காலை நடை அனுபவங்கள்

By வாதூலன்  |   Published on : 30th April 2018 02:07 AM

பதினைந்து ஆண்டுகளுக்கு முன் பணியிலிருந்து ஓய்வு பெற்ற பிறகு, சென்னைக்கு மீண்டும் குடியேறிய சமயம், அதிகாலை வேளையில் கடற்கரை காவல் நிலையம் வரை நடை பயில்வதை வழக்கமாகக் கொண்டிருந்தேன். பல தரப்பட்ட மனிதர்களை சந்திக்க சந்தர்ப்பம் கிடைக்கும். அந்தக் கால தமிழ் இலக்கியத்தைப் பற்றிக் கொண்டாடும் தமிழ்ப் புலவர். அரை டிராயருடன் வடமொழித் தோத்திரங்களைப் பொருள் விளக்கி விஸ்தரிக்கும் கம்பெனி நிர்வாகி. வேல் மாறலுக்குப் பாட அழைப்பு விடுக்கும் முருக பக்தர். சைக்கிளில் முட்டுக் கொடுத்து, கீழே இறங்காமலேயே உள்ளூர்ச் செய்திகளை விவரமாகக் கூறும் பிரமுகர்... இப்படிப் பலர். பேச்சு முற்றும் முழுக்க அன்றைய அரசியல் ஆளுமைகளைப் பற்றித்தான் என்று சொல்ல வேண்டியதில்லை.
 ஒரு சில எம்.ஸிடி. பள்ளித் தோழர்களைப் பார்ப்பதுண்டு. வங்கியில் உடன் பணியாற்றிய அதிகாரிகளையும் கூட தற்செயலாகப் பார்த்ததுண்டு. ஆனால் அவர்கள் உரையாடலில் கலந்து கொள்ள மாட்டார்கள். அவர்கள் ரசனையே வேறு!
 கிட்டத்தட்ட முக்கால் மணி நேரத்துக்கு மேல் நடையுடன் பேச்சையும் முடித்துவிட்டுத் திரும்பும்போது பேருந்துக்காக காத்து நிற்கும் இளைஞர்கள் கண்ணில் படுவார்கள். அனைவர் கையிலும் ஆங்கில நாவல், அல்லது ஏதாவதோர் அரசியல் ஏடு!
 இன்று எல்லாமே மாறிப் போய்விட்டது. கடற்கரைக்குப் போகும் வழியில் அடுக்குமாடிக் குடியிருப்புகளும் கடைகளும் பெருகிவிட்டன. கடந்து செல்லும் காலத்தின் கனம் பழைய நண்பர்களை அமுக்கிவிட்டது. யாருக்கும் முன்போல தாழ்வான படித்தளங்களில் அமர்ந்து பேசத் தெம்பில்லை. இன்றைக்குப் பேருந்துக்காக காத்திருக்கும் இளைஞர்கள் எல்லார் கையிலும் நவீன செல்லிடப்பேசிகள்! பேருந்து வரும் வரையில் - அது கல்லூரிப் பேருந்தானாலும் அவர்கள் பணியாற்றும் அலுவலகப் பேருந்தானாலும் - செல்லிடப்பேசியிலேயே நோட்டம் விட்டுக் கொண்டிருக்கிறார்கள்.
 அன்றிலிருந்து இன்று வரை என் வயதொத்த சில மனிதர்களிடம் மாறாமல் காணப்படும் ஓர் இயல்பு - ஓயாமல் பழைய காலங்களை அசை போடுவது!
 "அதெல்லாம் பொற்காலம் சார்! இப்போது எல்லாம் கெட்டு குட்டிச்சுவராகிவிட்டது' என்று புலம்புவார்கள். அதே சூட்டோடு சூடாக, அயல்நாட்டில் வசிக்கும் தங்கள் பேரக்குழந்தைகளுடன் ஸ்கைப் போன்ற இணையவழியாக உரையாடுவதையும் பெருமையடித்துக் கொள்வார்கள்.
 "பொற்காலத்தில் ஏன் இத்தகைய நவீன வசதி இல்லாமற் போனது' என்று எனக்குத் தோன்றும். இந்த "வசதிகள்' இல்லாததால்தான் அது பொற்காலமாயிருந்ததோ என்றும் எனக்கு ஒருசில சமயம் தோன்றியதுண்டு.
 சில வசதியானவர்கள் காடாறு மாதம், நாடாறு மாதம் என்பதுபோல, வெளிநாடு சென்று, பிள்ளை பேரன்களுடன் சிறிது காலம் கழித்துவிட்டு உலகம் சுற்றிய வாலிபராகத் திரும்பி வருவார்கள். இது போன்ற ஒரு நண்பர் காலை நடையின்போது, எங்கள் குடும்ப நலனை விசாரித்து, "உங்களுக்குப் பரவாயில்லை, பையன் பெண் இந்தியாவிலேயே இருக்கிறார்கள். என்னைப் பாருங்கள், ரெண்டு பையன்களும் அயல்நாட்டில். நாங்கள் அநாதைகள்' என்று சொன்னார். அவர் கையில் கனமான காய்கறிப் பை இருந்தது.
