தில், முடிவு வெளிவருவதற்கு முதல்நாள் இரவே விஷம் குடித்து மாணவர் இறந்தார். முடிவில் அவர் தேர்ச்சி அடைந்திருந்தார். தேனி மாவட்டம், கண்டமனுார் அருகே கணேசபுரத்தைச் சேர்ந்தவர் அன்னக்கொடி. இவரது மகன் அஜய், 17. இவர் ராஜதானி அரசு கள்ளர் மேல்நிலைப்பள்ளியில் பிளஸ் 2 தேர்வு எழுதியிருந்தார். 'தேர்ச்சி பெறமாட்டோம்' என்ற பயத்தில், நேற்று முன்தினம் இரவே விஷம் குடித்தார். மயங்கிய நிலையில் தேனி மருத்துவ கல்லுாரி மருத்துவமனையில் அனுமதித்தனர். அங்கு அவர் இறந்தார். ஆனால், நேற்று வெளியான தேர்வு முடிவில் அவர், 663 மதிப்பெண்கள் பெற்று தேர்ச்சிஅடைந்திருந்தார்.

சேது' பெயரில் ஓடிய அனந்தபுரி எக்ஸ்பிரஸ் : பயணிகள் குழப்பம்

அனந்தபுரி எக்ஸ்பிரஸ் ரயில், 'சேது எக்ஸ்பிரஸ்' என்ற பெயர் பலகையுடன் ஓடியதால், ரயிலுக்காக காத்திருந்த பயணிகள் பெரும் குழப்பத்திற்கு ஆளாகினர்.
சென்னை எழும்பூர் - திருவனந்தபுரம் இடையே, அனந்தபுரி எக்ஸ்பிரஸ் ரயில் இயக்கப்படுகிறது. ராமேஸ்வரத்தில் இருந்து, சென்னை எழும்பூர் வரும் சேது எக்ஸ்பிரஸ் ரயில் தான், மாற்று ரயிலாக தினசரி இரவில், அனந்தபுரி எக்ஸ்பிரஸ் ரயிலாக, எழும்பூரில் இருந்து இயக்கப்படுகிறது.
குழப்பம்
அப்போது, ரயில் முகப்பு பகுதியில் உள்ள, 'சேது எக்ஸ்பிரஸ்' என்ற பெயர் பலகை மாற்றப்பட்டு, 'அனந்தபுரி எக்ஸ்பிரஸ்' என்ற பெயர் பலகை வைப்பர்.
நேற்று முன்தினம் இரவு, 7:35 மணிக்கு, வழக்கம் போல் அனந்தபுரி எக்ஸ்பிரஸ் ரயில் புறப்பட்டது.
இருப்பினும், ரயில் முகப்பு பகுதியில் பெயர் பலகையை மாற்றாமல் விட்டனர்.
இதனால், தாம்பரம், செங்கல்பட்டு, விழுப்புரம் உள்ளிட்ட ரயில் நிலையங்களில், அனந்தபுரி எக்ஸ்பிரஸ்
ரயிலுக்காக காத்திருந்த பயணிகள் குழப்பம் அடைந்தனர்.
அனந்தபுரி எக்ஸ்பிரஸ் ரயில் வந்து விட்டதாக தகவல் தெரிவித்தாலும், நிற்பது சேது
எக்ஸ்பிரஸ் ரயில் தானே என, பலரும் குழப்பமடைந்தனர். ரயில் புறப்படும் நேரத்தில், சிலர் உண்மை புரிந்து அவசர அவசரமாக ரயிலில் ஏறினர்.
இதுகுறித்து, தாம்பரத்தைச் சேர்ந்த பயணி, கீதாலட்சுமி என்பவர் கூறியதாவது:
தாம்பரம் ரயில் நிலையத்திற்குள், 'சேது' என்ற பெயர் பலகையுடன் தான், ரயில் உள்ளே வந்தது; இதனால், குழப்பம் அடைந்தோம். என் உறவினர், இந்த ரயிலில் எழும்பூரில் இருந்து வந்தார்.
விசாரணைஅவர் தந்த தகவலினால் தான், அனந்தபுரி எக்ஸ்பிரஸ் ரயில் என, தெரிய வந்தது; இல்லையென்றால், ரயிலை தவற விட்டிருப்பேன். சில பயணிகள் ரயிலை தவற விட்டிருக்க கூட வாய்ப்பு இருந்திருக்கும்.
இவ்வாறு, அவர் கூறினார்.இதுகுறித்து, எழும்பூர் ரயில் நிலைய அதிகாரி ஒருவர் கூறியதாவது:
பெயர் பலகையை மாற்றும் பணியை, மெக்கானிக்கல் பிரிவு ஊழியர்கள் மேற்கொண்டிருக்க வேண்டும்; இப்பிரச்னையில், என்ன தவறு நடந்தது என்பது குறித்து விசாரிக்கப்படும்; இனி, சிக்கல் வராமல் பார்த்துக் கொள்ளப்படும்.இவ்வாறு, அவர் கூறினார்.

