'தேவை 7 எம்.எல்.ஏக்கள்தான்!' -பன்னீர்செல்வத்துக்கு பலம் சேர்க்கும் பா.ஜ.க வியூகம்


இந்திய தலைமை தேர்தல் ஆணையர் நஜீம் ஜைதியை சந்தித்துவிட்டுத் திரும்பியிருக்கிறார் பன்னீர்செல்வம் ஆதரவாளரான மைத்ரேயன் எம்.பி. ' சட்டசபைக் குழுத் தலைவராக எடப்பாடியைத் தேர்வு செய்தார் சசிகலா. பொதுச் செயலாளராக அவர் தேர்வு செய்யப்பட்டதே செல்லாது. இதே அடிப்படையில் எடப்பாடி பழனிச்சாமி தேர்வும் செல்லாது' என ஆணையத்திடம் புகார் தெரிவித்திருக்கிறார் மைத்ரேயன்.

தமிழக அரசியல் களத்தில் ஒன்பது நாட்களாக நீடித்து வந்த குழப்பத்துக்கு இன்று விடை கிடைத்துவிட்டது. தமிழக முதல்வராக பொறுப்பேற்க இருக்கிறார் எடப்பாடி பழனிச்சாமி. ' 15 நாட்களுக்குள் பெரும்பான்மையை நிரூபியுங்கள்' என உத்தரவிட்டிருக்கிறார் ஆளுநர் வித்யாசாகர் ராவ். ' இதனால் குதிரைப் பேரம் அதிகரிக்கவே வாய்ப்பு அதிகம்' எனக் கருத்து தெரிவித்திருக்கிறார் தி.மு.க செயல் தலைவர் ஸ்டாலின். ' சபையில் பலத்தை நிரூபிக்க நமக்குத்தான் முதல் வாய்ப்பு கிடைக்கும். இதையே காரணமாக வைத்து, அனைத்து எம்.எல்.ஏக்களையும் நம் பக்கம் திசை திருப்புவோம்' என எதிர்பார்த்துக் காத்திருந்தார் பன்னீர்செல்வம். அவருடைய நம்பிக்கை ஈடேறவில்லை. எடப்பாடி பழனிச்சாமி பதவியேற்கத் தடை விதித்து, முன்னாள் அமைச்சர் செம்மலை தொடர இருந்த வழக்கும் வாபஸ் பெறப்பட்டுவிட்டது. 'இப்படியொரு சூழல் உருவாகும்' என ஓ.பி.எஸ் அணியில் இருக்கும் மாஃபா பாண்டியராஜன் உள்பட யாருமே எதிர்பார்க்கவில்லை. " சட்டசபையில் எடப்பாடியால் பெரும்பான்மையை நிரூபிக்க முடியாது. ஓ.பி.எஸ் ஆதரவு மனநிலையில் 50 எம்.எல்.ஏக்கள் உள்ளனர். சசிகலாவுடன் மோதல் போக்கு தொடங்கிய நாட்களில் இருந்தே தனக்கான அணியை வலுவாக்கிக் கொண்டார் பன்னீர்செல்வம். இதை அறிந்துதான் கூவத்தூர் விடுதியில் ஓ.பி.எஸ் ஆதரவு எம்.எல்.ஏக்களுக்கு தனி வகுப்பு எடுத்தார் சசிகலா. அவர்கள் தரப்பில் கொடுத்த வாக்குறுதிகளையும் தாண்டி, எடப்பாடிக்கு எதிராகவே அவர்கள் வாக்களிப்பார்கள்" என விவரித்த ஓ.பி.எஸ் அணியின் நிர்வாகி ஒருவர்,

" தலைமை தேர்தல் ஆணையர் நஜீம் ஜைதியிடம் மைத்ரேயன் கொடுத்த புகார் மிக முக்கியமானது. கட்சி சட்டவிதிகளின்படி சசிகலா தேர்வு செய்யப்படவில்லை. இதையொட்டி ஆணையத்தில் சசிகலா புஷ்பா கொடுத்த புகாரின் அடிப்படையில், சசிகலாவிடம் விளக்கம் கேட்கப்பட்டுள்ளது. இன்று அளிக்கப்பட்ட புகாரில், ' அ.தி.மு.கவின் சட்ட விதிகளில் தற்காலிக பொதுச் செயலாளர் என்ற பதவியே கிடையாது. அந்த வகையில், அவரால் நியமனம் செய்யப்பட்டவர்களின் பதவியும் செல்லாது. கூவத்தூர் சொகுசு விடுதியில், சசிகலா கூட்டிய கூட்டங்களும் செல்லாது. அவைத் தலைவராக செங்கோட்டையன் நியமனமே செல்லாது. அப்படிப் பார்த்தால், சட்டசபைத் தலைவராக எடப்பாடி பழனிச்சாமியை தேர்வு செய்ய முடியாது' எனத் தெரிவித்திருக்கிறார். தற்போதும் அவைத் தலைவர் என்ற முறையில் பொதுச் செயலாளர் பதவிக்கான தேர்தல் தேதியை மதுசூதனன் அறிவிப்பதற்கு உரிமை உள்ளது. தேர்தல் வந்தால் அ.தி.மு.க தொண்டர்கள் எங்களைத்தான் தேர்வு செய்வார்கள். சபையிலும் எடப்பாடியால் பலத்தை நிரூபிக்க முடியாது. கட்சி அதிகாரத்தையும் ஆட்சி அதிகாரத்தையும் முழுதாகக் கைப்பற்றுவோம். அடுத்து வரக் கூடிய நாட்களில் தேர்தல் ஆணையத்தின் நடவடிக்கைகளை சசிகலா தரப்பினர் எதிர்கொள்ள இருக்கின்றனர்" என்றார் விரிவாக.

" பதவிப் பிரமாணம் செய்து வைப்பதில் ஆளுநர் காலதாமதம் செய்வதாக எதிர்க்கட்சிகள் குற்றம் சுமத்தின. இதையடுத்து, எடப்பாடி பழனிச்சாமியை பதவியேற்க அழைத்தார் ஆளுநர். எம்.எல்.ஏக்களில் பெரும்பாலானவர்கள் பன்னீர்செல்வம் பக்கம் வரவில்லை. இதனால் பா.ஜ.க மேலிடம் அதிருப்தியில் உள்ளது. அவர்கள் கண்முன் இரண்டு வாய்ப்புகள் உள்ளன. ஓ.பி.எஸ்ஸை பலப்படுத்தும் வேலைகளைத் துரிதப்படுத்துவது; அது சாத்தியப்படாவிட்டால் ஜனாதிபதி ஆட்சியை கொண்டுவருவது. இதையொட்டி, சபையில் பெரும்பான்மை பலத்தை நிரூபிக்க முடியாத அளவுக்கு எடப்பாடிக்கு சிக்கலை உருவாக்கும் வேலைகள் வேகமெடுத்துள்ளன.

எடப்பாடி தரப்பில் இருந்து ஏழு எம்.எல்.ஏக்களைக் கொண்டு வந்துவிட்டாலே அவர்களால் பெரும்பான்மையை நிரூபிக்க முடியாது. இந்த விவகாரத்தில் பெரும்பாலான எம்.எல்.ஏக்களின் மனநிலை வேறு மாதிரியாக உள்ளது. ' எங்கு பெரும்பான்மை உள்ளதோ, அந்தப் பக்கம் எங்கள் ஆதரவு இருக்கும். எம்.எல்.ஏ பதவிக்காலத்தை முழுமையாக நிறைவு செய்ய வேண்டும்' என்ற எண்ணத்தில் உள்ளனர். வரக் கூடிய நாட்களில் எம்.எல்.ஏக்களைத் தக்க வைப்பதே பழனிச்சாமிக்கு பெரும்பாடாக இருக்கும். தமிழ்நாட்டில் ஆட்சி கலைவதையே எதிர்க்கட்சிகள் விரும்புகின்றன. தேர்தல் வந்தாலும், அ.தி.மு.க சிதறிக் கிடப்பதால் பெரும்பாலான இடங்களில் வென்று ஆட்சியமைக்க முடியும் என தி.மு.க தரப்பில் நம்புகின்றனர். சட்டசபையில் பெரும்பான்மை பலத்தை நிரூபிக்கும் நாளுக்காக காத்திருக்கிறார் ஆளுநர் வித்யாசாகர் ராவ்" என்கின்றனர் அரசியல் விமர்சகர்கள்.

எவ்வளவு நாள் தாங்குவார் எடப்பாடி பழனிசாமி?!' - எம்.எல்.ஏக்களை வதைக்கும் '88' சென்டிமெண்ட்


தமிழக சட்டப் பேரவையில் நாளை பெரும்பான்மை பலத்தை நிரூபிக்க இருக்கிறார், முதலமைச்சர் எடப்பாடி பழனிசாமி. ' அ.தி.மு.கவின் ஒவ்வொரு எம்.எல்.ஏவிடமும் நேற்று இரவு உருக்கமான வேண்டுகோள் வைத்தார் பழனிசாமி. ' பன்னீர்செல்வம் அளவுக்கு அவர் நிதானித்து ஆட்சி நடத்துவாரா?' என்ற கேள்விகளும் அ.தி.மு.க நிர்வாகிகள் மத்தியில் எழுந்துள்ளது' என்கின்றனர் அரசியல் விமர்சகர்கள்.

தமிழக அரசியல் களத்தில் 11 நாட்களாக நீடித்துவந்த குழப்பம் முடிவுக்கு வந்துவிட்டது. நேற்று பதவிப்பிரமாணம் முடிந்த கையோடு, பூந்தண்டலத்தில் உள்ள வில்லேஜ் ரிசார்ட்டில் நீண்ட நேரம் ஆலோசனை நடத்தியிருக்கிறார் முதலமைச்சர் பழனிசாமி. " ஒரு வாரமாக கூவத்தூர் ரிசார்ட்டில் இறுக்கமான முகத்துடன் அமர்ந்திருந்த நிர்வாகிகளுக்கு நேற்று கொண்டாட்டமான நாளாக அமைந்துவிட்டது. பெண் எம்.எல்.ஏக்களில் பலர் உற்சாக நடனம் ஆடினர். வழக்கத்தைவிட, இரவு நெடுநேரம் உற்சாகத்தில் மிதந்தனர் எம்.எல்.ஏக்கள். ஆட்டம் தொடங்குவதற்கு முன்பாக, ஒவ்வொரு எம்.எல்.ஏவையும் தனித்தனியாகச் சென்று சந்தித்தார் பழனிசாமி. அவர்களிடம், ' கட்சிக்கு ஏற்பட்டுள்ள நெருக்கடியான நிலையில், நீங்கள் அனைவரும் ஒற்றுமையாக இருந்ததால், நம்மால் சாதிக்க முடிந்தது. சபையில் பெரும்பான்மை பலத்தை நிரூபிப்போம். நீங்கள் எதைப் பற்றியும் கவலைப்பட வேண்டாம். அனைத்தும் வந்து சேரும்' என உருக்கமான வேண்டுகோள் வைத்தார். ' சபையில் எவ்வாறு நடந்துகொள்ள வேண்டும்? என்ன செய்ய வேண்டும்?', ' நம்மை சீண்டிப் பார்க்கும் வேலைகள் நடந்தாலும் பொறுமை காக்க வேண்டும்' என ஆலோசனைகளை வழங்கினார். எம்.எல்.ஏக்கள் பலரும், ' நான்கரை ஆண்டுகள் ஆட்சிக்காலத்தை நிறைவுசெய்ய வேண்டும் என்ற மனநிலையில்தான் நாங்கள் இருக்கிறோம். பலத்தை நிரூபிக்க முடியாமல் போனால், ஆட்சியைக் கலைத்துவிடுவார்கள். இன்னொரு தேர்தல் வருவதற்கு நாங்கள் விரும்பவில்லை' எனத் தெரிவித்துள்ளனர். இதன்பிறகே, சீனியர் அமைச்சர்களுடன் ஆலோசனை நடத்தக் கிளம்பினார் எடப்பாடி பழனிசாமி" என விவரித்தார் அ.தி.மு.க நிர்வாகி ஒருவர்.