 நான் பதில் சொல்ல வாயெடுக்கும் முன் என் மனைவி பதிலடி கொடுத்தாள் -"உங்களை யார் அவர்களை அங்கெல்லாம் அனுப்பச் சொன்னது? உங்களுக்கும் அந்தப் பெருமை வேண்டித்தானே இருக்கிறது? இப்படிப் பேசாதீர்கள்' என்று சற்று வேகமாகவே கூறிவிட்டாள். நண்பர் மெளனமாக நகர்ந்துவிட்டார்.
 பாவம், ஏதோ அதிருப்தி இருப்பது போலப் பாசாங்கு செய்து, கூட இரண்டு சர்டிபிகேட் வாங்க வேண்டுமென்று எதிர்பார்த்தார். என் மனைவி அதற்கு இடம் தரவில்லை. இதனால் நண்பருக்கும் எனக்கும் சில நாள் மனத்தாங்கல் இருந்தது வேறு விஷயம்.
 ஆனாலும் மனைவி அல்லது மகள் என ஸ்திரீகளுடன் காலை நடை போவது சற்று வித்தியாசமான அனுபவம்தான். அங்கங்கு ஏதாவது காய்கறியோ, மளிகைப் பொருளோ மலிவாக விற்கும் கடை நடைபாதையில் தெரிந்தால், சட்டென்று நின்றுவிடுவார்கள். ஆந்திரா சித்தூரிலிருந்து புளி, தனியா; தென் மாவட்டங்களிலிருந்து பனங்கற்கண்டு, சில்லுக்கருப்பட்டி இத்யாதி... எனவே அவ்விதம் போகும்போது பர்ஸ் கனமாக இருக்கும்படி பார்த்துக் கொள்வேன்.
 அடுத்தது, உணவு சாதனங்களுக்கு சமமாக பெண்களை ஈர்ப்பது உடை. அதாவது, பிரபல கடைகளில் வாங்குவது அல்ல. இது வேறு ரகம்: சிவன் கோயிலில் ஏலம்விடும்போது வாங்குவது; ஏதாவது கோயில் விசேஷத்தின்போது, பந்தக்கால் நடும்போது கிடைப்பது. இத்தனைக்கும் புடவையின் தரம் சுமாராகத்தான் இருக்கும். இருந்தாலும் அதைப் பற்றி சக பெண்மணிகளிடம் ரசித்துப் பேசுவது அவர்களுக்கு கூடுதல் சுவாரஸ்யமாயிருக்கும்.
 மூன்றாவது - வீடு. எங்குமிருப்பது போல எங்கள் பகுதியிலும் மளமளவென்று அடுக்குமாடிக் குடியிருப்புகள் எழும்புகின்றன. பாதியில் நிற்கிற கட்டடங்கள்; சொன்னபடி அடுக்குமாடி வீட்டை முடிக்க இயலாமல் திணறுகிற ஒப்பந்தக்காரர்கள்; தனி வீட்டிலிருந்து அடுக்குமாடிக்கு குடிபுகுந்தவர்களுக்கு நேரும் சிரமங்கள்; இவற்றைப் பற்றி காலை நடையில் பெண்கள் பேசத் துவங்கினால் போதும்... பேச்சு நீண்டு கொண்டே போகும்.
 ஆக, ஆதி மனிதன், எஸ்கிமோ போல மூன்று "உ"க்கள் (உணவு, உடை, உறைவிடம்)தான் இன்றும் புதிய வடிவில் முன்னுரிமை பெறுகின்றன.
 இப்போதெல்லாம் காலத்தின் அழுத்தம் காரணமாக காலை நடை என்பது அருகிலுள்ள கோயில் வரைக்கும்தான் எனச் சுருங்கிவிட்டது. எவ்வாறாயினும், மூத்த குடிமக்களுக்கு காலை நடை என்பது உகந்த, உவப்பான விஷயம்தான். இளங்காலை வெயிலும் மிதமான காற்றும் புத்துணர்வைக் கூட்டுகிறது. நண்பர்களிடம் செய்திகளைப் பகிர்ந்து கொள்வதால் மனச்சுமை குறைகிறது. தெரிந்தவர்களின் வட்டத்தைப் பெருக்குகிறது. சில நினைவுகள் ஞாபக சக்தியை வளர்க்க வழி வகுக்கிறது.
 ஆனால் ஒன்று: காலை நடையின்போது கிட்டுகிற மருத்துவ உபதேசங்களை மட்டும் அறவே புறக்கணியுங்கள். அவற்றை நடைமுறையில் பின்பற்றினால் உறக்கம் கெட்டுவிடும்.
 