இன்ஜி.,க்கு 'கட்-ஆப்' அதிகரிக்க வாய்ப்பு : மருத்துவத்திற்கு குறைகிறது

பிளஸ் 2 பொதுத்தேர்வில் கணித பாடத்தில் எதிர்பாராத அளவுக்கு 'சென்டம்' எண்ணிக்கை உயர்ந்ததால் இன்ஜி., படிப்புக்கான 'கட் - ஆப்'
அதிகரிக்கும் வாய்ப்பு ஏற்பட்டு உள்ளது. இயற்பியல், வேதியியல் மற்றும்
உயிரியலில், 'சென்டம்' எண்ணிக்கை குறைந்ததால் மருத்துவப் படிப்பு 'கட் - ஆப்' குறையும் என எதிர்பார்க்கப்படுகிறது.கடந்த ஆண்டு கணிதத்தில் 3,882 பேர் 'சென்டம்' எடுத்தனர்; இது இந்த ஆண்டு இரண்டரை மடங்கு அதிகரித்து 9,710 பேர் 'சென்டம்' எடுத்துள்ளனர். ஆனால் இயற்பியல், வேதியியல், உயிரியல் பாடங்களில் 'சென்டம்' எண்ணிக்கை கடுமையாக குறைந்து உள்ளது.
எனவே இந்த ஆண்டு பி.இ., - பி.டெக்., படிப்புகளுக்கான 'கட் - ஆப்' மதிப்பெண்; மருத்துவப் படிப்புக்கு 'கட் - ஆப்' குறையும் என கல்வியாளர்கள் தெரிவித்து உள்ளனர்.இதுகுறித்து கல்வியாளர் ஜெய பிரகாஷ் காந்தி கூறியதாவது:கடந்த பலஆண்டுகளில் இல்லாத அளவுக்கு இந்த ஆண்டு கணிதப் பாடத்தில் 9,710 பேர் 'சென்டம்'
எடுத்துள்ளனர். இதே போல் 198 மதிப்பெண்ணுக்கு மேல் எடுத்தவர்கள் எண்ணிக்கை 15 ஆயிரத்துக்கு மேல் இருக்கும் என்று தெரிகிறது.இதனால் இந்த ஆண்டு இன்ஜி., 'கட் - ஆப்' மதிப்பெண் 0.5 சதவீதம் முதல் 0.75 சதவீதம் வரை உயர வாய்ப்புள்ளது.அதனால் கடந்த ஆண்டு 'கட் - ஆப்' மதிப்பெண்ணை விட அதிகம் இருந்தால் மட்டுமே கடந்த ஆண்டு பட்டியலில் உள்ள இன்ஜி., கல்லூரிகளில் சேர முடியும்.இதேபோல் உயிரியல், இயற்பியல், விலங்கியல் போன்றவற்றில் 'சென்டம்' எண்ணிக்கை பெரிய அளவில்
குறைந்துள்ளதால் மருத்துவப் படிப்பு 'கட் - ஆப்' மதிப்பெண் 0.5 சதவீதம் குறைய வாய்ப்புள்ளது.உதாரணமாக கடந்த ஆண்டு 198.25 என்றால் இந்த ஆண்டு 197.75 என்று மாறலாம். ஆனால் கடந்த ஆண்டு அதிக மதிப்பெண் பெற்று 'கட் - ஆப்' வைத்திருப்போர் 800 பேர் வரை உள்ளனர்.இவர்கள் எந்த அளவுக்கு மருத்துவக் கல்லூரிகளுக்கு போட்டி போடுகின்றனர் என்பதை வைத்தே இந்த ஆண்டு மாணவர்களுக்கு 'சீட்' கிடைக்கும்.இந்த ஆண்டு இன்னொரு முக்கிய பாடமாக இயற்பியல் வந்துள்ளது. இதில் கடந்த ஆண்டை விட பெரிய அளவில் 'சென்டம்' எண்ணிக்கை குறைந்துள்ளது. அதனால் இந்த ஆண்டு இயற்பியல் - கணிதம், இயற்பியல் - உயிரியல் பாடங்களில் அதிக மதிப்பெண் பெறுவோருக்கு முக்கியத்துவம் கிடைக்கும். எனவே இந்த ஆண்டு இயற்பியல் மதிப்பெண் தீர்மானிக்கும் காரணியாக இருக்கும், என்றார்.- நமது நிருபர் -