" எம்.எல்.ஏக்களில் சிலரை தன் பக்கம் இழுத்துவிட வேண்டும் என்பதில் ஓ.பி.எஸ் அணியினர் தீவிரமாக வேலைபார்க்கிறார்கள். '15 நாட்கள் வரையில் காத்திருந்தால், நிலைமை கைமீறிப் போய்விடும்' என்பதால்தான், நாளையே பலப்பரீட்சைக்கு இசைவு தெரிவித்தார் எடப்பாடி. வாக்கெடுப்பில் நாளை அவர் வெற்றிபெற்றாலும், எப்போது வேண்டுமானாலும் நம்பிக்கை இல்லா தீர்மானத்தைக் கொண்டுவரலாம். எம்.எல்.ஏக்களைத் தக்கவைப்பதே அவருக்குப் பெரும் சவாலாக இருக்கும்" என விவரித்த அரசியல் கட்சி பிரமுகர் ஒருவர், " சபையில் தி.மு.க மற்றும் காங்கிரஸ் கட்சியின் பலம் 98 ஆக இருக்கிறது. ஓ.பி.எஸ் பக்கம் 11 எம்.எல்.ஏக்கள் இருக்கிறார்கள் எனச் சொல்கின்றனர். மயிலாப்பூர் தொகுதி எம்.எல்.ஏ நட்ராஜ், எடப்பாடிக்கு எதிராக வாக்களிக்க இருக்கிறார். தற்போது எடப்பாடி அணியில் 124 எம்.எல்.ஏக்கள் ஆதரவு உள்ளது என்கின்றனர். ஒவ்வொரு எம்.எல்.ஏவுக்கும் கூடுதல் முக்கியத்துவத்தைக் கொடுக்கவேண்டிய கட்டாயத்தில் அ.தி.மு.க இருக்கிறது. காங்கிரஸ் கட்சியும் தி.மு.கவும் எதிர்த்து வாக்களிக்க இருக்கிறது. எடப்பாடி தோற்றுவிட்டாலும், அடுத்து யாரை அழைப்பது என்பதை ஆளுநர்தான் முடிவுசெய்ய வேண்டும். தற்போதுள்ள சூழலில், எடப்பாடிபழனிசாமி வெற்றி பெறுவதற்கான வாய்ப்புகளே அதிகம். ஆனால், அதற்குப் பிறகு அவர் எதிர்கொள்ளவேண்டிய பிரச்னைகள் ஏராளமாக இருக்கின்றன" என்றவர்,

" பன்னீர்செல்வம் அளவுக்கு போயஸ் கார்டனை அனுசரித்து நடந்துகொண்டவர்கள் மிகவும் குறைவு. அவர்களின் அதிகாரத் தோரணைக்கு முன்னால், 'எடப்பாடி எவ்வளவு நாள் தாங்குவார்?' என்ற கேள்வியும் எழுந்துள்ளது. முதலமைச்சர் பதவியில் அமர்ந்தாலும், அனைத்து தரப்பினருக்கும் பதில் சொல்ல வேண்டிய கட்டாயம் இருக்கிறது. பன்னீர்செல்வத்துக்கு என்ன மரியாதை கொடுக்கப்பட்டதோ, அதே நிலைதான் எடப்பாடிக்கும் தொடர வாய்ப்பு இருக்கிறது. எவ்வளவு அழுத்தங்கள் வந்தாலும், பன்னீரைப் போல் எடப்பாடி கடந்து போக மாட்டார். அவருக்குப் பொறுமை என்பது கிடையாது. பன்னீர்செல்வம் முதல்வராக இருக்கும்போதும், சீனியர் அமைச்சர்கள் அவரை ஒரு பொருட்டாக மதித்தது கிடையாது. உதாரணமாக, ஜல்லிக்கட்டு விவகாரத்தில் முதல்வர் பன்னீர்செல்வம் நீண்ட விளக்கம் கொடுத்துவிட்டு அமர்ந்தார்.

உடனே எழுந்த அமைச்சர் ஜெயக்குமார், ஜல்லிக்கட்டு தொடர்பாகப் பேசினார். இதைக் கண்ட தி.மு.க எம்.எல்.ஏக்கள், ' முதல்வர் பேசிவிட்டு அமர்ந்த பிறகு, அமைச்சர் எழுந்து பேசுவது மரபு அல்ல. இதே இடத்தில் ஜெயலலிதா இருந்திருந்தால் நீங்கள் பேசியிருப்பீர்களா? முதலமைச்சருக்கு உண்டான மரபைக் காப்பாற்றுங்கள்' எனச் சத்தம் போட்டனர். 'முதலமைச்சர் பதவியை இவர்கள் எப்படிப் பார்க்கிறார்கள்?' என்பதற்கு இது ஓர் உதாரணம். சசிகலாவை முதல்வர் பதவியில் அமரவைக்க முடியாத கோபத்தில் அவரது உறவினர்கள் இருக்கிறார்கள். எடப்பாடிக்கு அரசியல் முக்கியத்துவம் கிடைப்பதையும் அவர்கள் ரசிக்க மாட்டார்கள். சொந்த சமூகத்தின் அழுத்தத்திற்கும் செவிசாய்க்கவேண்டிய இடத்தில் எடப்பாடி இருக்கிறார். ' பன்னீரைப் போல அவர் பவ்யத்தோடு பதவியில் அமர்ந்திருப்பாரா?' என அ.தி.மு.க நிர்வாகிகளே கேள்வி எழுப்புகின்றனர்" என்றார் விரிவாக.

எம்.ஜி.ஆர் மரணத்துக்குப் பிறகு, 88-ம் ஆண்டு சட்டசபையில் நம்பிக்கை வாக்கெடுப்பு நடத்தப்பட்டது. அதன்பிறகு, 28 ஆண்டுகளுக்குப் பிறகு சபையில் நம்பிக்கை வாக்கெடுப்பு நடக்கிறது. அப்போது ஜானகி ராமச்சந்திரன் முதல்வரானபோதும், அடுத்து வந்த நாட்களில் ஆட்சிக் கலைப்பு அரங்கேறியது. 'அதேபோல் இப்போதும் நடந்துவிடுமா?' என்ற சென்டிமென்ட் அச்சமும் ஆளும்கட்சி எம்.எல்.ஏக்களை வாட்டிவருகிறது.

எடப்பாடி பழனிசாமிக்கு எதிரான முடிவு ஏன்?  நட்ராஜ் பரபரப்பு பேட்டி 

ஓ.பன்னீர்செல்வமே முதல்வராக வேண்டும் என்று மக்கள் விரும்புகின்றனர். மக்களின் விருப்பப்படியே நாளை நடக்கும் வாக்கெடுப்பில் வாக்களிப்பேன் என்று நட்ராஜ் எம்.எல்.ஏ. தெரிவித்தார்.

அ.தி.மு.க.வில் ஏற்பட்ட உள்கட்சி பூசலால் ஓ.பன்னீர்செல்வம், சசிகலா ஆகிய இரண்டு அதிகார மையங்கள் உருவாகின. சொத்துக்குவிப்பு வழக்கில் சசிகலா சிறைக்குச் சென்றதால், எடப்பாடி பழனிசாமி முதல்வராகத் தேர்ந்தெடுக்கப்பட்டார். சட்டசபையில் நாளை நடைபெற உள்ள வாக்கெடுப்பில், எடப்பாடி பழனிசாமி மெஜாரிட்டியை நிரூபித்தால் மட்டுமே முதல்வராகத் தொடர முடியும். இந்தச் சூழ்நிலையில், கூவத்தூர் முகாமுக்குச் செல்லாமல் மயிலாப்பூர் தொகுதி அலுவலகத்தில் மக்களின் குறைகளைக் கேட்டறியும் பணியில் ஈடுபட்டார் முன்னாள் டி.ஜி.பி.யும் எம்.எல்.ஏ.வுமான நட்ராஜ். அவரை ஓ.பன்னீர்செல்வத்தின் அணியிலிருக்கும் முன்னாள் அமைச்சர் மாஃபா. க.பாண்டியராஜன் சந்தித்துப் பேசினார். அப்போதே அவர் பன்னீர்செல்வம் அணிக்கு வரவுள்ளதாகத் தகவல் பரவியது. இதை பாண்டியராஜனும் சூசகமாக உறுதிப்படுத்தினார்.

முதல்வர் பழனிச்சாமி தலைமையில் புதிய ஆட்சி அமைந்துள்ள நிலையில், மயிலாப்பூர் தொகுதி எம்.எல்.ஏ. நட்ராஜ் அதிரடி முடிவை எடுத்துள்ளார். இதுகுறித்து அவர் நமக்கு அளித்த சிறப்பு பேட்டி:

நீங்கள் முதல்வர் எடப்பாடி பழனிசாமிக்கு எதிராக முடிவு எடுத்துள்ளதாக தகவல் வருகிறதே?

அப்படியெல்லாம் ஒன்றும் இல்லை. நான் முதலில் இருந்தே கட்சி இரண்டாகப் பிளவுப்படக் கூடாது என்று சொல்லி வருகிறேன். அதுவே என்னுடைய விருப்பம். இரண்டு பேரும் இணைய வேண்டும். ஆலோசனைக் கூட்டத்தில் தொகுதி மக்கள் தங்களின் உணர்வுகளை என்னிடம் தெரிவித்துள்ளனர். அதற்கு மதிப்பளிக்கவேண்டிய கடமை எனக்கு இருக்கிறது.

நீங்கள் நாளை நடக்கும் வாக்கெடுப்பில் கலந்துகொள்வீர்களா?

மக்களின் விருப்பம்படியே நான் வாக்களிப்பேன்

மக்கள் என்ன கருத்தை உங்களிடம் தெரிவித்தார்கள்?

பழையபடி ஓ.பன்னீர்செல்வம் தலைமையிலான ஆட்சியை மக்கள் விரும்புகின்றனர்.

ஓ.பன்னீர்செல்வத்துக்கு நீங்கள் ஆதரவு என்று சொல்லலாமா?

அப்படி நீங்கள்தான் சொல்கிறீர்கள். என்னைப் பொறுத்தவரைக்கும் கட்சி இரண்டாக உடையக்கூடாது.

முதல்வர் எடப்பாடி பழனிசாமிக்கு எதிராக நட்ராஜ் வாக்களித்தாலும் அல்லது வாக்களிப்பில் பங்கேற்கவில்லை என்றாலும் அது ஓ.பன்னீர்செல்வத்துக்கு சாதகமான முடிவை ஏற்படுத்த வழிவகுக்கும் என்கின்றனர் அரசியல் நோக்கர்கள்.

