பாகனை பந்தாடி கொன்றது யானைசமயபுரம் கோவில் நடை அடைப்பு

Added : மே 25, 2018 23:51 |




திருச்சி, சமயபுரம் மாரியம்மன் கோவில் யானை துாக்கி வீசி மிதித்ததில், பாகன் பரிதாபமாக உயிரிழந்தார். அதிர்ச்சியில், கோவில் வளாகத்தில் இருந்து சிதறி ஓடிய, எட்டு பக்தர்கள், காயமடைந்தனர்.திருச்சி, சமயபுரம் மாரியம்மன் கோவிலுக்கு, 2016ல், ஜெயலலிதா ஆட்சியில், மசினி என்ற பெண் யானை வழங்கப்பட்டது.இந்த யானை, நேற்று காலை, கோவில் நடை திறந்தவுடன், கோவில் வளாகத்துக்குள் நிறுத்தப்பட்டிருந்தது.

 ஸ்ரீரங்கத்தைச் சேர்ந்த கஜேந்திரன், 44, என்ற பாகன் உடன் இருந்தார். வெள்ளிக் கிழமை என்பதால், கூட்டம் அதிகம் இருந்தது.காலை, 10:30 மணியளவில், மசினி, பாகனின் கட்டளைகளுக்கு கட்டுப்படாமல் முரண்டு பிடித்துள்ளது. யானையை கட்டுப்படுத்த முயன்ற போது, திடீரென அங்கும், இங்கும் ஓடத் துவங்கிய யானை, பாகனை துாக்கி வீசியது.சுருண்டு விழுந்த பாகனை, கால்களால் தொடர்ந்து மிதித்து, துவம்சம் செய்தது. இதில், பாகன் உயிரிழந்தார். இதைப் பார்த்த அதிர்ச்சியில், தரிசனம் செய்ய காத்திருந்த பக்தர்கள் பயந்து, கோவில் வளாகத்தில் இருந்து அவசர, அவசரமாக வெளியேற முயன்றனர். அப்போது ஏற்பட்ட நெரிசலில், எட்டு பேர் காயமடைந்தனர்.கால்நடை டாக்டர்கள் மற்றும் பயிற்சி பெற்ற பாகன்கள் வந்து, ஒரு மணி நேர போராட்டத்துக்கு பின், மசினியை கட்டுப்படுத்தினர்.

கால்நடை மருத்துவ இணை இயக்குனர் முருகன் கூறுகையில், ''ஆண் யானைக்குத் தான் மதம் பிடிக்கும்; மசினி பெண் யானை என்பதால், மதம் பிடிக்க வாய்ப்பு இல்லை. யானை கோபப்பட்டதால் தான், விபரீதம் ஏற்பட்டுள்ளது. சாந்தப்படுத்தப்பட்ட யானை, கால்நடை டாக்டர்களின் கண்காணிப்பில் உள்ளது,'' என்றார்.நேற்று காலை 11:00 மணிக்கு, சமயபுரம் கோவிலின் நடை சாத்தப்பட்டு, பக்தர்கள் தரிசனத்துக்கு அனுமதிக்கப்படவில்லை.லால்குடி, ஆர்.டி.ஓ., பாலாஜி, ''முரண்டு பிடித்த யானை, கட்டுக்குள் கொண்டு வரப்பட்டுள்ளது. இரவு தான், கோவிலில் இருந்து யானை கொட்டிலுக்கு கொண்டு செல்லப்படும். அதன் பின், பரிகார பூஜைகள் செய்து, சனிக்கிழமை கோவில் நடை திறக்கப்படும்,'' என்றார்.தப்பிய அமைச்சர்யானை மிரண்டு, பாகனை மிதித்த சம்பவம் நிகழ்வதற்கு, 15 நிமிடங்களுக்கு முன், தமிழக வேளாண் துறை அமைச்சர் துரைக்கண்ணு, கோவிலுக்கு வந்து சென்றுள்ளார். அவர் சென்ற பின், யானை மிரண்டு, பாகனை மிதித்துக் கொன்றுள்ளது.