சென்னைவாசிகளுக்கு மகிழ்ச்சியான செய்தி: ஜூலை வரை குடிநீர் பஞ்சம் இல்லை

கடலூர் மாவட்டத்தில் உள்ள வீராணம் ஏரி நிரம்பிவிட்டதால், சென்னை நகர மக்களுக்கு ஜூலை மாதம் வரை தடையின்றி குடிநீர் விநியோகிக்கப்படும் என சென்னை குடிநீர் வாரியம் தெரிவித்தது.

இது குறித்து சென்னை குடிநீர் வாரியம் புதன்கிழமை வெளியிட்ட செய்தி:

சென்னை மாநகரின் குடிநீர் ஆதாரத்தைப் பெருக்கும் நோக்கத்துடன் புதிய வீராணம் திட்டம் அரசு நிதியுதவியுடன் கடந்த 2004-ஆம் ஆண்டு நிறைவேற்றப்பட்டது. இதன் மூலம் கடந்த ஆண்டு அக்டோபர் 13-ஆம் தேதி முதல் சென்னை நகர மக்களுக்கு தடையின்றி குடிநீர் விநியோகம் நடைபெற்று வருகிறது.

வீராணம் ஏரியின் கொள்ளளவு கடந்த மாதம் 24-ஆம் தேதி 556 மில்லியன் கன அடியாக இருந்தது. இதைத் தொடர்ந்து சென்னை மக்களின் குடிநீர்த் தேவைக்காக கடந்த ஏப்ரல் 25-ஆம் தேதி மேட்டூர் அணையிலிருந்து 6,000 கன அடி வீதம் வீராணம் ஏரிக்கு தண்ணீர் திறந்து விடப்பட்டது.

அந்தத் தண்ணீர் காவிரி ஆற்றின் வழியாக மேலணை, கல்லணை அணைக் கரைக்கு 27-ஆம் தேதி வந்தடைந்தது. அன்றைய தினம் அணைக் கரையிலிருந்து வடவாறு வழியாக வீராணம் ஏரிக்கு தண்ணீர் திறக்கப்பட்டது.

இதன் மூலம் 1,465 மில்லியன் கன அடி முழு கொள்ளளவு கொண்ட வீராணம் ஏரி வியாழக்கிழமை அன்று முழுவதும் நிரம்பியது.

இதைத் தொடர்ந்து சென்னை நகருக்கு வரும் ஜூலை மாதம் வரை தினமும் 180 மில்லியன் லிட்டர் குடிநீர் தடையின்றி விநியோகிக்கப்படும் என அதில் கூறப்பட்டுள்ளது.