இதற்கிடையில் முதல்வர் எடப்பாடி பழனிசாமியை ஆதரிக்காத எம்.எல்.ஏ.க்கள் தங்களது பதவியை இழப்பார்கள் என்று அமைச்சர் ஓ.எஸ்.மணியன் எச்சரித்துள்ளார். இதனால், நட்ராஜ் எம்.எல்.ஏ. எடுக்கும் முடிவுக்குப் பிறகு, அவர் மீது கட்சி மேலிடம் நடவடிக்கை எடுக்க வாய்ப்புள்ளதாக சசிகலா அணியினர் தெரிவித்துள்ளனர்.

சபாநாயகருடன், பன்னீர்செல்வம் அணியினர் திடீர் சந்திப்பு!



சபாநாயகர் தனபாலை, பன்னீர்செல்வம் அணியினர் இன்று திடீரென சந்தித்துப் பேசியுள்ளது அரசியலில் பரபரப்பை ஏற்படுத்தியுள்ளது.

தமிழக முதல்வராக எடப்பாடி பழனிசாமி நேற்று பதவியேற்றுக்கொண்டார். அவருக்கு, ஆளுநர் வித்யாசாகர் ராவ் பதவிப்பிரமாணம் செய்துவைத்ததோடு, பதினைந்து நாள்களில் பெரும்பான்மையை நிரூபிக்க வேண்டும் என்று உத்தரவிட்டுள்ளார்.

இதனிடையே, தமிழக சட்டப்பேரவை சிறப்புக் கூட்டம் பிப்ரவரி 18-ம் தேதி (நாளை) நடைபெறும் என்று சட்டப்பேரவைச் செயலாளர் ஜமாலுதின் நேற்று அறிவித்தார். முதல்வர் பழனிசாமி, நாளை சட்டப்பேரவையில் பெரும்பான்மையை நிரூபிக்க உள்ள நிலையில், முன்னாள் முதல்வர் பன்னீர்செல்வத்தின் ஆதரவு எம்.எல்.ஏ.க்கள் இன்று திடீரென சந்தித்துப் பேசினர்.

தலைமைச் செயலகத்தில் சபாநாயகர் தனபாலை இன்று எம்.எல்.ஏ.க்கள் மாஃபா பாண்டியன், செம்மலை மற்றும் பொன்னையன் ஆகியோர் சந்தித்துப் பேசினர். அப்போது, சட்டப்பேரவையில் ரகசிய வாக்கெடுப்பு நடத்த வேண்டும் என்று அவர்கள் கோரிக்கை வைத்துள்ளதாகக் கூறப்படுகிறது.

சட்டப்பேரவையில் நாளை நம்பிக்கை வாக்கெடுப்பு நடைபெற உள்ள நிலையில் இந்தச் சந்திப்பு நடந்துள்ளது, அ.தி.மு.க.வில் பரபரப்பை ஏற்படுத்தியுள்ளது.

முதல்வர் பழனிச்சாமி அணியில் இன்னொரு விக்கெட் வீழ்ந்தது!


சட்டசபையில் நாளை நடைபெறும் நம்பிக்கை வாக்கெடுப்பில், முதல்வர் எடப்பாடி பழனிசாமிக்கு எதிராக வாக்களிப்பேன் என்று மயிலாப்பூர் எம்.எல்.ஏ நட்ராஜ் கூறியுள்ளது கட்சித் தலைமையை அதிர்ச்சியடையவைத்துள்ளது.

முன்னாள் முதல்வர் பன்னீர்செல்வத்துக்கும், அ.தி.மு.க பொதுச் செயலாளர் சசிகலாவுக்கும் இடையே அதிகாரப்போட்டி நடந்துவரும் நிலையில், சொத்துக்குவிப்பு வழக்கில் தண்டனைபெற்ற சசிகலா, பெங்களூரில் உள்ள பரப்பன அக்ரஹாரா சிறையில் அடைக்கப்பட்டார். முன்னதாக அ.தி.மு.க சட்டமன்ற கட்சித்தலைவராக எடப்பாடி பழனிசாமி தேர்ந்தெடுக்கப்பட்டார். ஆளுநரின் அழைப்பைத் தொடர்ந்து முதல்வராக நேற்று பதவியேற்றுக்கொண்டார். மேலும், பதினைந்து நாள்களில் பெரும்பான்மையை நிரூபிக்க வேண்டும் என முதல்வருக்கு ஆளுநர் உத்தரவிட்டுள்ளார்.

இதனிடையே, கூவத்தூரில் உள்ள கோல்டன் பே ரிசார்ட்டில் தங்கவைக்கப்பட்டுள்ள அ.தி.மு.க எம்.எல்.ஏ.க்களிடம் நேற்று எடப்பாடி பழனிசாமி ஆலோசனை நடத்தினார். இன்றும் அவர் எம்.எல்.ஏக்களைச் சந்தித்துப் பேச உள்ளார். இந்தச் சூழ்நிலையில், மயிலாப்பூர் எம்.எல்.ஏ ஆர்.நட்ராஜ், பெரும்பான்மை எங்கே இருக்கிறதோ, அந்த அணிக்கு ஆதரவு அளிப்பேன் என்று கூறியிருந்தார். நட்ராஜ் சொன்ன மாதிரி, எடப்பாடி பழனிச்சாமி அணிக்கே பெரும்பான்மை இருந்துவருகிறது. இந்நிலையில், பழனிச்சாமிக்கு எதிராக வாக்களிக்க உள்ளதாக எம்.எல்.ஏ நட்ராஜ் இன்று அறிவித்துள்ளார். 'மக்கள் விருப்பத்துக்கு ஏற்றார்ப் போல வாக்களிப்பேன். கட்சித் தாவல் சட்டத்தால் எனது எம்.எல்.ஏ பதவி போனாலும் எனக்குக் கவலை இல்லை' என்று நட்ராஜ் கூறியுள்ளார்.

நட்ராஜின் எதிர்ப்பின் மூலம் எடப்பாடி பழனிசாமி அரசுக்கு ஆதரவான எம்.எல்.ஏக்களின் எண்ணிக்கை 124-ல் இருந்து 123-ஆகக் குறைந்துள்ளது.

பிப்.24 ஜெ.பிறந்தநாள்:சுவர் மற்றும் ப்ளக்ஸ் பேனர் விளம்பரத்தில் உற்சாகமிழந்த அதிமுகவினர்: சுறுசுறுப்புக் காட்டும் திமுகவினர்

என்.முருகவேல்COMMENT  

Share

விக்கிரவாண்டி-தஞ்சை தேசிய நெடுஞ்சாலை பகுதியில் உள்ள வீராணம் நீரேற்று நிலைய வளாக சுற்றுச் சுவரில் திமுக ஸ்டாலின் பிறந்தநாள் சுவர் விளம்பரத்தில் ஈடுபட்டுள்ள திமுகவினர்

அதிமுக தலைவர்களின் பிறந்தநாள் விழாக்களை விமரிசையாகக் கொண்டாடவது அதிமுக தொண்டர்களின் வாடிக்கை. முன்னாள் முதல்வர் ஜெயலலிதா பிறந்தநாளை வெகுவிமரிசையாகக் கொண்டாடிவந்த அதிமுகவினர், அவர் மறைந்த நிலையில், அவரது பிறந்தநாளையும் மறந்து விட்டார்களோ என்று விமர்சிக்கும் நிலையில் அக்கட்சியின் அண்மைக் கால நிகழ்வுகள் அமைந்துள்ளது.

இன்னும் ஒருவார காலத்தில் ஜெயலலிதாவின் 69-வது பிறந்தநாள் பிப்.24-ம் தேதி வரவுள்ளது. பொதுவாக அவரது பிறந்தநாள் என்றால் அதிமுகவினர் கேக் வெட்டுவது, பொதுமக்களுக்கு இனிப்பு வழங்குவது, அன்னதானம் வழங்குவது,இலவச வேட்டி சேலை, தையல் இயந்திரம் உள்ளிட்டவை வழங்குவது வழக்கம். அதற்கு முன்னோட்டமாக பல்வேறு இடங்களிலும் ஜனவரி மாதம் முதலே சுவர் விளம்பரம் செய்வதிலும், ப்ளக்ஸ் பேனர் வைப்பதிலும், அன்னதானத்திற்காக சமையல் கலைஞர்களை முன்பதிவு செய்து கொள்வது, நன்கொடை வசூலிப்பது போன்ற செயல்களில் அதீத ஆர்வம் செலுத்துவது உண்டு. ஆனால் தற்போது அதுபோன்ற எந்த நடவடிக்கைகளிலும் அதிமுகவினர் ஈடுபடவில்லை.

எதிர்வரும் நாட்களிலும் அவர்களிடம் பரபரப்பான சூழலே காணப்படும் என்றேக் கூறப்படுகிறது. தற்போது எடப்பாடி பழனிச்சாமி முதல்வராக பதவியேற்றுக் கொண்டாலும், அவர் தனது பெரும்பான்மையை 15 தினங்களுக்குள் நிரூபிக்கவேண்டிய கட்டாயம் இருப்பதால், எம்எல்ஏ-க்களும், கட்சி நிர்வாகிகளும் அதில் தான் தீவிரம் காட்ட நேரிடம். அதேபோன்று எதிர்முகாமில் இருக்கும் ஓ.பன்னீர்செல்வத்துக்கும் இதே நிலை என்பதால், அவரது ஆதரவாளர்களும் ஜெ.

பிறந்தநாள் கொண்டாட்டத்தைக் காட்டிலும் பன்னீர்செல்வம் பிரச்சனையில் தான் கூடுதல் கவனம் செலுத்த நேரிடும் என்கின்றனர் அதிமுகவினர்

வடக்குத்து கிராமத்தைச் சேர்ந்த சுவர் விளம்பர ஓவியர் வடிவேல் கூறுகையில், பொங்கல் பண்டிகை முடிந்தவுடனேயே அதிமுக நிர்வாகிகள், எங்களுக்கு சுவர் விளம்பரத்திற்காக எங்களை புக் செய்துகொள்வர். தொடர்ந்து 1 மாத காலத்திற்கு எங்களுக்கு சுவர் விளம்பரப் பணி இருக்கும். அதைத்தொடர்ந்து ஸ்டாலின் பிறந்தநாளுக்கு சுவர் விளம்பரப் பணிகளை செய்வோம். ஆனால் இதுநாள் வரை அதிமுக நிர்வாகிகள் எங்களை தொடர்புகொள்ளவில்லை. மாறாக திமுகவினர் சுவர் விளம்பரப் பணியில் தீவிரம் காட்டிவருகின்றனர். இதற்குக் காரணம் ஸ்டாலின் செயல் தலைவர் என்ற கூடுதல் காரணமும் உண்டு. அதிமுகவில் நிலவும் அசாதாரண சூழலால் அக்கட்சியினர் ஜெயலலிதா பிறந்தநாளில் தீவிரம் காட்டவில்லை என நினைக்கிறேன் என்றார்.

