வெளிநாட்டு வேலை : ஏமாந்தவர்கள் புகார்

Added : மே 02, 2018 00:16

திருச்சி: வெளிநாட்டு வேலை ஆசையில் ஏமாந்த, 32 பேர், போலீஸ் கமிஷனரிடம் புகார் செய்தனர்.தஞ்சை மாவட்டம், கும்பகோணத்தில், எம்.ஜி., எண்டர்பிரைசஸ் என்ற நிறுவனத்தை நடத்தி வருபவர்கள், முகமது சுல்தான்; முகமது கனி. இவர்கள், தாய்லாந்து நாட்டுக்கு வேலைக்கு அனுப்புவதாக விளம்பரம் செய்திருந்தனர்.இதை பார்த்து, கும்பகோணம் உள்ளிட்ட பகுதிகளைச் சேர்ந்தவர்கள், டிரைவர், கார்பென்டர் வேலைக்கு செல்ல, ஒப்பந்தம் போட்டுள்ளனர். இதற்காக, ஒரு லட்சம் முதல், 1.50 லட்சம் ரூபாய் வரை செலுத்தி உள்ளனர்.அதில், 32 பேரை, நேற்று, தாய்லாந்துக்கு அனுப்பி வைப்பதாக, திருச்சி விமான நிலையத்துக்கு வரவழைத்துள்ளனர். திருச்சியில் இருந்து, காலை, 10:40 மணிக்கு பாங்காக் செல்வதற்காக, நேற்று அதிகாலையிலேயே டிக்கெட் மற்றும் பாஸ்போர்ட்டுடன் விமான நிலையத்துக்கு வந்தனர்.ஆனால், தனியார் நிறுவனத்தினர் யாரும் வரவில்லை. தாங்கள் ஏமாற்றப்பட்டதை உணர்ந்த, 32 பேரும், விமான நிலைய சுங்கத்துறை அதிகாரிகளிடம் விபரத்தை கூறியுள்ளனர்.'விசா இல்லாமல் தாய்லாந்து செல்ல முடியாது' என, அதிகாரிகள் தெரிவித்துள்ளனர்.இதனால், அதிர்ச்சியடைந்தவர்கள் நேற்று காலை, திருச்சி போலீஸ் ஐ.ஜி., மற்றும் கமிஷனர் அலுவலகத்திற்கு சென்றனர்.'வெளிநாட்டுக்கு வேலைக்கு அனுப்புவதாக கூறி, லட்சக்கணக்கில் பணம் வாங்கி மோசடி செய்தவர்கள் மீது, நடவடிக்கை எடுக்க வேண்டும்' என, புகார் கொடுத்தனர்.