மனித உருவில் மிருகங்கள் By மணவை எஸ்.கார்த்திக்

தற்போது நாளேடுகள் உள்பட எந்த ஊடகங்களை எடுத்தாலும், அதில் நாள்தோறும் தவறாமல் இடம் பெறும் செய்தியாகி விட்டது பாலியல் வன்கொடுமை.
ஆரம்பக் காலகட்டங்களில், அங்கொன்றும் இங்கொன்றுமாக நிகழ்ந்து வந்த பாலியல் வன்கொடுமைகள், இன்று ஜாதி, மத பேதமோ, மேல்தட்டு, அடித்தட்டு மக்கள் என்ற பாகுபாடோ, படித்தவர், பாமரர் என்ற வேறுபாடோ இன்றி அனைத்துத் தரப்பினரையும் ஆட்டி வைக்கிறது. இது நீதித் துறையையும்கூட விட்டு வைக்கவில்லை.
இது ஒருபுறம் இருக்க, அது என்னவென்றே அறியாத சிறுமிகளை பாலியல் வன்கொடுமை செய்யும் அளவுக்கு மனிதன் மிருகமாக மாறி விட்டதுதான் வேதனைக்குரிய விஷயமாகும்.
கடந்த சில மாதங்களுக்கு முன்பு பெங்களூரில் 1-ஆம் வகுப்பு படிக்கும் பெண் குழந்தையை பாலியல் வன்கொடுமைக்கு ஆளாக்கியுள்ளனர் சில மனித மிருகங்கள். அதே பெங்களூரில் மற்றொரு பள்ளியில் 8 வயதுச் சிறுமியை பாலியல் வன்முறைக்கு ஆளாக்கியுள்ளார் அதே பள்ளியில் பணிபுரியும் வெறிபிடித்த ஆசிரியர்.
இதுபோன்ற பாலியல் வன்முறைகளை அடுக்கிக் கொண்டே போகலாம். எனினும், அவற்றில் பெரும்பாலானவை கெüரவத்துக்காகவோ, பணத்துக்காகவோ மூடி மறைக்கப்பட்டு விடுகின்றன. நிர்பயா போன்ற ஒருசில சம்பவங்களே வெளி உலகுக்குத் தெரியவருகின்றன.
2012 டிசம்பரில் நள்ளிரவு நேரம் தலைநகர் தில்லியில் தனது ஆண் நண்பருடன் பேருந்தில் பயணம் செய்த மருத்துவக் கல்லூரி மாணவி நிர்பயா, அப்பேருந்தின் நடத்துநர், ஓட்டுநர் மற்றும் அவர்களது நண்பர்களால் மிருகத்தனமாக பாலியல் பலாத்காரம் செய்யப்பட்ட சம்பவத்தை அவ்வளவு எளிதில் யாரும் மறக்க
முடியாது.
நாடு முழுவதும் பெரும் தாக்கத்தையும், கொந்தளிப்பையும் ஏற்படுத்தியது இச்சம்பவம். இதுபோன்ற சம்பவங்கள் நிகழும்போது மட்டும் விழித்துக் கொள்ளும் நமது அரசுகள், அடுத்த சில மாதங்களிலேயே அதை மறந்து விடுகின்றன (அடுத்த சம்பவம் நிகழும் வரை).
இதனால்தான் அன்று நிர்பயாவுக்கு நிகழ்ந்த அதே கொடுமை இன்று 13 வயதுச் சிறுமிக்கு நேரிட்டுள்ளது. பஞ்சாப் மாநிலம் மோகாவில் பேருந்தில் பயணித்த தாயும், 13 வயதே ஆன அவரது மகளும் அந்தப் பேருந்தின் நடத்துநர், மேலும் இருவரால் பாலியல் வன்கொடுமைக்கு ஆளாக்கப்பட்டு பேருந்திலிருந்து கீழே தள்ளிவிடப்பட்டுள்ளனர். இதில் அந்தச் சிறுமி உயிரிழந்தது அதைவிடக் கொடுமை.
பாலியல் வன்கொடுமைச் சம்பவங்கள் நாளுக்குநாள் அதிகரித்து வருகின்றன. இதை மெய்ப்பிக்கும் வகையில் உள்ளது ஐ.நா. சபையின் ஆய்வுத் தகவல்.
கடந்த மக்களவைக் கூட்டத் தொடரின்போது கேள்வி ஒன்றுக்கு பதிலளித்த மத்திய உள்துறை இணை அமைச்சர் கிரண் ரிஜிஜு, 2010-ஆம் ஆண்டு ஐ.நா. சபையின் குற்றப் போக்குகள் ஆய்வுத் தகவலின்படி, உலக அளவில் கொலைக் குற்றங்களில் இந்தியா 2-ஆவது இடத்திலும், பாலியல் வன்கொடுமை வழக்குகளில் 3-ஆவது இடத்திலும் உள்ளதாகத் தெரிவித்தார்.
மேலும், நாடு முழுவதும் கடந்த 3 ஆண்டுகளில் குழந்தைகளுக்கு எதிரான பாலியல் வழக்குகள் 1.29 லட்சமும், பெண்களுக்கு எதிரான பாலியல் வழக்குகள் 88 ஆயிரமும் பதிவு செய்யப்பட்டுள்ளதாகவும் அமைச்சர் குறிப்பிட்டார்.
இதுபோன்ற சம்பவங்களுக்குக் காரணம் கல்வியறிவின்மை, கலாசாரச் சீரழிவு, செல்லிடப்பேசி, மது என்று பல்வேறு விதமான காரணங்களைக் கூறிவரும் நிலையில், உண்மையிலேயே இதுபோன்ற பாலியல் வன்முறைகளுக்குக் காரணம் என்ன? சற்றே சிந்தித்துப் பார்த்தோமேயானால் ஓர் உண்மை நமக்குப் புலப்படும்.
அதாவது, நமது நாட்டில் சட்டமோ, தண்டனைகளோ கடுமையாக இல்லை என்பதுதான் அது. இதுபோன்ற பாலியல் வன்கொடுமையில் சிக்கும் நபர்கள் நமது நாட்டின் சட்டத்தில் உள்ள ஓட்டைகளைப் பயன்படுத்தி எவ்வித தண்டனையும் இன்றி வெளியில் வந்து விடுகின்றனர். பிறகு எப்படி குற்றவாளிகள் திருந்துவதற்கு சந்தர்ப்பம் கிடைக்கும்?
அரபு நாடுகளில் திருட்டுக்குத் தண்டனையாக கையை வெட்டுகிறார்கள். இதுபோன்ற தவறுகளுக்குத் தலையை வெட்டுகிறார்கள்.
ஆனால், நமது நாட்டிலோ பயங்கரவாதிகளுக்கு விதிக்கப்படும் மரண தண்டனை போன்ற கடுமையான தண்டனைகளையும் நீக்கிக் கொண்டல்லவா இருக்கிறோம். நாம் தண்டனைகளைக் குறைக்கிறோம், குற்றங்கள் அதிகரிக்கின்றன.
அரபு நாடுகளில் சட்டமும், தண்டனைகளும் கடுமையாக இருப்பதால் குற்றங்களும் குறைகின்றன.
கழுத்து முழுவதும் நகைகளுடன், நடுநிசி வேளையில் தனியாக, தைரியமாக எப்போது ஒரு பெண் நடந்து செல்கிறாளோ அப்போதுதான் இந்தியாவுக்கு உண்மையான சுதந்திரம் கிடைத்ததாக பொருள் என்றார் மகாத்மா காந்தி.
ஆனால், இன்றோ நிலைமை தலைகீழாக அல்லவா இருக்கிறது. நகையே அணியாமல் கணவர் துணையுடன் செல்லும்போதுகூட பெண்களால் தைரியமாக நடமாட முடியவில்லையே... திருட்டு பயமா? அப்படி இருந்தால்கூடப் பரவாயில்லையே, தனது கற்பைக் காப்பாற்றிக் கொள்வதற்காக அல்லவா இந்தப் போராட்டம்.
நமது நாட்டில் நிகழ்ந்து வரும் பாலியல் வன்கொடுமைகளைத் தடுக்க இரண்டே வழிகள்தான் உள்ளன. ஒன்று, பெண்களுக்கு எதிரான வன்முறைகளில் ஈடுபடுவோர் மீதான நடவடிக்கைகள், அரபு நாடுகளில் எடுக்கப்படும் நடவடிக்கைபோல் கடுமையாக்கப்பட வேண்டும்.
அல்லது சமீபத்தில் வட மாநிலம் ஒன்றில் சிறுமியை பாலியல் பலாத்காரம் செய்த நபர்களை, அந்தக் கிராம மக்களே பிடித்து கட்டிவைத்து நையப்புடைத்ததுபோல், சட்டத்தை மக்களே தங்களது கையில் எடுத்துக் கொள்ள வேண்டும்.
இதில், ஏதேனும் ஒன்று நிகழ்ந்தால் மட்டுமே காந்தியடிகள் கண்ட கனவு தேசமாக இந்தியா மாறும்.