இதுபோன்று ப்ளக்ஸ் பேனர் தொழில் செய்துவரும் குரு என்பவரு கூறுகையில், பிப்ரவரி மாதம் தொடங்கியது அதிமுக நிர்வாகிகள் ப்ளக்ஸ் பேனர் ஆர்டர் கொடுப்பது வழக்கம். ஆனால் இந்த ஆண்டு இதுவரை யாரும் தொடர்பு கொள்வில்லை. அதேபோன்று திமுகவிலும், பேனர் வைக்க அக்கட்சியின் செயல் தலைவர் கட்டுப்பாடுகள் விதித்திருப்பதால், அவர்கள் சுவர் விளம்பரத்திற்கு கொடுக்கும் முக்கியத்துவம் ப்ளக்ஸ் பேனருக்கு கொடுக்கவில்லை என்பதால், அவர்களும் ப்ளக்ஸ் பேனர் ஆர்டர் கொடுக்கவில்லை. எனவே எங்களுக்கு போதுமான வருமானம் இல்லை என்றார்.

விருத்தாசலம் அதிமுக ஒன்றிய செயலாளர் பழனிவேல்

இது தொடர்பாக அதிமுக விருத்தாசலம் ஒன்றிய அதிமுக செயலாளர் பழனிவேலுவிடம் கேட்டபோது, கட்சியின் சில கசப்பான சம்பவங்கள் நடைபெற்று இன்று தான்(நேற்று) ஒரு நல்ல முடிவு ஏற்பட்டுள்ளது.எனவே இதுநாள் வர சுணக்கத்தில் இருந்தோம். எடப்பாடியார் ஆட்சி அமைக்கவுள்ளார். தற்போது கட்சியின் துணைப்பொதுச்செயலாள்ர டி.டி.வி.தினகரன் என்ன உத்தரவிடுகிறாரோ அதன்படி மறைந்த முதல்வர் ஜெயலலிதா பிறந்தநாளை கொண்டாடுவோம். அப்படிக் கொண்டாடும்பட்சத்தில் கடந்த 10 ஆண்டுகளில் கொண்டாடியதைக் காட்டிலும் சிறப்பாகக் கொண்டாடுவோம்.

ஆட்சி, கட்சி இரண்டிலும் அசாதாரமான சூழல் காரணமாக அதிமுகவினர்

சுணக்கமாக இருந்துவரும் நிலையில், திமுகவின் செயல் தலைவராக ஸ்டாலின் நியமிக்கப்பட்டப் பின்னர் கொண்டாடப்படும் பிறந்தநாள் என்பதால், திமுகவினர் தொண்டர்கள் சுவர் விளம்பரத்தில் தீவிரம் காட்டிவருகின்றனர்.

வடக்குத்து கிராமத்தைச் சேர்ந்த ஓவியர் வடிவேல்

Post Comment

இந்தியாவில் பிறந்ததற்காகப் பெருமைப்படச் செய்யும் பெருமிதம் இது!

இந்தியாவுல வந்து ஏன்டா பொறந்தோம்னு நினைக்கிறீங்களா? இப்படிப்பட்ட எண்ணம் நம்மில் சிலருக்கு அவ்வப்போது வந்து போவது இயல்பு. அப்படிப்பட்டவர்களுக்காகத்தான் இந்த கருத்துக்கோவை.இந்தியாவில் பிறந்ததற்காகப் பெருமைப்படச் செய்யும் தருணம் இது!


இந்தியாவைப் பற்றி வெளிநாட்டு அறிஞர்கள் கூறிய கருத்துக்களின் தொகுப்பு இதோ உங்கள் பார்வைக்காக.... படித்துப் பார்த்தால் நிச்சயம் அசந்து போவீர்கள்.






உலகில் தோன்றிய நாகரிகங்களான கிரேக்க நாகரிகம், சுமேரிய நாகரிகம், எகிப்திய நாகரிகம், பாபிலோனிய நாகரிகம் முதலிய நாகரிகங்கள் எல்லாம் இன்றைக்கு உதிர்ந்து விட்டன. அவற்றின் சுவடுகளை நாம் அருங்காட்சியகங்களிலோ, பாடப்புத்தகங்களிலோ மட்டுமே காணலாம். ஆனால், இந்திய நாகரிகங்களான பஃறுளி ஆற்று நாகரிகம் (குமரிகண்டம்) மற்றும் சிந்து சமவெளி நாகரிகம் இன்றைக்கும் இந்தியாவில் தமிழர் பண்பாடு மற்றும் இந்து தர்மம் என்ற பெயரில் ஒரு வாழ்க்கை முறையாகவே இருந்துகொண்டிருக்கிறது என்றால், அதற்குக் காரணம் அதன் அழியாத உண்மைத் தன்மையும், விஞ்ஞான, மெய்ஞ்ஞான அடித்தளமுமே ஆகும்.


ஜெர்மனியைச் சேர்ந்த உலக வரலாற்றாசிரியர் மேக்ஸ்முல்லர் இந்தியாவைப் பற்றி சொல்வதைக் கேளுங்கள்...

''எந்த நாடு புராதன காலத்திலிருந்தே கல்வியறிவிலும், கலாசாரத்திலும் சிறந்து விளங்கியிருந்தது என்று என்னைக் கேட்டால், நான் இந்தியாவைத்தான் காட்டுவேன்.
நான் உலகம் முழுவதும் சுற்றி வந்து பார்த்ததில், உலகிலேயே சிறந்த செல்வமும், சக்தியும், அழகும், இயற்கையால் வழங்கப்பட்ட இடம் எதுவென்றால், அது இந்தியா தான்.

வானத்துக்குக் கீழ் முழு வளர்ச்சியடைந்த மனித மனமும், வாழ்க்கையின் மிக முக்கிய பிரச்னைகளுக்கெல்லாம் தீர்வுகளைக் கொண்டதாகவும் திகழும் ஓர் இடம் எது என்று என்னைக் கேட்டால், நான் உடனே இந்தியாவைக் காட்டுவேன். எந்த ஒரு இலக்கியம், மிகவும் சரியானதும், நம்முடைய அக வாழ்க்கைக்குத் தேவையானதும், மிகவும் பரந்த அனுபவங்களைக் கொண்டதும், எல்லாவற்றிற்கும் தகுதியானதும், உண்மையில் மனித வாழ்க்கையின் சரியான இலக்கியமானதும் எது என்று கேட்டால் மறுமுறையும் நான் இந்தியாவையே காட்டுவேன். அதற்கு ராமாயணம், மகாபாரதம் ஆகிய இரண்டு இதிகாசங்களுமே சான்று.



நான் மீண்டும் இந்த உலகத்தில் பிறக்க விரும்பவில்லை. அப்படிப் பிறந்துதான் ஆகவேண்டும் என்று ஆண்டவன் விரும்பினால், என்னை இந்தியாவில் அதிலும் தென்னிந்தியாவில், ஒரு இந்துவாகப் பிறக்கச் செய்யட்டும்."

- மேக்ஸ்முல்லர்



'இந்தியா எங்கள் மூதாதையர்களின் தாய்நாடு. சமஸ்கிருதம் எங்களுடைய ஐரோப்பிய மொழிகளுக்கெல்லாம் தாய்மொழி. மேலும், அவள் (இந்தியா) எங்கள் தத்துவங்களுக்கெல்லாம் தாய். கணித சாஸ்திரத்தின் மூலம் அவளே அரேபியர்களின் தாய். புத்தனை உருவாக்கியவள். கிராமப் பஞ்சாயத்து, சுயநிர்வாகம், மக்களாட்சி தத்துவத்துக்கும் தாயாவாள். பாரதத் தாய் பல வழிகளிலும் எங்களுக்குத் தாயாகிறாள்.

-வில் டொரண்ட், அமெரிக்க தத்துவஞானி.

'ஜப்பானிய எண்ணங்களையும், தத்துவங்களையும் படிப்பது, இந்தியத் தத்துவத்தைப் படிப்பதற்கு ஒப்பாகும்'.

-டாக்டர் டி.சுசுகி, ஜப்பானிய மேதை.

'இந்தியா தன்னுடைய கலாசாரத்தின் மூலம் ஜப்பானின் தாயாகிறாள். பல நூற்றாண்டுகளாக அவள் தன்னுடைய சொந்தக் கருத்துகள், தத்துவங்கள் மூலமாக ஜப்பானின் எண்ணத்திலும் கலாசாரத்திலும் ஆதிக்கம் செலுத்துகிறாள்.'
-எச்.நாக்கமூரா, ஜப்பானியப் பேராசிரியர்.

இயேசு கிறிஸ்து பிறப்பதற்கு பல நூற்றாண்டுகளுக்கு முன்னர் இங்கிலாந்திலுள்ள மனிதர்கள், தங்களுடைய ஆடையற்ற உடலில் பல வண்ணங்களைத் தீட்டிக் கொண்டு, காட்டுமிராண்டிகளாக காடுகளிலும், குகைகளிலும் வாழ்ந்தபோது, கீழை நாட்டிலுள்ள இந்தியர்கள் உயர்ந்த லட்சியங்களுடன் நாகரிக வாழ்க்கை வாழ்ந்து இருக்கின்றார்கள்.
-லார்டு மெக்காலே, இங்கிலாந்து அறிஞர்

இந்தியா தன்னுடைய மதம், கற்பனை, காவியங்கள் மூலம் சீனாவுக்கு குருவாகத் திகழ்ந்திருக்கிறது. மேலும், உலகத்துக்கே குருவாக, திரிகோண சமன்பாடு (Trigonometry) நாற்கோண சமன்பாடு, இலக்கணம், உச்சரிப்புக் கலை, சாஸ்திரம் ஆகியவற்றை வழங்கி இருக்கிறது.
லின் யூடாங், சீனப் பேரறிஞர், தன்னுடைய 'Wisdom of India' என்ற நூலில் இந்தியா ஒரு சிப்பாயைக்கூட தன் எல்லைக் கோட்டைத் தாண்டி அனுப்பாமலேயே சீனாவை 20 நூற்றாண்டுகளாக தன்னுடைய கலாசாரத்தின் மூலம் வென்றது. இந்த கலாசாரத் தாக்குதல் இந்தியாவில் தன்னுடைய அண்டை, அயல்நாட்டின் மீது ஏவப்பட்டதல்ல. எல்லாம் சுயமாக ஆராயப்பட்டு, சுயமாகக் கற்று, சுயமாக புனிதப் பயணம் இந்தியாவிற்கு மேற்கொள்ளப்பட்டு, சீனாவின் எல்லா பகுதிகளிலும் ஏற்றுக்கொள்ளப்பட்டது.
-ஹூஷி, சீனத் தத்துவ அறிஞர் மற்றும் ஆசிரியர்



இந்திய வேதங்களையும், இதிகாசங்களையும், புராணங்களையும் ஆராயும்போது எத்தனையோ விந்தையான வியக்கத்தக்க பறக்கும் இயந்திரங்களும் (விமானம்) அதிபயங்கரமான ஆயுதங்களும், அதை பிரயோகிக்கும் வழிமுறைகளும் காணப்படுகின்றன.
-எரிக்வன் டெனிகன், அமெரிக்க தத்துவஞானி