அதிகாரி காருக்கு கட்டணம் கேட்ட டோல்கேட் ஊழியருக்கு 'பளார்'

Added : மே 25, 2018 23:14 
 
பெரம்பலுார், பெரம்பலுார் அருகே, ஐ.ஏ.எஸ்., அதிகாரி காருக்கு சுங்கக்கட்டணம் கேட்ட செக்யூரிட்டியை, தாசில்தார் கன்னத்தில் அறைந்ததால், கட்டணம் வசூலிக்காமல் சுங்கச்சாவடி ஊழியர்கள் போராட்டத்தில் ஈடுபட்டனர்.தமிழக அரசு கேபிள் டிவி நிர்வாக இயக்குனர் குமரகுருபரன். இவர், திருச்சியிலிருந்து, சென்னைக்கு நேற்று முன்தினம் காரில் சென்றார். இரவு, 10:00 மணிக்கு, திருச்சி - சென்னை தேசிய நெடுஞ்சாலையில், பெரம்பலுார், திருமாந்துறையில் உள்ள சுங்கச்சாவடியை கடந்தபோது, இவரது காருக்கு சுங்கச்சாவடி ஊழியர் கட்டணம் கேட்டுள்ளார். இதற்கு, குமரகுருபரன், ஐ.ஏ.எஸ்., அதிகாரியான தனக்கு கட்டணம் கிடையாது என தெரிவித்துள்ளார். இதற்கு, சுங்கச்சாவடி ஊழியர் முதலில் மறுப்பு தெரிவித்து, பின், அலுவலகத்தில் கேட்டபின், அதிகாரியை கட்டணம் வசூலிக்காமல் அனுப்பி வைத்ததாக தெரிகிறது.இதுகுறித்து தகவலறிந்த, அரசு கேபிள் டிவி, பெரம்பலுார் தாசில்தார் பாலசுப்ரமணியன் மற்றும் வேப்பந்தட்டை தாசில்தார் சரவணன் ஆகிய இருவரும் சம்பவ இடத்துக்கு சென்று, சுங்கச்சாவடி ஊழியர்களிடம் விளக்கம் கேட்டுள்ளனனர்.அப்போது தாசில்தார் சரவணன், சுங்கச்சாவடி செக்யூரிட்டி காசிநாதனை கன்னத்தில் அறைந்துள்ளார். இதனால், ஆத்திரமடைந்த சுங்கச்சாவடி ஊழியர்கள் வேலை நிறுத்தத்தில் ஈடுபட்டனர். அந்த சுங்கச் வடி வழியே சென்ற, அனைத்து வாகனங்களுக்கும் சுங்கக்கட்டணம் வசூலிக்காமல் அனுப்பி வைத்தனர். இரவு 10:30 மணியிலிருந்து, 1:30 மணி வரை இப்போராட்டம் நீடித்தது.

துாத்துக்குடி:துாத்துக்குடியில், மூன்று நாட்களாக நடந்த போராட்டங்கள் ஓய்ந்து, நேற்று இயல்பு நிலை திரும்பியது. இதனால், மக்கள் நிம்மதி அடைந்தனர். 'ஸ்டெர்லைட் எதிர்ப்பு' என்ற போர்வையில், 'பந்த்'துக்கு எதிர்க்கட்சியினர் விடுத்த அழைப்பை,
மக்கள் சட்டை செய்யவில்லை. மாவட்டத்தில், ஐ.ஏ.எஸ்., மற்றும் போலீஸ் அதிகாரிகள் முகாமிட்டு, இயல்பு நிலை திரும்ப, நடவடிக்கைகள் எடுத்தனர். இதனால், நேற்று முதல், வெளியூர் பஸ்கள் இயக்கம் துவங்கியது.