+2 தேர்வு: முன்னாள் ஸ்டேட் டாப்பர்கள், இப்போது என்ன செய்கிறார்கள்?

+2வில் எடுக்கும் மதிப்பெண்கள்தான் பலருக்கும் வாழ்க்கையில் முன்னேறுவதற்கான அடித்தளமாக உள்ளது. +2வில் ஸ்டேட் டாப்பர்களாக வந்த மாணவர்கள், இப்போது என்ன செய்துகொண்டிருக்கிறார்கள்? வாழ்க்கையில் எவ்வளவு தூரம் உயர்ந்திருக்கிறார்கள்?

சென்ற வருடம், ஒரு வார இதழுக்காக ஸ்டேட் டாப்பர்கள் சிலரைப் பேட்டி கண்டேன். அதன் முழு வடிவம் இது.

ஐஸ்வர்யா மீனாட்சி:

(2002-ம் வருடம் 1188 மதிப்பெண்கள் எடுத்து மாநிலத்தில் முதலிடம்)

பத்தாவதில், மூன்று மதிப்பெண்கள் குறைவாகப் போனதால் என்னால் ஸ்டேட் ஃபர்ஸ்ட் எடுக்கமுடியவில்லை. +2வில், டிஏவி பள்ளிக்கு மாறினேன். இந்த மாற்றம் நல்ல பலனை அளித்தது. ஸ்டேட் ஃபர்ஸ்ட் என்கிற இலக்கை அடைந்தேன்.