'மேற்கத்திய விஞ்ஞானிகளைவிட இந்திய விஞ்ஞானிகள் முதிர்ச்சி பெற்றவர்களாக இருந்தாலும் துரதிர்ஷ்டவசமாக அவர்கள் யதார்த்த வாழ்க்கைக்கு உதவாத மேற்கத்திய அறிவியலைப் பின்பற்ற முயற்சிக்கின்றனர். ஆயிரக்கணக்கான ஆண்டுகளுக்கு முன்பிருந்தே அறிவியல் மற்றும் ஞானத்தில் ஊறிப்போனவர்கள் இந்தியர்கள். மகாபாரதம், கீதை ஆகியவற்றில் இடம் பெற்றுள்ள விஞ்ஞானத் தத்துவங்களை இப்போதைய உலகிற்குப் பயன்படும் வகையில் நீங்கள் அறிவியலாக மாற்ற வேண்டும்.
-ரிச்சர்ட் எர்னெஸ்ட் , நோபல் பரிசு பெற்ற விஞ்ஞானி

'வருகின்ற காலத்தில் உலகை வியக்க வைத்து வழிநடத்திச் செல்லும் வல்லரசாக சீனா திகழும் என்கிறார்கள். இல்லை அது இந்தியா என்பதே எனது மதிப்பீடு"
-டாக்டர்.தாமஸ் கிளெஸ்டிஸ், ஆஸ்திரிய நாட்டு அதிபர்

வருகின்ற சில ஆண்டுகளில் இந்தியாவின்முகமே மாறிவிடும். கிராமத்து மக்கள் கூட, கூட்டமாக, கூட்டுறவு சொஸைட்டிகளின் மூலமாக எவ்வாறு முன்னேற முடியும் என்பதற்கு இந்தியா ஓர் உதாரணமாகத் திகழும்.
- அமெரிக்க முன்னாள் அதிபர் பில் கிளின்டன்,
(ராஜஸ்தானிலுள்ள நயோலா கிராமத்துக்கு விஜயம் செய்தபோது கூறியவை).

கோடி புண்ணியம் அருளும் குரு தரிசனம்! #PhotoStory

நவகிரகங்களில் பூரண சுப பலம் பெற்றவர் குருபகவான். தேவர்களுக்கு குருவான இவரை பிரகஸ்பதி என்றும், வியாழ பகவான் என்றும் அழைப்பர். சிவ வழிபாடு நீங்கலாக, கிரக நிலைகளால் ஏற்படும் தீய விளைவுகளில் இருந்து விடுபட வேண்டி குரு பகவானை (வியாழன்) வழிபாடு செய்வதும் அவசியம்.





ஜாதகத்தில் குரு தோஷம் இருப்பவர்கள், குருபகவானுக்கு உரிய பரிகாரங்களைச் செய்து வழிபட்டால், வாழ்வில் சுபிட்சம் உண்டாகும். அப்படிப்பட்ட குரு ஸ்தலங்கள் பற்றி இங்கே பார்ப்போம்.

குரு வீற்றிருந்த குருவித்துறை!




மதுரை மாவட்டம் சோழவந்தான் அருகே அமைந்துள்ளது குருவித்துறை. குருவின் பெயராலேயே அமைந்த தலம்; குரு பகவான் திருமாலின் அருள்பெற்ற தலம் இது. குரு வீற்றிருந்த துறை என்பதால், குருவிருந்த துறை என்ற பெயர் ஏற்பட்டு, அந்தப் பெயரே குருவித்துறை என்று ஊர்ப் பெயராக வழங்குகிறது.

பதவி உயர்வு தரும் திட்டை குரு பகவான்!

தஞ்சாவூர் அருகே அமைந்துள்ள திட்டை திருக்கோயிலில் அருள்பாலிக்கிறார் குரு பகவான். தேவகுருவான பிரகஸ்பதி, கிரகங்களில் ஒருவராக பதவி உயர்வு பெற்ற தலம் திட்டை. இவரை வழிபட்டால் பதவி உயர்வு கிடைக்கும் என்பது நம்பிக்கை.

ராஜ யோக அருளும் திருவேங்கைவாசல்!




புதுக்கோட்டைகீரனூர் சாலையில், அமைந்துள்ளது இந்தத் திருத்தலம். திருவேங்கைவாசலில் உள்ள இறைவன் புலியாக வந்து, காமதேனுவின் சாபம் நீங்கப் பெற்றதால் இறைவனின் திருநாமம் ஶ்ரீவியாக்ரபுரீஸ்வரர். இந்த தலத்தில் ஶ்ரீ தட்சிணாமூர்த்தி அபய வர ஹஸ்தங்களுடன், ஒரு கரத்தில் ருத்திராட்சமும் மற்றொரு கரத்தில் சர்ப்பமும் ஏந்தி காட்சி தருகிறார். இங்கு வந்து தட்சிணாமூர்த்தியை வழிபட்டால், குழந்தைகளின் ஞாபக சக்தி பெருகும்; தொழில் விருத்தியாகும் என்பது நம்பிக்கை.

ஸ்ரீ சிவயோக ஹரி குரு அருளும் திருவையாறு!




மகாவிஷ்ணுவுக்குக் குருவாக இருந்து ஸ்ரீ தட்சிணாமூர்த்தி வேதங்களை உபதேசித்த ஒப்பற்ற திருத்தலம், திருவையாறு ஸ்ரீ பஞ்சநதீஸ்வரர் திருக்கோயில். திருவீழிமிழலையில் கண்மலரிட்டு வழிபட்டு சக்கராயுதம் பெற்ற திருமால், வேதங்களின் பெருமைகளை உணர்ந்து, இந்தத் தலத்துக்கு வந்து ஸ்ரீ தட்சிணாமூர்த்தியிடம் உபதேசம் பெற்றாராம். இங்கு வந்து ஶ்ரீதட்சிணாமூர்த்திக்கு நெய் தீபம் ஏற்றி வழிபட்டால், சகல தோஷங்களும் நீங்கி சந்தோஷம் பெருகுவதாக பக்தர்கள் நம்பிக்கையுடன் சொல்கிறார்கள்.

ஶ்ரீ விநாயகருடன்....ஸ்ரீ தட்சிணாமூர்த்தி

புதுக்கோட்டையின் அருகிலேயே சிறப்புடன் அமைந்துள்ளது ஸ்ரீ பிரகதாம்பாள் திருக்கோயில். இந்த ஆலயத்தில் வீற்றிருக்கும் சிவனாரின் திருநாமம் ஸ்ரீ கோகர்ணேஸ்வரர்.





ஸ்ரீ குரு தட்சிணாமூர்த்தி. சிவனாரது சந்நிதியின் கோஷ்டத்தில் இருந்தபடி அருள்வதுதான் வழக்கம். ஆனால் இங்கே, விநாயகருக்கு அருகில் இருந்தபடி ஸ்ரீ தட்சிணாமூர்த்தி அருள்வது இத்தலத்தின் சிறப்பு. இங்கு வந்து ஶ்ரீதட்சிணாமூர்த்தியை வழிபட்டால், காரியத் தடைகள் நீங்கி, நினைத்த காரியங்கள் எல்லாம் கைகூடும் என்பது பக்தர்களின் நம்பிக்கை.

குருவின் சாபம் நீக்கிய கோயில்

விழுப்புரம் மாவட்டம் திண்டிவனம் அருகே உள்ள முன்னூற்று மங்கலத்தில் அமைந்துள்ளது ஶ்ரீஆடவல்லீஸ்வரர் திருத்தலம்.
குருவருள் இருந்தால்தான் திருவருள் கிடைக்கும் என்பார்கள். குருவான பிரகஸ்பதிக்கே சிவன், தேவியுடன் காட்சி தந்த தலம் இது. "இந்தத் தலத்திற்கு வரும் என்னுடைய அடியவர்களுக்கெல்லாம் குருவருளைத் தந்து வாழ வைப்பாயாக" என்று வாழ்த்தி அருளிய தலமாக போற்றப்படுகிறது.



இத்தலம் குரு யோகத்தைத் தரவல்லது: முன்னூர் தலத்திற்கு வருபவர்களின் வாழ்க்கையில் சீக்கிரம் நல்லவிதமான முன்னேற்றங்கள் உண்டாகும் என்பது நம்பிக்கை.


தொகுப்பு: லட்சுமணன்.ஜி

சசிகலா படித்த பள்ளி இப்போது எப்படி இருக்கிறது?



மறைந்த முதல்வர் ஜெயலலிதாவின் தோழியாக இருந்த சசிகலா, தற்போது சிறையில். அ.தி.மு.க கொள்கைப் பரப்புச் செயலாளராக ஜெயலலிதா இருந்தபோது, அவருக்கு அறிமுகமானவர் சசிகலா. வீடியோ கடை வைத்திருந்த சசிகலா, ஜெயலலிதா பேசும் பொதுக் கூட்டங்களை வீடியோவாகப் பதிவு செய்து அதை ஜெயலலிதாவுக்கு வழங்கி வந்தார். அப்படித்தான் ஜெயலலிதாவுக்கும் சசிகலாவுக்கும் பழக்கம் ஏற்பட்டது. காலப்போக்கில் இருவரும் நெருங்கிய தோழிகளாக மாறினர்.



எம்.ஜி.ஆர் இறந்தபோது, அவரது உடல் வைக்கப்பட்டிருந்த ராணுவ வாகனத்தில் ஜெயலலிதா அமர்ந்திருந்தார். அப்போது சிலர், ஜெயலலிதாவை வாகனத்தில் இருந்து கீழே தள்ளி விட்டனர். அந்தச் சம்பவம் காரணமாக, ஜெயலலிதா மிகுந்த மனஉளைச்சலில் இருந்தார். அந்தச் சமயத்தில் ஜெயலலிதாவுக்கு சசிகலா ஆறுதல் கூறித் தேற்றினார். இதனால் இருவருக்குள்ளும் நட்பு பலப்பட்டது. காலப் போக்கில் ஜெயலலிதாவின் வேதா இல்லத்திலேயே சசிகலா தங்கத் தொடங்கினார்.

ஒருகட்டத்தில் ஜெயலலிதாவுக்கும் சசிகலாவுக்கும் கருத்து வேறுபாடு ஏற்பட்டது. அப்போது ஜெயலலிதா, வேதா இல்லத்தில் இருந்து சசிகலா மற்றும் அவரது உறவினர்களை வெளியேற்றினார். பல கட்ட முயற்சிகளுக்குப் பின் ஜெயலலிதா மீண்டும் சசிகலாவைச் சேர்த்துக் கொண்டார். அப்போது சசிகலா விடுத்த அறிக்கை மிக முக்கியமானது. ''எனக்கு எந்தப் பதவி ஆசையும் இல்லை. எனது மீதிக் காலத்தில் அக்காவுக்குச் சேவை செய்து எனது வாழ்க்கையைக் கழிப்பேன். எந்தக் காலத்திலும் கட்சிப் பதவிக்கோ, வேறு எந்தப் பதவிக்கோ ஆசைப்படமாட்டேன்'' எனத் தெரிவித்திருந்தார். ஆனால், இப்போது முதல்வர் பதவியில் அமரும் முயற்சியில் ஈடுபட்டு, நீதிமன்றத் தீர்ப்பின் காரணமாக அதற்கும் வழியின்றி சிறை சென்றுவிட்டார் சசி.