துாத்துக்குடியில், ஸ்டெர்லைட் ஆலையை மூட வலியுறுத்தி, மே, 22ல் கலெக்டர் அலுவலகத்தை முற்றுகையிடும் போராட்டம் நடந்தது. இதில், சமூக விரோதிகள் புகுந்து, கலவரத்தை ஏற்படுத்தினர். கலெக்டர் அலுவலகம், ஸ்டெர்லைட் ஆலை ஊழியர் குடியிருப்பில் நிறுத்தப்பட்டிருந்த வாகனங்கள் எரிக்கப்பட்டன. போலீசார் துப்பாக்கிச் சூட்டில், 13 பேர் பலியாகினர்; 100க்கும் மேற்பட்டோர் காயம் அடைந்தனர்.

பிசுபிசுத்த, 'பந்த்'

துாத்துக்குடி ஸ்டெர்லைட் எதிர்ப்பு போராட்டத் தில், ஆரம்பத்தில் இருந்தே, தி.மு.க., - காங்., - கம்யூ., உள்ளிட்ட எதிர்க்கட்சிகள் மீது, மக்கள் நம்பிக்கை இழந்தனர். கடந்த, 23ம் தேதி துாத்துக்குடி வந்த, தி.மு.க., செயல் தலைவர்

ஸ்டாலின், அரசு மருத்துவமனைக்குள் செல்ல முயன்ற போது, காயம் அடைந்தவர்களின் உறவினர்கள், அவரை முற்றுகையிட்டனர். 'இதுவரை போராட்டத்திற்கு ஆதரவு அளிக்காமல், தற்போது வந்தது ஏன்?' எனக் கேட்டு, வாக்குவாதம் செய்தனர். அவருடன் வந்த கமாண்டோ படையினர், ஸ்டாலினை மீட்டு சென்றனர். அப்போது ஸ்டாலினுடன் வந்த, எட்டு கார்கள் அடித்து நொறுக்கப்பட்டன.

துப்பாக்கிச் சூட்டுக்கு பின், கடைகள் திறக்கப் படாமல் இருந்ததால், அடிப்படை தேவை களுக்காக மக்கள், மூன்று நாட்களாக மிகுந்த சிரமப்பட்டனர். இதனால்,எதிர்க்கட்சிகள் அழைப்பு விடுத்திருந்த, 'பந்த்' போராட்டத்தை புறக்கணித்தனர்.நான்காவது நாளான நேற்று, துாத்துக்குடியில் சிறிய கடைகள், ஓட்டல்கள் திறக்கப்பட்டிருந்தன.

இலவச உணவு

அத்தியாவசிய பொருட்கள் தட்டுப்பாடின்றி கிடைக்க நடவடிக்கை எடுக்கப்பட்டது. முக்கிய சாலைகளில் போக்குவரத்து துவங்கியது. பழைய பஸ் ஸ்டாண்ட், காமராஜ் காய்கறி மார்க்கெட், துறைமுக சாலை அருகே உள்ள, வ.உ.சி., மார்க்கெட் ஆகிய இடங்களில், காய்கறி விற்பனை நடந்தது. துாத்துக்குடி அரசு மருத்துவமனை வளாகத்தில், நோயாளிகளின் உறவினர்களின் தேவைக்காக, 'அம்மா' உணவகம் நேற்று திறக்கப்பட்டது. 24 மணி நேரமும் செயல்பட உள்ள உணவகத்தில், மூன்று நாட்களுக்கு இலவசமாக உணவுகள் வழங்கப்படும்.