சிதம்பரம் அண்ணாமலைப் பல்கலைக்கழக மாணவியின் கழுத்தை பிளேடால் அறுத்த இளைஞர்

By DIN  |   Published on : 30th April 2018 12:20 PM  |

சிதம்பரம்: சிதம்பரம் அண்ணாமலைப் பல்கலைக்கழக மாணவியின் கழுத்தை அறுத்த இளைஞரை காவல்துறையினர் கைது செய்துள்ளனர்.

பிளேடால் கழுத்து அறுபட்ட நிலையில் படுகாயத்துடன் மருத்துவமனையில் மாணவி லாவண்யா அனுமதிக்கப்பட்டுள்ளார்.

அண்ணாமலைப் பல்கலைக்கழகத்தின் விடுதியில் தங்கி படித்து வந்த பிஎஸ்சி இரண்டாம் ஆண்டு மாணவி லாவண்யா, இன்று காலை விடுதியில் இருந்து கல்லூரிக்குச் செல்லும் போது, நவீன்குமார் என்ற இளைஞர் அவரிடம் பேச முற்பட்டுள்ளார். லாவண்யா அவரிடம் பேச மறுத்ததால் ஆத்திரத்தில் தனது கையில் வைத்திருந்த பிளேடால் லாவண்யாவின் கழுத்தை அறுக்க முற்பட்டுள்ளார்.

இதை அங்கிருந்த ஆட்டோ ஓட்டுநர்கள் உட்பட பொதுமக்கள் பார்த்து உடனடியாக நவீன்குமாரை தாக்கினர். இதில் லாவண்யாவின் கழுத்தை பாதி அறுத்த நிலையில் நவீன் குமாரின் பிடியில் இருந்து மாணவி மீட்கப்பட்டார்.

பொதுமக்கள் உடனடியாக லாவண்யாவை மருத்துவமனைக்கு அனுப்பி வைத்தனர். நவீன்குமாரை பொதுமக்கள் கடுமையாக தாக்கினர். தகவல் அறிந்து விரைந்து வந்த காவல்துறையினர், நவீன் குமாரையும் கைது செய்து மருத்துவமனைக்குக் கொண்டு சென்றுள்ளனர்.

பொதுமக்களின் சாமர்த்தியத்தால், மாணவி நூலிழையில் உயிர் தப்பியுள்ளார் என்று சம்பவத்தை நேரில் பார்த்தவர்கள் கூறியுள்ளனர். 