சரி, சசிகலா என்ன படித்திருக்கிறார் என்று ஆராய்ந்தால், 10-ம் வகுப்பு பாஸ் செய்யவில்லை என்று தெரிய வந்துள்ளது. திருத்துறைப்பூண்டியில் 1954-ம் ஆண்டு ஏப்ரல் 18-ம் தேதி பிறந்த சசிகலா ஒன்று முதல் 5-ம் வகுப்பு வரை அங்குள்ள பஞ்சாயத்துப் பள்ளியில் படித்துள்ளார். 1959, ஜுன் 7-ம் தேதி பள்ளியில், அதாவது முதல் வகுப்பில் சேர்க்கப்பட்டிருக்கிறார் சசிகலா. பின்னர் 1965-ம் ஆண்டு ஜுன் 9-ம் தேதி 6-ம் வகுப்பில் இணைந்துள்ளார். ஆனால் 10-ம் வகுப்பு படிக்கும்போது படிப்பை நிறுத்தியுள்ளார். ஆனால் சர்டிஃபிகேட்டை 1975-ம் ஆண்டு ஆகஸ்ட் 14-ம் தேதிதான் வாங்கிச் சென்றுள்ளார்.



இந்தப் பள்ளி தமிழகத்தின் முக்கியப் பிரபலங்களை உருவாக்கியுள்ளது. முன்னாள் டிஜிபி ஏ.எக்ஸ்.அலெக்ஸாண்டர், ஐஏஎஸ் அதிகாரிகள் ராஜரத்தினம், இளங்கோவன் போன்றவர்கள் இங்குதான் படித்துள்ளனர். சசிகலா படிக்கும்போது இந்தப் பள்ளியில் 2,500 பேர் படித்து வந்துள்ளனர். இப்போது 280 ஆகக் குறைந்து விட்டதாம். 6-ம் வகுப்பில் தற்போது 6 பேர்தான் படிக்கின்றனர். 7-ம் வகுப்பில் 7 பேர், 8-ம் வகுப்பில் 5 பேர்தான் படித்து வருகின்றனராம். இப்படியே போனால் பிற்காலத்தில் பள்ளி மூடப்படும் நிலை ஏற்பட்டு விடும் என பெற்றோர்கள் அஞ்சுகின்றனர்.



பெரும்பாலும் தலித் வகுப்பைச் சேர்ந்தவர்களே இங்கு படிக்கின்றனர். அதனாலேயே அரசியல்வாதிகளும் இந்தப் பள்ளியைக் கண்டு கொள்வதே இல்லை என்று குறைபட்டுக் கொள்கின்றனர் அந்தப் பகுதிவாசிகள். 1914-ம் ஆண்டு கட்டப்பட்ட இந்தப் பள்ளியில் முறையான கழிவறை வசதி கிடையாது, குழந்தைகளுக்குத் தேவையான எந்த அடிப்படை வசதிகளும் செய்யப்பட்டிருக்கவில்லை. இது குறித்து, பள்ளி மாணவிகள் புகார் அளித்தாலும் யாரும் கண்டு கொள்வதுமில்லை.

தாய்மொழியான தமிழுக்குக்கூட இங்கு ஆசிரியர் இல்லை. கணக்கு , வரலாறு, வணிகவியல் போன்ற முக்கியப் பாடங்களுக்கும்கூட ஆசிரியர்கள் கிடையாது. இயற்பியல், வேதியியல், தாவரவியல் போன்ற பாடங்களுக்கு லேப் வசதியும் இல்லை. பல ஆண்டுகளாக இதே நிலைதான். பள்ளியின் பெற்றோர் - ஆசிரியர் கழகத்தினர்தான் தகுதியான இளம் ஆசிரியர்களைக் கொண்டு ஆசிரியர் இல்லாத பாடங்களுக்குப் பாடம் எடுக்க ஏற்பாடு செய்துள்ளனர். அவர்களுக்கு மாதம் ரூ. 3 ஆயிரம் சம்பளமும் கொடுக்கின்றனர்.

இதனால், கடந்த 3 ஆண்டுகளாக இந்தப் பள்ளியில் தேர்ச்சி விகிதம் மிகவும் குறைந்து போயிருக்கிறது. 12-ம் வகுப்பில் 41 சதவீதம் பேரும், 10-ம் வகுப்பில் 57 சதவீதம் பேருமே பாஸ் ஆகியுள்ளனர். இத்தனை ஆண்டு காலம் முதல்வர் ஜெயலலிதாவுடன்தான் சசிகலா இருந்தார். அப்போது, தான் படித்த பள்ளிக்கு ஏதும் செய்ய வேண்டுமென்று அவருக்குத் தோன்றவில்லை. இப்பொழுது சிறைக்கு வேறு சென்றுவிட்டார்... இனி எங்கே செய்யப் போகிறார்?

9 நாட்கள் ரிசார்ட் வாசம் முடிந்து திரும்பும் எம்.எல்.ஏக்களுக்கு தமிழகக் குடிமகனின் 11 கேள்விகள்! #VikatanExclusive


‘ஓட்டுப் போட்டாச்சுல்ல? அதோட உங்க வேலை முடிஞ்சது’ என்கிற தோரணையில்தான் இருக்கிறார்கள் எம்.எல்.ஏக்கள். 9-வது நாளாக கூவத்தூரில் குடிகொண்டிருந்தார்கள். அங்கே என்ன செய்கிறார்கள் என்பதைப் பற்றி நமக்குக் கவலையில்லை. ஆனால், அவர்கள் எங்கே இருந்துகொண்டு என்ன செய்துகொண்டிருக்க வேண்டியவர்கள் என்பதை ஒவ்வொரு தமிழனும் சிந்தித்துக் கொண்டுதான் இருப்பான்.

இதோ.. இன்னும் கொஞ்ச நேரத்தில் கூவத்தூர் ரிசார்ட்டில் இருந்து வெளியேறப் போகிறார்கள். ஆளுநர் எடப்பாடி பழனிச்சாமியை ஆட்சி அமைக்க அழைப்பு விடுத்திருப்பதால், வேறு வழியில்லை. வந்துதான் ஆகவேண்டும்.



ஆனால் ஒரு குடிமகனாக, நம்மிடம் சில கேள்விகள் இருக்கின்றன. அதற்கான பதில்களுடனும் அவர்கள் வந்தால்.. வரவேற்கலாம்.

எந்த வேலைக்குச் சேர்ந்தாலும், வேலை சார்ந்த நெறிமுறைகள் கொடுக்கப்படும். அப்படி உங்களுக்கு ஏதும் கொடுக்கப்பட்டதா? இப்படி இத்தனை நாள், பணியை விட்டு இருக்கலாம் என்று அந்த நெறிமுறைகளின் இண்டு இடுக்குகளில் எங்காவது எழுதப்பட்டிருக்கிறதா?

பத்திரிகையாளரின் கேள்விக்கு பதில் சொல்லும்போது, “எங்ககிட்ட 124 பேர் இருக்காங்க. அங்க 8 பேர்தான் இருக்காங்க. 124 பெரிசா 8 பெரிசா?” என்று கேட்கிறார் ஒரு அமைச்சர். நிச்சயம் 124 பெரிசுதான் சார். எதிரணி என்பதையெல்லாம் விடுங்கள். அடுத்த முறை ஓட்டு வேண்டும் அல்லவா? உங்கள் சொந்தத் தொகுதியில், உங்களுக்கு ஆதரவாக 8 மக்கள் இருக்கிறார்கள். எதிராக 124 மக்கள் இருக்கிறார்கள். இப்போது சொல்லுங்கள். 8 பெரிசா, 124 பெரிசா? ‘இல்லை... இந்த முறை முடிந்தவரை சம்பாதித்து விடுகிறோம். அடுத்த எலக்‌ஷனெல்லாம் அப்புறம்..” என்பீர்களானால்.. சொல்ல ஒன்றுமில்லை.

இதற்கு முன், உங்கள் முதல்வராக இருந்தவர் மக்களுக்கு எதிராக ஒரு முடிவெடுக்கும்போதோ, உங்கள் சொந்தத் தொகுதியின் முன்னேற்றத்திற்கு எதிராக ஒரு முடிவெடுக்கும்போதோ, இப்படி ஒற்றுமையாக, பலநாட்கள் நின்று போராடி அதை எதிர்த்திருக்கிறீர்களா?

நாங்கள் வேலைக்குச் சென்றால்தான் சம்பளம். இல்லையென்றால் Loss Of Payதான். குறிப்பிட்ட நாட்கள் மட்டும் Work From Home என்று பணிபுரியலாம். Work From Resort எல்லாம் சாத்தியமே இல்லை. நீங்கள் விடுதியில் இருந்த இத்தனை நாட்களுக்கான சம்பளத்தைப் பெற்றுக் கொள்வீர்களா? சம்பள ஸ்லிப்பை தொகுதி மக்களுக்குக் காட்டுவீர்களா? முழு சம்பளமும் பெறுவீர்கள் என்றால்.. அதை வாங்கும்போது கை கூசாதா உங்களுக்கு?

நீங்கள் ‘தொகுதி மக்களின் மேம்பாட்டுக்காக’ உழைத்துக் கொண்டிருந்த காலங்களில் எல்லாம் உங்கள் மனைவி, மகன், மகள்கள் ‘ஒருவாரம் எங்காவது டூர் போகலாம்’பா என்று அழைத்திருப்பார்கள்தானே. இப்படி இத்தனைநாள் நீங்கள் ரிசார்ட்டில் இருந்ததைப் பார்த்துக் கொண்டிருக்கும் அவர்கள், என்னவெல்லாம் நினைத்திருப்பார்கள் என்று நீங்கள் எண்ணிப்பார்த்தீர்களா?

எங்களுக்கெல்லாம் ஒட்டுமொத்தமாக ஒருவாரம் விடுமுறை கிடைத்தாலும், குடும்பத்தோடு இருந்தாலும் அவ்வப்போது செய்யும் வேலைகுறித்த சிந்தனை ஓடிக்கொண்டிருக்கும். ‘திரும்ப அலுவலகம் செல்லும்போது இதையெல்லாம் செய்யவேண்டும்’ என்று குறிப்பெடுத்துக் கொள்வோம். அப்படி நீங்கள் இருந்த இத்தனை நாட்களில், உங்கள் தொகுதிக்கு இதை இதையெல்லாம் செய்யவேண்டும் என்று எதுவும் திட்டம் தீட்டினீர்களா?

இன்னமும் எம்.ஜி.ஆர்.தான் உங்கள் USP. அவர் பெயரைச் சொல்லிக்கொண்டுதான் கட்சி நடத்திக் கொண்டிருக்கிறீர்கள். தவறொன்றுமில்லை. அவர் பொதுச்செயலாளராக இருந்த இடத்தில் சசிகலா பெயரை முன்மொழிந்து தீர்மானம் நிறைவேற்றும்போது உங்களுக்கு எப்படி இருந்தது? சரி.. அதையும் விடுங்கள். நீங்கள் தேர்ந்தெடுத்த பொதுச்செயலாளர், துணைப் பொதுச்செயலாளர் என்று ஒருவர் பெயரை அறிவித்திருக்கிறாரே.. அப்போது என்ன நினைத்தீர்கள்? ‘அவர் கட்சிக்குச் செய்த தியாகங்களைச் சொல்லுங்கள்’ என்று யாரும் கேட்டால் ஒரு நாலு விஷயங்களைச் சொல்ல முடியுமா?