நேற்று அரசு மருத்துவமனை உள்ளிட்ட இடங்களில், கலெக்டர் சந்தீப் நந்துாரி ஆய்வு

செய்தார். காயம் அடைந்தவர்களுக்கு உதவியாக, உடன் இருக்கும் உறவினர்களுக்கு குடிநீர், உணவு பொருட்கள் தடையின்றி கிடைக்க உத்தரவிட்டார்.அரசின் சிறப்பு பார்வையாளராக வந்துள்ள, ஐ.ஏ.எஸ்., அதிகாரிகள் டேவிதார், ககன்தீப்சிங் பேடி ஆகியோரும், நகரில் ஆய்வு மேற்கொண்டனர். நேற்று முகூர்த்த தினம் என்பதால், மண்டபங்களில் வழக்கம் போல, திருமண நிகழ்ச்சிகள் நடந்தன. ஆனால், உறவினர்கள் கூட்டம் இல்லை.

கூடுதல், டி.ஜி.பி., விஜயகுமார், ஐ.ஜி.,க்கள் சைலேஷ்குமார் யாதவ், வரதராஜ், சண்முக ராஜேஸ்வரன், கபில்குமார் சரத்கர், எஸ்.பி.,க்கள் முரளிரம்பா, அருண் சக்திகுமார் உள்ளிட்டோர், கண்காணிப்பு பணியில் ஈடுபட்டுள்ளனர்.அண்ணா நகர், முத்தம்மாள் காலனி, பிரையன்ட் நகரில் போலீசார் குவிக்கப்பட்டுள்ளனர். அண்ணாநகரில் தான் மே, 23ல் நடந்த துப்பாக்கிச் சூட்டில் காளியப்பன் என்பவர் பலியானார். அந்த பகுதி, ஆளில்லா உளவு விமானம் மூலம் கண்காணிக் கப்படுகிறது. 20 கம்பெனி கமாண்டோ படையினர், அதிரடிப் படையினர் ரோந்துப் பணியில் உள்ளனர்.

நெல்லை, மதுரை, திருச்செந்துார் உள்ளிட்ட இடங்களுக்கு, அரசு பஸ்கள் இயக்கப்பட்டன. இருப்பினும், உள்ளூர் பஸ்கள் இயக்கப்பட வில்லை. துாத்துக்குடி, மெல்ல மெல்ல, இயல்பு நிலைக்கு திரும்பி வருகிறது.

பாதிப்பில்லை

துாத்துக்குடியில் நடந்த துப்பாக்கிச் சூட்டை கண்டித்து, தி.மு.க., உள்ளிட்ட எதிர்க்கட்சிகள், நேற்று, தமிழகம் முழுதும் முழு அடைப்புக்கு அழைப்பு விடுத்திருந்தன. சென்னையில்,
ஆங்காங்கே, கடைகள் அடைக்கப் பட்டிருந் தன.காலை நேரத்தில், அரசியல் கட்சியினரின் மறியல் காரணமாக, சென்னை, திருப்பூர், கோவை, கும்பகோணம், நெல்லை உள்ளிட்ட சில இடங்களில், சிறிது நேரம் போக்குவரத்து பாதிக்கப்பட்டது. மறியலில் ஈடுபட்டவர்களை, போலீசார் கைது செய்து, போக்குவரத்தை சரி செய்தனர்.

ஆட்டோக்களின் சேவை, 30 சதவீதம் வரை பாதிக்கப்பட்டது. அதே நேரம், பஸ் போக்குவரத் தில் எந்த பாதிப்பும் இல்லை. ரயில்களும் வழக்கம் போல் இயங்கின. இதனால், மக்களின் இயல்பு வாழ்க்கையில் எந்த பாதிப்பும் இல்லை.