பிட்ஸ் பிலானியில் சீட் கிடைத்தது. ஆனால், மேற்படிப்புக்கு யு.எஸ் போவதாகத் திட்டம் இருந்ததால் பெற்றோருடன் இருக்கவேண்டும் என்பதற்காக வெங்கடேஸ்வராவில் பி.இ. பண்ணினேன். பல்கலைக்கழக அளவில், ஐந்தாம் இடம் கிடைத்தது. அதன்பிறகு, அமெரிக்காவின் மின்னசோட்டா பல்கலைக்கழகத்தில் அமெரிக்க அரசின் ஸ்காலர்ஷிப் உதவியுடன் எம்.எஸ். முடித்தேன். அங்கேயே பகுதிநேரமாக வேலை செய்யவும் வாய்ப்பு கிடைத்தது.

நான் படிக்கும் காலத்தில் எனக்காக அமெரிக்க அரசு 20,000 டாலர் செலவழித்திருக்கும். கூடவே வேலை செய்ததற்காக சம்பளமும் கிடைத்தது (ஒரு வாரத்துக்கு குறைந்தது 20 மணி நேரம் வேலை.) நடுவில் மூன்று மாதம், ஐபிஎம்-மில் இண்டர்ன்ஷிப்பும் கிடைத்தது. ஐபிஎம்-மில் என்னை ஒரு மாணவர்போல நடத்தவில்லை. ஐபிஎம்-மில் வேலை செய்கிறவருக்குண்டான பொறுப்பு எனக்கு அளிக்கப்பட்டது. இந்த நல்ல அனுபவத்துடன் படிப்பை முடித்தபிறகு, தாம்சன் ராய்ட்டரில் வேலை கிடைத்தது. 2009ல், பாரிஸில் நடந்த சர்வதேச கணினி மாநாட்டில் நூற்றுக்கணக்கான ஆராய்ச்சிக் கட்டுரைகளிருந்து தேர்வான இருபது கட்டுரைகளில் என்னுடையதும் ஒன்று. பிறகு, தொழில்நுட்ப ரீதியாக வேலை செய்யவேண்டும் என்பதற்காக மைக்ரோசாஃப்டில் விண்ணப்பித்தேன். +2வில் மாநில அளவில் முதலில் வந்தால் எந்த வேலைக்கு விண்ணப்பித்தாலும் அது தனிக்கவனத்தை ஏற்படுத்தும். மைக்ரோசாஃப்டில் தேர்வாகி, 2010லிருந்து அங்கு பணிபுரிகிறேன். இப்போது, சாஃப்ட்வேர் டெவலப்மெண்ட் என்ஜினியர் - லெவல் 3 என்கிற நிலையில் இருக்கிறேன்.

+2வில் முதலிடம் வந்ததால் கிடைத்த ஸ்காலர்ஷிப் தொகையே எப்படியும் ரூ. 75,000 வரை இருக்கும். கூடவே 9 விருதுகளும் கிடைத்தன. ஒரு ஐஐடி மாணவர் அளவுக்கு நான் புத்திசாலி இல்லை. ஆனால், கடுமையான உழைப்பினால் எந்த வேலையையும் சிறப்பாக செய்யமுடியும். +2வில் பல லட்சம் மாணவர்களுடன் மோதி, முதலிடத்தைப் பிடித்ததால் அது தந்த தன்னம்பிக்கைக்கு ஈடே கிடையாது.

வித்யா சாகர்:

(2000-ம் வருடம் 1181 மதிப்பெண்கள் எடுத்து மாநிலத்தில் முதலிடம்)

டிஏவியில் படித்தேன். ஸ்டேட் ஃபர்ஸ்ட் வருவேன் என்று எதிர்பார்க்கவில்லை. நிறைய மதிப்பெண்கள் எடுக்கவேண்டும் என்கிற குறிக்கோள்தான் இருந்தது. +2வில் மாநில அளவில் முதலிடம் வந்தது, என் அப்பாவுக்கு ஆச்சரியத்தைக் கொடுத்தது. தேர்வு முடிவுகளைக் கேள்விப்பட்டு பள்ளிக்குச் சென்றபோது, வாசலிலேயே 100 பேருக்கு மேல் வாழ்த்தி வரவேற்றதை மறக்கவேமுடியாது. ஸ்டேட் ஃபர்ஸ்ட் வந்ததால் நிறைய ஸ்காலர்ஷிப்களும் பல தொடர்புகளும் கிடைத்தன.