இந்தக் கூவத்தூர் கூத்தெல்லாம் முடிந்து தொகுதி பக்கம் எட்டிப்பார்க்கத்தானே வேண்டும்? அதைப் பற்றிச் சிந்தித்தீர்களா? அப்படி செல்லும்போது மக்களை நேர்மையாக அவர்கள் இடத்தில் சென்று பார்க்கும் எண்ணம் உண்டா? பார்க்கும்போது அவர்கள் என்னென்ன கேள்வி கேட்பார்கள் என்று யூகித்து வைத்திருப்பீர்கள். அவற்றிற்கெல்லாம் பதில் இருக்கிறதா உங்களிடம்?

வழக்கமாக இப்படி வேலைகள் தவிர்த்து அலுவலகம் விட்டு இத்தனைநாட்கள் இருந்தபிறகு, மீண்டும் அலுவலகம் வரும்போது இரட்டிப்பு சுறுசுறுப்புடன் இருப்போம். அதேபோல, இத்தனை நாட்கள் ஓய்வெடுத்துக் கொண்ட நீங்கள் அடுத்த நான்காண்டுகளுக்கு தொகுதி மக்களுக்காக அல்லும் பகலும் அயராது பாடுபடுவீர்கள் என எதிர்பார்க்கலாமா?

போன பத்தியைப் படிக்கும்போதே, ‘நாங்கள் ஓய்வெடுத்தோம் என்று யார் சொன்னது? தொகுதி வேலைகள் நடந்து கொண்டுதான் இருந்தன’ என்று நீங்கள் நினைத்தீர்களா? சரி... நீங்கள் இல்லாமலே நடக்கிறதென்றால்.. அப்புறம் நீங்கள் எதுக்கு?

கடைசியாக ஒன்றே ஒன்று: ரிசார்ட்டில் வேளா வேளைக்குச் சாப்பிட்டீர்களா?

சசிகலாவின் சக்ஸஸ் திட்டம்!  - எடப்பாடி பழனிச்சாமி  எதிர்கொள்ளும் சவால்கள்

எடப்பாடி பழனிச்சாமியை முதல்வராக்க சசிகலா வகுத்த திட்டம் சக்ஸஸாகி விட்டது. அடுத்து, வரும் சசிகலாவின் அதிரடி முடிவு எடப்பாடி பழனிச்சாமிக்கு சிக்கலை ஏற்படுத்தலாம் என்று எதிர்பார்க்கப்படுகிறது.



ஜெயலலிதாவின் மறைவுக்குப்பிறகு முதல்வராக ஓ.பன்னீர்செல்வம் தேர்ந்தெடுக்கப்பட்டார். அப்போது முதல்வராகும் ஆசை ஓ.பன்னீர்செல்வத்துக்கு இல்லை. அதேபோல், சசிகலாவின் தேர்வாகவும் எடப்பாடி பழனிச்சாமியே இருந்தது. ஆனால் அதற்கான சூழ்நிலை இல்லாததால் ஓ.பன்னீர்செல்வம் தலைமையில் புதிய அமைச்சரவை உடனடியாக பதவி ஏற்றது. ஜெயலலிதா, சிறைக்குச் சென்றபோது, முதல்வரானார் ஓ.பன்னீர்செல்வம். இது அவரது திறமைக்கு கிடைத்தது அல்ல. விசுவாசத்துக்கு கொடுக்கப்பட்ட பரிசு. ஆனால் அந்த விசுவாசத்தை ஓ.பன்னீர்செல்வம் கடைசிவரை சசிகலாவிடம் காட்டவில்லை. இதனால் சசிகலாவும், அவரது குடும்பத்தினரும் பன்னீர்செல்வத்தின் மீது அதிருப்தியடைந்தனர்.

ஜெயலலிதா உயிரோடு இருந்தகாலம் வரை நம்பிக்கையுள்ளவராக இருந்த பன்னீர்செல்வத்தின் நடவடிக்கைகள் அவரது மறைவுக்குப்பிறகு மாறியது. இதுதொடர்பாக பன்னீர்செல்வத்திடம் அவரது அரசியல் வழிகாட்டியான தினகரன் விசாரித்தார்.
சொத்துக்குவித்து வழக்கில் ஜெயலலிதா, சசிகலா, இளவரசி, சுதாகரன் ஆகியோர் நீதிபதி குன்ஹாவின் தீர்ப்பில் சிறைக்கு சென்றபோது, முதல்வரான ஓ.பன்னீர்செல்வம் மற்றும் அவருக்கு நெருக்கமானவர்கள் பலவகையில் ஆதாயம் அடைந்தனர். இந்தத் தகவலை ஜெயலலிதாவிடம் சொன்னபோது, ஓ.பன்னீர்செல்வத்திடம் விசாரணை நடத்தப்பட்டது. விசாரணை முடிவில் பன்னீர்செல்வம் மன்னிப்பு கேட்டதோடு சில வாக்குறுதிகளையும் கொடுத்தார். அந்த வாக்குறுதி அடிப்படையில் பன்னீர்செல்வத்தின் நெருக்கமானவர்கள் மீது நடவடிக்கைகள் பாய்ந்தன. இதன்காரணமாக கடந்த சட்டசபை தேர்தலில் கூட ஓ.பன்னீர்செல்வத்துக்கு சீட் கொடுக்கக்கூடாது என்று ஜெயலலிதாவிடம் வாதிட்டனர் சசிகலா தரப்பு. ஆனால் ஜெயலலிதா, பன்னீர்செல்வத்துக்கு சீட் கொடுக்கவில்லை என்றால் தேவையில்லாத சர்ச்சைகள் ஏற்பட வாய்ப்புள்ளது என்று கருதி சீட் கொடுத்தார்.சசிகலாவின் அறிவுறுத்தலின்படி தான் நத்தம் விஸ்வநாதனுக்கும், வேறு ஒரு தொகுதியில் போட்டியிட வைத்தார் ஜெயலலிதா.

ஜெயலலிதா மறைவுக்குப்பிறகு பன்னீர்செல்வம் முதல்வரானதும் தன்னிட்சையாக செயல்படத் தொடங்கினார். குறிப்பாக மத்திய அரசின் கைப்பாவையானார். அ.தி.மு.க.வை உடைக்க வேண்டும் என்று பா.ஜ.க., பன்னீர்செல்வத்துக்கு அசைமென்ட் கொடுத்தாக சொல்லப்படுகிறது. அதன்படி ராஜினாமா செய்து இரண்டு நாள்களுக்குப் பிறகு திடீரென சசிகலாவின் மீது பகிரங்க குற்றச்சாட்டை தெரிவித்தார். பிறகு சசிகலாவிடமிருந்து கட்சியையும், எம்.எல்.ஏ.க்களையும் பிரிக்க பன்னீர்செல்வத்துக்கு பா.ஜ.க. பலவகையில் உதவியது. இது எல்லாம் தெரிந்த சசிகலா, ராஜதந்திரியாக செயல்படத் தொடங்கினார் என்று அவரது சக்ஸஸ் திட்டம் குறித்து விவரித்தார் கட்சியின் மூத்த நிர்வாகி ஒருவர், "எதிரணியிலிருந்த பன்னீர்செல்வத்துக்கு பதிலடி கொடுக்கும் வகையில் பல வியூகங்களை அமைத்தார் சசிகலா. அதாவது, பன்னீர்செல்வத்தின் பலம், பலவீனம் என அனைத்தையும் அறிந்த சசிகலா, அதற்கேற்ப காயை நகர்த்தத் தொடங்கினார். சசிகலாவுக்கு செக் வைக்கும் வகையில், சொத்துக்குவிப்பு வழக்கில் தீர்ப்பு வெளியிடப்பட்டது. சிறைக்குச் செல்வதற்கு முன்பு எம்.எல்.ஏ.க்கள் அனைவருக்கும் கூவத்தூரில் மூன்று நாட்கள் ஆலோசனை என்ற பெயரில் பாடமே எடுத்தார்.

அதில் பன்னீர்செல்வத்தின் துரோகம் குறித்து விளக்கமாக கூறினார். மேலும், தற்போதைய அரசியல் சூழ்நிலை குறித்தும் விவரித்தார். இந்த நேரத்தில் பா.ஜ.க.வின் தொடர்பில் இருந்தவர்களும், பன்னீர்செல்வத்துடன் நெருக்கமாக இருந்தவர்கள் மட்டுமே அணி மாறினர். ஆனால் மற்ற அனைவரும் சசிகலாவுக்கு முழுமையாக ஆதரவு தெரிவித்தனர். கூவத்தூரில் எம்.எல்.ஏ.க்கள் சிறைப்பிடித்து வைக்கப்பட்டு இருப்பதாகவும் தகவலை பன்னீர்செல்வம் அணி பரப்பியது. இருப்பினும் சுயவிருப்பத்தோடு தங்கி இருப்பதாக சசிகலா ஆதரவு எம்.எல்.ஏ.க்கள் தெரிவித்தனர்.




இதற்கிடையில் பன்னீர்செல்வத்துக்கு உதவிக்கரத்தை நீட்டினார் தென்மாவட்டத்தைச் சேர்ந்த வி.வி.ஐ.பி. ஒருவர். அவர் மூலம் எம்.எல்.ஏ.க்களிடம் பேரம் பேசப்பட்டது. ஆனால் அதற்கு எல்லாம் ராணுவக்கட்டுப்பாடோடு செயல்படும் ஜெயலலிதா, சசிகலாவின் விசுவாசிகள் செல்லவில்லை. ஆளுநருக்கும் அழுத்தம் கொடுக்கப்பட்டதால் ஆட்சி அமைக்க அழைப்பு விடுப்பதில் காலதாமதமானது. எத்தகைய இடர்பாடுகள் ஏற்பட்டாலும் ஒற்றுமையுடன் சசிகலாவுக்கு எம்.எல்.ஏ.க்கள் ஆதரவு தெரிவித்தனர்.

சிறைக்கு செல்வதற்கு முன்பு சசிகலா, கூவத்தூரில் தங்கி இருந்த எம்.எல்.ஏ.க்களிடம் தனித்தனியாக சந்தித்துப் பேசினார். அப்போது 'எம்.எல்.ஏ.க்களிடம் நீங்கள் எடுக்கும் முடிவு கட்சிக்கு மட்டுமல்ல, ஆட்சிக்கும் சாதகமாக இருக்க வேண்டும். பன்னீர்செல்வத்தைப் போல நீங்கள் யாரும் துரோகம் செய்ய மாட்டீர்கள் என்று நம்புகிறேன். ஏனெனில் உங்களில் பலருக்கு என்னுடைய சிபாரிசு பெயரில்தான் சீட் கொடுக்கப்பட்டதை யாரும் மறக்க மாட்டீர்கள். பன்னீர்செல்வத்தை நாம் சமாளித்துக் கொள்ளலாம். அதே நேரத்தில் அ.தி.மு.கவை அழிக்க தி.மு.க. தயாராக இருக்கிறது. மெஜாரிட்டி இல்லாமல் போனால் பன்னீர்செல்வம், தி.மு.க. உதவியுடன் ஆட்சி அமைக்க வாய்ப்பு ஏற்படும். அப்போது பன்னீர்செல்வத்தின் அதிகார பலத்தால் நமக்கு என்ன வேண்டும் என்றாலும் நிகழலாம். அதற்கு முற்றுப்புள்ளி வைக்க நமக்குள் இருக்கும் ஒற்றுமையை தாரக மந்திரமாக மனதில் வைத்திருங்கள். உங்களுக்கு வழிகாட்ட டி.டி.வி. தினகரன துணை பொதுச் செயலாளராக நியமிக்கிறேன். அவரது வழிகாட்டுதலின் பேரில் எடப்பாடி பழனிச்சாமி செயல்படுவார். அவரது தலைமையில் அக்காவின் ஆசியோடு இன்னும் நான்கரை ஆண்டுகள் அ.தி.மு.க. ஆட்சி தொடர வேண்டும். அக்கா இல்லாத இந்த நேரத்தில் மக்கள் பணியை சிறப்பாக செய்தால் மட்டுமே தொடர்ந்து மூன்றாவது முறையாக ஆட்சி அமைக்க முடியும்' என்று கண்கலங்கினார். அடுத்து எம்.எல்.ஏ.க்கள் அனைவரின் விருப்பத்துக்கு ஏற்ப உறுதி கொடுத்தார் சசிகலா.