சித்ரா பவுர்ணமி கிரிவலம் : தி.மலையில் திரண்ட பக்தர்கள்

Added : ஏப் 30, 2018 02:27

திருவண்ணாமலை: சித்ரா பவுர்ணமியை முன்னிட்டு, திருவண்ணா மலையில் நேற்று, லட்சக்கணக்கான பக்தர்கள், கடும் வெயிலையும் பொருட்படுத்தாமல், கிரிவலம் சென்று, சுவாமி தரிசனம் செய்தனர்.சித்ரா பவுர்ணமி திதி நேற்று காலை, 6:58 மணிக்கு துவங்கி, இன்று காலை, 7:57 வரை உள்ளது. நேற்று முன்தினம் இரவு, 9:00 மணி முதலே, பக்தர்கள் கிரிவலம் சென்றனர். நேற்று காலை, கட்டுக்கடங் காத கூட்ட நெரிசலில், பக்தர் கள் கிரிவலம் சென்றனர்.மெல்ல ஓடினர்காலை, 9:00 மணிக்கு மேல், வெயில் கொளுத்திய நிலையில், பாதங்களை கீழே வைக்க முடியாமல், மெல்ல ஓடியவாறே பக்தர்கள் கிரிவலம் சென்றனர். வெயிலின் தாக்கத்தை தணிக்க, சாலைகளில், லாரி மூலம், தண்ணீர் ஊற்றியவாறே இருந்தனர். கிரிவலப்பாதை முழுவதும் அன்னதானம், நீர் மோர் வழங்கப்பட்டது.பக்தர்கள் வசதிக்காக, 2,825 சிறப்பு பஸ்கள் இயக்கப்பட்டன. 2,000 போலீசார் பாதுகாப்பு பணியில் ஈடுபடுத்தப்பட்டனர். கோவில் வெளிப்புறத்தில், பக்தர்கள் அதிகமாக கூடும் இடங்களில், ஷாமியானா பந்தல் அமைக்கப்பட்டிருந்தது.கோவிலில், ஐந்து முதல், ஆறு மணி நேரம் வரை, பக்தர்கள் காத்திருந்து, சுவாமி தரிசனம் செய்தனர். நேற்று அதிகாலை, 4:00 முதல் இன்று இரவு, 11:00 மணி வரை, நடை திறந்திருக்க ஏற்பாடு செய்யப்பட்டுள்ளது.தீர்த்தவாரிஅருணாசலேஸ்வரர் கோவிலில், ஆண்டுதோறும், சித்திரை மாதம் வளர்பிறையில், வசந்த உற்சவ விழா கொண்டாடப்படுகிறது. 19ம் தேதி, பந்தக்கால் முகூர்த்தத்துடன் விழா துவங்கியது. தினமும் சுவாமிகளுக்கு, சிறப்பு அபிஷேகம் மற்றும் பூஜை நடந்தது.நேற்று, உண்ணாமுலையம்மன் சமேத அருணாசலேஸ்வரர், அய்யங்குளக்கரையில் எழுந்தருளி, பக்தர்களுக்கு அருள்பாலித்தனர். பின், சூல வடிவிலான சுவாமி தீர்த்தவாரி நடந்தது. நள்ளிரவு, மன்மத தகன விழா நடந்தது. இதில், ஆயிரக்கணக்கான பக்தர்கள் பங்கேற்றனர்.

'டிக்கெட்' உடன் டாக்ஸி முன்பதிவு : ஐ.ஆர்.சி.டி.சி., துவக்கம்

Added : ஏப் 30, 2018 00:30

ஐ.ஆர்.சி.டி.சி., இணையதளத்தில், டிக்கெட் உடன் டாக்ஸியையும் முன்பதிவு செய்து, ஸ்டேஷன்களில் இருந்து பயணிக்கும் வசதி, அறிமுகம் செய்யப்பட்டுள்ளது.ஐ.ஆர்.சி.டி.சி., எனப்படும், இந்திய ரயில்வே உணவு மற்றும் சுற்றுலாக்கழகத்தின், இணையதளத்தில், 'இ - டிக்கெட்' முன்பதிவு செய்து, தினமும் லட்சக்கணக்கானோர் ரயில்களில் பயணித்து வருகின்றனர். ரொக்கமில்லா பரிவர்த்தனையை ஊக்குவிக்கும் விதமாக, ஐ.ஆர்.சி.டி.சி., பயணியருக்கு சிறப்பு சலுகைகளுடன், பல்வேறு வசதிகளும் அறிமுகம் செய்யப்பட்டு வருகின்றன.அந்த வகையில், டிக்கெட் முன்பதிவு செய்யும்போதே, 'டாக்ஸி' முன்பதிவு செய்து, ஸ்டேஷனில் இருந்து பயணிக்கும் வசதி, அறிமுகம் செய்யப்பட்டுள்ளது.ஐ.ஆர்.சி.டி.சி., அதிகாரி ஒருவர் கூறுகையில், 'பயணியரின் போக்குவரத்து பிரச்னையை தீர்க்கும் விதமாக, தனியார் டாக்ஸி நிறுவனங்களுடன், ஐ.ஆர்.சி.டி.சி., ஒப்பந்தம் செய்துள்ளது. 'இணையதளத்தில், பயணியர் டிக்கெட் முன்பதிவு செய்யும்போதே, விரும்பிய இடத்துக்கு செல்ல, ஏழு நாட்களுக்கு முன்னரே டாக்ஸி முன்பதிவு செய்யலாம். ஐ.ஆர்.சி.டி.சி., மொபைல் போன் செயலியில் இருந்தும், டாக்ஸி முன்பதிவு செய்யலாம்' என்றார்.