பிட்ஸ் பிலானியில் பி.இ. முடித்து, சென்னையிலுள்ள அமெரிக்கன் மெகாடிரெண்ட்ஸ் என்கிற அமெரிக்க நிறுவனத்தில் ஒரு வருடம் வேலை பார்த்தேன். 2005ல், சிங்கப்பூரில், நேஷனல் யுனிவர்சிட்டி ஆஃப் சிங்கப்பூரில் எம்.எஸ் (கம்ப்யூட்டர் சயின்ஸ்) படித்தேன். அதே பல்கலைக்கழகத்தின் ஆராய்ச்சிப் பிரிவில் பகுதி நேரமாக வேலை செய்தேன். 2007 முதல் அங்கேயே காண்டினெண்டல் என்கிற ஜெர்மன் நிறுவனத்தில் 2013 வரை பணிபுரிந்தேன். சீனியர் சாஃப்ட்வேர் என்ஜினியர் பதவி வரை வேலை பார்த்தாலும் அடுத்ததாக மேனேஜ்மெண்ட் பிரிவில் நுழைய ஆர்வம் ஏற்பட்டது.

வேலை செய்துகொண்டிருக்கும்போது எம்.பி.ஏ படிக்க ஆரம்பித்தேன். படிப்பு, வேலை என இரண்டையும் சமாளிப்பது ஒருகட்டத்தில் சவாலாக இருந்தது. படிப்புக்கு அதிக நேரம் ஒதுக்குவதற்காக என் வேலையை ராஜினாமா செய்தேன். எம்.பி.ஏ முடித்தபிறகு, 2014ல் சிங்கப்பூரில் உள்ள எமர்சன் பிராசஸ் மேனேஜ்மெண்ட் என்கிற அமெரிக்க நிறுவனத்தில் என் விருப்பத்துக்கேற்ற மார்க்கெட்டிங் மேனேஜர் வேலை கிடைத்திருக்கிறது. என்ஜினியரிங் பேக்ரவுண்ட் உள்ள நிறுவனம் என்பதால் எனக்கு மிகவும் பொருத்தமாக அமைந்துவிட்டது.

கல்லூரி பாரதி:

(2003-ம் வருடம் 1188 மதிப்பெண்கள் எடுத்து மாநிலத்தில் முதலிடம்)

மாநிலத்தில் முதலாவதாக வரவேண்டும் என்று நினைத்துதான் படித்தேன். 10வதில் ஆரம்பித்து அடுத்த மூன்று வருடங்களுக்கு சென்னையைத் தாண்டி எங்குமே போகவில்லை. ஒரே படிப்பு மயமாகத்தான் இருந்தேன். டிவி, பாட்டு வகுப்புகள் என என் விருப்பங்களை சிலகாலம் ஒதுக்கிவைத்தேன். +2வில் நினைத்ததைச் சாதித்தவுடன், பிட்ஸ் பிலானியில் கம்ப்யூட்டர் சயின்ஸ் படித்தேன். பிறகு, ஹைதராபாத்தில் உள்ள மைக்ரோசாஃப்ட் இந்தியா நிறுவனத்தில் இரண்டு வருடங்கள் வேலை செய்தேன்.

திருமணத்துக்குப் பிறகு புனேவில் ஒருவருடம் வேலை பார்த்துவிட்டு, 2011ல், எம்.எஸ் படிக்க அமெரிக்கா சென்றேன். பி.இ. முடித்தபிறகு எம்.எஸ் படிக்காததற்குக் காரணம், வேலை அனுபவம் வேண்டும் என்று நினைத்தேன். சம்பாதித்தால்தான் மேற்படிப்புக்காகப் பணம் சேமித்து, அப்பாவைத் தொந்தரவு பண்ணாமல் இருக்கமுடியும் என்று எண்ணினேன். நான், என் கணவர் இருவருமே எம்.எஸ் படிப்பை அமெரிக்காவில் முடித்தோம். பிறகு, இருவருக்கும் அங்கேயே மைக்ரோசாஃப்ட் நிறுவனத்தில் வேலை கிடைத்தது.

