தொழில்நுட்ப கோளாறு சேலம் விமான சேவை ரத்து

Added : ஜன 23, 2020 22:59

ஓமலுார், மூன்றாவது நாளாக விமான சேவை ரத்தானதால் பயணிகள் ஏமாற்றமடைந்தனர்.சேலம் விமான நிலையத்தில் மத்திய அரசின் உடான் திட்டத்தின் கீழ் சேலம்-சென்னை சென்னை-சேலம் பயணிகள் விமான சேவையை ட்ரூ ஜெட் நிறுவனம் இயக்கி வருகிறது. தமிழக முதல்வர் உட்பட அமைச்சர்கள் உயர் அதிகாரிகள் பலர் அதிகமாக விமானத்தில் பயணிக்கின்றனர். கடந்த 21ல் சென்னையில் தொழில்நுட்ப கோளாறால் விமான சேவை ரத்தானது.இதனால் சேலத்தில் பதிவு செய்யப்பட்ட பயணிகளுக்கு மாற்று ஏற்பாடு செய்யப்பட்டது. கோளாறு சரியாகாததால் நேற்று மூன்றாவது நாளாக விமான சேவை ரத்தானது. விமானத்தின் உதிரி பாகம் வெளிநாடுகளிலிருந்து வரப்பெற்று சரி செய்யும் பணி நடப்பதாக அதிகாரிகள் தெரிவிக்கின்றனர். தொடர்ந்து விமான சேவை பாதிக்கப்படுவதால் பயணிகள் மத்தியில் ஏமாற்றத்தை ஏற்படுத்துகிறது.வரும் 26ல் குடியரசு தினம் என்பதால் பாதுகாப்பு காரணமாக சேலம் விமான நிலையத்தில் பார்வையாளர்கள் அனுமதி ஜன.30 வரை ரத்து செய்யப்பட்டுள்ளது. விமான சேவையும் ரத்தானதால் விமான நிலையம் வெறிச்சோடிக்கிடக்கிறது.