- நமது நிருபர் -

வெளிநாட்டு நன்கொடைக்கு கணக்கு எங்கே?
தொண்டு நிறுவனங்களுக்கு அரசு கிடுக்கிப்பிடி 

dinamalar 30.04.2018

புதுடில்லி:'நாட்டில் உள்ள, 3,292 தன்னார்வ தொண்டு நிறுவனங்கள் மற்றும் முன்னணி கல்வி நிறுவனங்கள், வெளிநாடுகளில் இருந்து பெற்ற நன்கொடைகளுக்கு, இன்னும், வரவு - செலவு கணக்கை சமர்ப்பிக்கவில்லை' என, மத்திய உள்துறை அமைச்சகம் தெரிவித்துள்ளது.




வரவு - செலவு

இது தொடர்பாக, சம்பந்தப்பட்ட தொண்டு நிறு வனங்கள் மற்றும் கல்வி நிறுவனங் களுக்கு, 'நோட்டீஸ்' அனுப்பப்பட்டுள்ளது. சமூகப் பணி களில் ஈடுபடும் தன்னார்வ தொண்டு நிறுவனங் கள் மற்றும் முன்னணி கல்வி நிறுவனங் களுக்கு, ஆண்டு தோறும்,வெளிநாடுகளில் இருந்து, கோடிக்கணக்கில் நன்கொடை

குவிகிறது. இது தொடர்பான வரவு - செலவு கணக் குகளை, ஒவ்வொரு நிதி ஆண்டின் இறுதியிலும், சம்பந்தப்பட்ட நிறுவனங்கள் சமர்ப்பிக்க வேண்டும் என்பது விதி.

கணக்கு தாக்கல் செய்யாதவர்கள்மீது, வெளிநாட்டு நன்கொடைகள் ஒழுங்குமுறை சட்டத்தின் கீழ், உள்துறை அமைச்சகம் நடவடிக்கை எடுக்கும். இந்நிலையில், நாடு முழுவதும் உள்ள, 3,292 தன்னார்வ தொண்டு நிறுவனங்கள் மற்றும் கல்வி நிறுவனங்கள், 2011 - 12 முதல், 2016 - 17 வரையி லான நிதி ஆண்டில் வசூல் செய்த, வெளிநாட்டு நன்கொடைக்கு, இதுவரை கணக்கு காட்டவில்லை என்ற தகவல் வெளியாகியுள்ளது.

இது தொடர்பாக, மத்திய உள்துறை அமைச்சகம், அந்த நிறுவனங்களுக்கு நோட்டீஸ் அனுப்பியது. 'இந்த நோட்டீஸ் பெறப்பட்ட, 15 நாட்களுக்குள், தங்கள்கணக்குகளை இணையம் மூலம் சமர்ப்பிக்க வேண்டும்' என, அதில் கூறப்பட்டுள்ளது.

நோட்டீஸ்

இன்போசிஸ் பவுண்டேஷன், சென்னை கிறிஸ்தவ

கல்லுாரி, ஐ.ஐ.டி., - சென்னை மற்றும் டில்லி, ஜவஹர்லால் நேரு பல்கலை, டில்லி பல்கலை, இந்திய மருத்துவ ஆராய்ச்சிகழகம், இந்திரா காந்தி தேசிய திறந்தநிலை பல்கலை, பஞ்சாப் மற்றும் ராஜஸ்தான் பல்கலைக் கழகங்கள் உட்பட, ஏராளமான முன்னணி கல்வி நிறுவனங்களுக்கு, உள்துறை அமைச்சகம் நோட்டீஸ் அனுப்பி உள்ளது.

ஐ.ஐ.டி., மற்றும் இன்போசிஸ் பவுண்டேஷன் ஆகியவை, வெளிநாட்டு நன்கொடைகள் ஒழுங்குமுறை சட்டத்தின் கீழ் வராது என்ப தால், தங்கள் நிறுவனம், வரவு - செலவு கணக்கு தாக்கல் செய்ய வேண்டிய அவசியம் இல்லை என, பதில் அளித்துள்ளன.

வரவிருக்கும் விசேஷங்கள்

• ஏப்ரல் 30 (தி) கள்ளழகர் வைகையாற்றில் எழுந்தருளல்
• மே 01 (செ) மே தினம்
• மே 04 (வெ) அக்னி நட்சத்திரம் ஆரம்பம்
• மே 28 (தி) அக்னி நட்சத்திரம் முடிவு
• மே 28 (தி) வைகாசி விசாகம்
• மே 29 (செ) காஞ்சி பெரியவர் பிறந்த தினம்

ரூ.2200 மதிப்புடைய சலுகையை அறிவித்த ஜியோ!!