+2வில் முதலிடம் வந்ததால் நிறைய பலன்கள். பிலானியில் 30,000 ரூபாய்க்கு ஸ்காலர்ஷிப் கிடைத்தது. பிலானியில் முதல் நாளன்று நடந்த ஒரு நிகழ்ச்சியில், எல்லா மாநில ஸ்டேட் டாப்பர்களுக்கும் துணை வேந்தர் தனியாக மரியாதை அளித்தார். தமிழ்நாட்டிலிருந்து பிலானியில் சேர்ந்தவர்களுக்கு என்னை நன்றாகத் தெரிந்திருந்தது.

வேலைக்கு விண்ணப்பிக்கும்போது, ஸ்டேட் டாப்பர் என்பதற்கு ஒரு தனி மதிப்பு இருக்கத்தான் செய்தது. +2வில் முதலிடம் பெற்று சாதனை செய்ததால் மற்ற வேலைகளிலும் நீ பொறுப்பாக இருப்பாய் என்று நம்பினோம், உன்மீது அதிக எதிர்பார்ப்பு இருந்தது என்று என்னை நேர்காணல் செய்தவர்கள் பிறகு கூறினார்கள். அதேசமயம் ஸ்டேட் டாப்பர் என்பதன் மதிப்பு, பெருமையெல்லாம் நாள் போகப்போக குறையத்தான் செய்யும். அதன்பிறகு வேலையில் நீங்கள் காட்டும் ஈடுபாடு, பங்களிப்புதான் உரிய பலனைக் கொடுக்கும்.

ஸ்டேட் டாப்பர் ஆனதால் +2 தேர்வை எதிர்கொள்பவர்களுக்கு என்னால் அறிவுரை சொல்லமுடிந்தது. முதலிடம் வந்ததால் கடவுள் மீதும் அதிக நம்பிக்கை வந்தது. என்னைப் போலவே பல லட்சம் பேர் +2வில் உழைத்துப் படித்தார்கள். ஆனால், நான் மட்டும் முதலிடம் வந்ததற்கு கடவுளின் கருணையும் ஒரு காரணம் என்று எண்ணுகிறேன்.

சுஜனா :

(2005-ம் வருடம் மாநிலத்தில் முதலிடம். +2 தேர்வில், முதல்முறையாக 1190 மதிப்பெண்கள் எடுத்தவர்)

+2 வில் ஸ்டேட் டாப்பர் ஆனபிறகு அண்ணா பல்கலைக் கழகத்தில் மெக்கானிக்கல் கிடைத்தது. எனக்கு இயற்பியல், கணிதத்தில் ஆர்வம் அதிகம். அதற்கு மெக்கானிக்கல்தான் சரிவரும் என்று நினைத்தேன். பிறகு, அமெரிக்காவில் எம்.எஸ் படித்தேன். இப்போது இந்தியாவில் ஒரு நிறுவனத்தில் மெக்கானிக்கல் என்ஜினியராகப் பணியாற்றுகிறேன்.

ஸ்டேட் டாப்பராக வந்ததால் என்னுடைய அணுகுமுறை மாறிப்போனது. எதையும் கேள்வி கேட்டுப் பழகவேண்டும், புரிதலுடன் ஒரு வேலையைச் செய்யவேண்டும் என்கிற மனப்பான்மை உருவானது. +2 முடிவுகள் வந்த தினத்தை மறக்கமுடியாது. பாராட்டுகள், மீடியா பேட்டிகள் என பரபரப்பாக இருந்தேன். மீடியாவில் வந்ததால் வெளியே சிலர் என்னை அடையாளம் தெரிந்துகொண்டார்கள். அந்தப் புகழெல்லாம் சில நாள்கள்தான். அதன்பிறகும் அதே பெருமையை வைத்து எல்லா இடங்களிலும் சலுகை கிடைக்காது.

இப்போது எல்லோரும் என்ஜினியரிங்தான் படிக்கிறார்கள். நமக்கு என்ன விருப்பம் என்று கண்டுபிடித்து அதில் ஈடுபாடு காட்டவேண்டும். எல்லாவற்றுக்கும் ஒரே நேரத்தில் முயற்சி செய்வதற்குப் பதிலாக, எது உங்கள் விருப்பம், எதற்கு முன்னுரிமை அளிக்கவேண்டும் என்பதில் தெளிவாக இருந்து உங்கள் முயற்சிகளை ஓர் இலக்கு நோக்கி நகர்த்தவேண்டும். உதாரணமாக, +2 சமயத்தில், ஐஐடி அல்லது அரசுத் தேர்வு போன்றவற்றில் எதற்கு முன்னுரிமை அளிக்கவேண்டும் என்பதில் சரியாக முடிவெடுக்கவேண்டும்.