சசிகலாவின் உருக்கமான பேச்சும், அவரது வாக்குறுதியும் எம்.எல்.ஏ.க்களின் மனநிலையை மாற்றியது. இதன்பிறகே போலீஸார் விடுதிக்குள் விசாரித்த போதும் தைரியமாக பெண் எம்.எல்.ஏ.க்கள் உள்பட அனைவரும் ஒரே பதிலைச் சொன்னார்கள். இதனால் போலீஸாராலும் எதுவும் செய்ய முடியவில்லை. சொத்துக்குவிப்பு வழக்கில் தீர்ப்பு வந்ததும் புதிய அ.தி.மு.க சட்டசபைத் தலைவராக எடப்பாடி பழனிச்சாமியை தேர்வு செய்தார் சசிகலா. சசிகலா, எடப்பாடி பழனிச்சாமி ஆகியோரை மிரட்ட கூவத்தூர் போலீஸ் நிலையத்தில் ஆள்கடத்தல், மிரட்டுதல், சிறைப்பிடித்தல் என்ற பிரிவுகளில் வழக்கும் பதிவு செய்யப்பட்டது. புகார் கொடுத்த சரவணன் எம்.எல்.ஏ.க்கு உண்மை என்ன என்று தெரியும். 15 நாட்கள் மெஜாரிட்டியை நிரூபிக்க வேண்டும் என்று ஆளுநர் தெரிவித்துள்ளார். அதற்கு முன்பாகவே மெஜாரிட்டியை நிரூபித்து விடுவோம். பள்ளிக்கல்வித்துறை அமைச்சராக இருந்த மாஃபா.பாண்டிராஜன் பன்னீர்செல்வம் அணிக்கு சென்றதால் அந்த பதவிக்கு செங்கோட்டையன் நியமிக்கப்பட்டுள்ளார். செங்கோட்டையனை சரிகட்டவே , அவருக்கு அமைச்சர் பதவி வழங்கப்பட்டுள்ளது" என்றார்.

மெஜாரிட்டி நிரூபிக்கப்பட்டு ஆட்சி தொடரும் சமயத்தில் இன்னொரு திட்டமும் சசிகலாவிடம் இருக்கிறது. டி.டி.வி. தினகரன், தேர்தலில் போட்டியிட்ட பிறகு அவருக்கு முக்கிய பதவி வழங்கவும் முடிவு செய்யப்பட்டுள்ளது. அப்போது முதல்வர் எடப்பாடி பழனிச்சாமிக்கு சிக்கல் ஏற்படும். மேலும் மெஜாரிட்டியை நிரூபித்தால் மட்டுமே எடப்பாடி பழனிச்சாமி ஆட்சியை தொடர முடியும். அதற்கு செக் வைக்கும் வகையில் பன்னீர்செல்வம் தரப்பு சதுரங்க வேட்டையைத் தொடங்கி விட்டது. பன்னீர்செல்வம் அணியில் உள்ள மைத்ரேயன் எம்.பி. டெல்லிக்கு சென்று தேர்தல் ஆணையரை சந்தித்து முக்கியத் தகவல்களை தெரிவித்துள்ளார். அந்தத்தகவலில் சசிகலா, பொதுச் செயலாளராக தேர்வு செய்யப்பட்டது செல்லாது என்றும், அவருக்கு கட்சியில் யாரையும் நீக்கவும், நியமிக்கவும் அதிகாரமும் இல்லை. மேலும் அ.தி.மு.க.வில் பெரும்பாலான தொண்டர்கள் எங்களுக்கு ஆதரவு அளித்து வருகின்றனர் என்று தெரிவித்துள்ளதாக தகவல் உள்ளது. இவ்வாறு பன்னீர்செல்வம் வைக்கும் செக்கை சமாளித்து எடப்பாடி பழனிச்சாமி ஆட்சியை தொடர வேண்டிய கட்டாயத்தில் இருக்கிறார்.

பெங்களூரு சிறையில் சசிகலாவுக்கு அடுத்த அறையில் ‘சயனைடு’ மல்லிகா!

பெங்களூரு சிறையில் சசிகலா பக்கத்து அறையில் 'சயனைடு ' மல்லிகா என்ற பெண் கைதி உள்ளார். ஆறு பெண்களை கொலை செய்த வழக்கில் கைது செய்யப்பட்டு நீண்ட காலமாக இவர் சிறையில் அடைக்கப்பட்டுள்ளார்.



சொத்துக்குவிப்பு வழக்கில் 4 ஆண்டுகள் தண்டனை பெற்றிருக்கும் சசிகலா நேற்று பெங்களூரு பரப்பன அக்ரஹார சிறையில் அடைக்கப்பட்டார்.. நீதிபதி அஷ்வத் நாராயணா முன்பு ஆஜர் படுத்தப்பட்ட சசிகலாவிடம் நீதிபதி சில விஷயங்களைக் கேட்டார். ‘அபராதத் தொகை கட்டுகிறீர்களா’ எனக் கேள்வி எழுப்பினார்.' சொத்துக்கள் வழக்கில் இருப்பதால் இப்போது கட்டவில்லை' என அவரது வழக்கறிஞர்கள் பதில் அளித்தனர். சில ஆவணங்களில் கையொப்பமிட்ட பின்னர் சசிகலா பத்துக்கு பன்னிரெண்டு அளவுள்ள சிறிய அறையில் அடைக்கப்பட்டார்.

விமானத்தில் செல்லாமல் காரிலேயே பெங்களூரு வரை பயணித்ததால் சோர்வாக இருந்த சசிகலாவுக்கு ரத்த அழுத்தம் அதிகரித்துள்ளது. சோகமாகவும் காணப்பட்டுள்ளார். நேற்றிரவு சிறையில் சசிகலா உணவுக்குப் பின், கொஞ்சம் பழங்களையும் சாப்பிட்டுள்ளார். தொடர்ந்து மாத்திரைகள் மற்றும் சில ஆயுர்வேத மருந்துகளையும் எடுத்துக் கொண்டுள்ளார்.

சசிகலா இருக்கும் அறைக்கு அடுத்த அறையில்தான் 'சயனைடு' மல்லிகா என்ற பயங்கரமான பெண் கைதி உள்ளார். இவரது இயற்பெயர் கெம்பம்மா. கொலை செயல்களில் ஈடுபட்டு பல ஆண்டு காலமாக இவர் சிறையில் அடைக்கப்பட்டுள்ளார். சயனைடு கலந்து பெண்களை கொலை செய்திருக்கிறார். அதனால்தான் பெயருடன் அடைமொழியாக சயனைடு சேர்ந்துள்ளது. கர்நாடகாவில் இவர் மீது பல கொலை வழக்குகள் உள்ளன.



கெம்பம்மா தொடக்கத்தில் சிட்பண்ட் பிசினசில் ஈடுபட்டார். அதில் நஷ்டம் ஏற்பட்டுவிட, அவரது கணவர் கெம்பம்மாவை விட்டு விட்டு ஓடி விட்டார். பணம் போட்டவர்களுக்கு கெம்பம்மாவால் பதில் சொல்ல முடியவில்லை. தொடர்ந்து 1999-ம் ஆண்டு முதல், குற்றச் செயல்களில் ஈடுபடத் தொடங்கினார். பெங்களூரு அருகேயுள்ள கோயில் ஒன்றின் பக்தை இவர். அந்தக் கோயிலுக்கு வரும் பக்தைகளின் கஷ்டத்தை அவர்களிடம் பேசி தெரிந்து கொள்வார்.

ஆறுதலளிக்கும் விதத்தில் அவர்களிடத்தில் பேசுவார். நம்பும் அப்பாவி பெண்களிடம் கோயிலில் சிறப்பு பூஜை நடத்தினால் எல்லாம் சரியாகி விடும் எனக் கூறுவார். அதற்குத் தனியாக வர வேண்டும் என்பார். அப்படி வரும் பெண்களுக்கு சயனைடு கலந்த தண்ணீரை கொடுத்து, கொலை செய்து, நகைகளைக் கொள்ளையடித்துச் சென்று விடுவார். ஆறு பெண்களை மல்லிகா கொலை செய்துள்ளார். சயனைடு கலந்து கொலைசெய்ததால், இவர் ‘சயனைடு மல்லிகா’ என்று அழைக்கப்பட்டார். இவருக்கு மரண தண்டனை விதிக்கப்பட்டு பின்னர் ஆயுள் தண்டனையாக குறைக்கப்பட்டது.

கடந்த முறை சசிகலா, ஜெயலலிதா சிறையில் அடைக்கப்பட்ட போதும் மல்லிகா சிறையில்தான் இருந்தார். அப்போது ஜெயலலிதாவைச் சந்திக்க சயனைடு மல்லிகா ஆசைப்பட்டார். ஆனால், சிறைத்துறை அதிகாரிகள் அதற்கு மறுப்பு தெரிவித்து விட்டனர். தற்போது சசிகலா அறைக்கு அருகே உள்ள அறையில் சயனைடு மல்லிகா இருக்கிறார்.

அதே வேளையில், சசிகலாவுக்கு அறை மாற்றம் நிகழவும் வாய்ப்புகள் உள்ளன. சசிகலா வருமான வரி கட்டுவதற்கான ஆவணங்களை காட்டினால் அவருக்கு முதல் வகுப்பு வழங்கப்படலாம். முதல் வகுப்பு அறையில் ஒரு மின்விசிறி, படுக்கை, தனிக்கழிவறை வசதி இருக்கும். தினமும் 2 செய்தித்தாள்கள் வழங்கப்படும். வாரந்தோறும் இரு முறை அசைவ உணவு வழங்கப்படும். காலை உணவாக சப்பாத்திக்கு அரை லிட்டர் சாம்பார், கால் லிட்டர் தயிர் கிடைக்கும். மதிய உணவாக சாதம், சப்பாத்தி , ராகி இவற்றில் ஏதாவது ஒன்றை தேர்வு செய்து சாப்பிட்டுக் கொள்ளலாம். இரவு உணவாக சப்பாத்தி வழங்கப்படும்.