ரூ.2200 மதிப்புடைய சலுகையை அறிவித்த ஜியோ!!

இந்தியாவில் பழைய டாங்கிள்களை வழங்கி புதிய ஜியோஃபை போர்டபிள் ஹாட்ஸ்பாட் பெறுவோருக்கு ரிலையன்ஸ் புதிய சலுகைகளை வழங்குகிறது.

 அந்த வகையில் பழைய டாங்கிள்களை கொடுத்து புதிய ஜியோஃபை போர்டபிள் ஹாட்ஸ்பாட் வாங்குவோருக்கு புதிய வைபை ரவுட்டர் மற்றும் ரூ.2200 கேஷ்பேக் வழங்கப்படுகிறது.

ஜியோஃபை எக்ஸ்சேஞ்ச் குறுகிய கால சலுகையை பெற என்ன செய்ய வேண்டும்?

- ஜியோஃபை போர்டபிள் வைபை ரவுட்டரை ரூ.999 செலுத்தி வாங்க வேண்டும்

- ஜியோ பிரைம் ரூ.99 மற்றும் ரூ.198 அல்லது ரூ.299 செலுத்தி சிம் கார்டினை ஆக்டிவேட் செய்ய வேண்டும்

- உங்களின் பழைய ஜியோ அல்லாத டாங்கிளை ஏதேனும் ஜியோஸ்டோர் அல்லது ரிலையன்ஸ் டிஜிட்டல் ஸ்டோரில் வழங்க வேண்டும்

- பழைய ஜியோ அல்லாத டாங்கிள் அல்லது மோடெமின் சீரியல் நம்பரை வழங்கி, புதிய ஜியோஃபை MSISDN நம்பரை பெற வேண்டும்

- உங்களுக்கான கேஷ்பேக் உடனடியாக மைஜியோ கணக்கில் சேர்க்கப்பட்டு விடும்

ரூ.2200 மதிப்புடைய கேஷ்பேக் ரூ.50 மதிப்புடைய மொத்தம் 44 வவுச்சர்களாக வழங்கப்படும், இவற்றை ரூ.198 மற்றும் ரூ.299 ரீசார்ஜ் செய்ய மட்டும் பயன்படுத்தலாம்.

கடந்த ஆண்டு அறிமுகமான ஜியோஃபை ரவுட்டர் அதிக வரவேற்பை பெற்றது. கடந்த ஆணஅடு செப்டம்பரில் வெளியான தகவல்களில் டேட்டா கார்டு சந்தையில் ஏப்ரல் - ஜூன் மாதம் வரையிலான காலகட்டத்தில் ஜியோஃபை மட்டும் 91% பங்குகளை பெற்றிருந்ததாக தெரிவிக்கப்பட்டது.

இலவச டேட்டா வழங்கியதன் மூலம் அதிக பிரபலமான ரிலையன்ஸ் ஜியோ ஏர்டெல், வோடபோன் மற்றும் ஐடியா போன்ற நிறுவனங்களுக்கு கடும் போட்டியை ஏற்படுத்தி வருகிறது.

போர்டபிள் ஹாட்ஸ்பாட் சாதனம் 2016-ம் ஆண்டு அறிமுகம் செய்யப்பட்டது. ஒரே சமயத்தில் வைபை வசதி கொண்டு பத்து சாதனங்களிலும், ஒரு சாதனத்திற்கு யுஎஸ்பி மூலம் இணைத்து பயன்படுத்தும் வசதியை ஜoியோஃபை ஹாட்ஸ்பாட் வழங்குகிறது.

இதில் உள்ள OLED டிஸ்ப்ளே நெட்வொர்க் சிக்னல், பவர், வைபை ஸ்டேட்டஸ் மற்றும் இதர தகவல்களை வழங்குகிறது. இந்த சாதனம் கொண்டு அதிவேக 4ஜி இன்டர்நெட் பயன்படுத்த முடியும். இத்துடன் வைபை ஹாட்ஸ்பாட்களை உருவாக்க முடியும். மேலும் ஹெச்டி வாய்ஸ் கால், வீடியோ கால், மெசேஜிங் உள்ளிட்ட வசதிகளும் வழங்குகிறது.