துணைவேந்தர் தேடல் குழு சர்ச்சை

Added : மே 25, 2018 23:44

தமிழ்நாடு உடற்கல்வியியல் மற்றும் விளையாட்டு பல்கலை துணைவேந்தரை, தேர்வு செய்ய அமைக்கப்பட்டுள்ள தேடல் குழு, சர்ச்சையை ஏற்படுத்தி உள்ளது.தமிழ்நாடு உடற்கல்வியியல் மற்றும் விளையாட்டு பல்கலை, துணைவேந்தர் பதவி, ஓராண்டாக காலியாக உள்ளது. புதிய துணைவேந்தரை தேர்வு செய்ய, தேடல் குழு அமைக்கப்பட்டுள்ளது. தேடல்குழு தலைவராக, கவர்னர் சார்பில், குஜராத் விளையாட்டு பல்கலை துணைவேந்தர், ஜதின்சோனி நியமிக்கப் பட்டுள்ளார்.அரசு தரப்பில், குழுவின் உறுப்பினராக, கால்நடை பல்கலை முன்னாள் துணைவேந்தர், தங்கராஜும், சிண்டிகேட் சார்பில் உறுப்பினராக, பாரதிதாசன் பல்கலை முன்னாள் துணைவேந்தர், தங்கமுத்துவும் நியமிக்கப் பட்டுள்ளனர். துணைவேந்தரை தேர்வு செய்வதற்காக, ஓராண்டுக்குப் பின் அமைக்கப்பட்டுள்ள, இந்த தேடல்குழு, முறையாக அமைக்கப்படவில்லை என்ற, குற்றச்சாட்டு எழுந்துள்ளது.இது குறித்து, விளையாட்டு பல்கலை நிர்வாகிகள் சிலர் கூறியதாவது:கவர்னர் நியமித்துள்ள நபர் மட்டுமே, விளையாட்டு பல்கலையுடன் தொடர்புடையவர்; மற்ற இருவருக்கும், விளையாட்டு பல்கலையுடன் தொடர்பில்லை. நீதிபதி யாரும் நியமிக்கப்படவில்லை. விளையாட்டு வீரர்கள் யாரையாவது நியமித்திருக்கலாம்; அதையும் செய்யவில்லை.சமீபத்தில், அண்ணா பல்கலை துணைவேந்தராக, கர்நாடக மாநிலத்தை சேர்ந்தவரை தேர்வு செய்தது, பெரும் சர்ச்சையை ஏற்படுத்தியது. தற்போது விளையாட்டு பல்கலையின், தேடல் குழு தலைவராக, குஜராத்தை சேர்ந்தவர் நியமிக்கப்பட்டுள்ளார். இதுவும், சர்ச்சையை ஏற்படுத்தி உள்ளது.இவ்வாறு அவர்கள் கூறினர். - நமது நிருபர் -

முதுநிலை மருத்துவ படிப்பு: இன்று மீண்டும் கவுன்சிலிங்

Added : மே 25, 2018 23:44

சென்னை, தனியார் மருத்துவ கல்லுாரிகளில், நிர்வாக ஒதுக்கீட்டில் உள்ள, முதுநிலை மருத்துவ படிப்பு இடங்களுக்கான கவுன்சிலிங், இன்று நடைபெறுகிறது.தமிழகத்தில் உள்ள அரசு மற்றும் தனியார் மருத்துவ கல்லுாரிகளில் உள்ள, முதுநிலை மருத்துவ படிப்புகளுக்கான கவுன்சிலிங், மே, 19 முதல் நடந்து வருகிறது. இதில், தனியார் மருத்துவ கல்லுாரிகளில் உள்ள, நிர்வாக ஒதுக்கீட்டு இடங்களுக்கான மாணவர் சேர்க்கை கவுன்சிலிங், நேற்று நடைபெற இருந்தது.எதிர்க்கட்சிகள், நேற்று நடத்திய முழு அடைப்பு போராட்டத்தால், மாணவர்கள் பாதிக்கலாம் என்பதால், கவுன்சிலிங் ஒத்தி வைக்கப்பட்டது. இதையடுத்து, சென்னை, ஓமந்துாரார் அரசு பல்நோக்கு மருத்துவமனையில், இன்று கவுன்சிலிங் நடைபெறும் என, மருத்துவ கல்விக்கான தேர்வுக்குழு அறிவித்துள்ளது.

'நீட்' விடைக்குறிப்பு வெளியீடு மாணவர்களே மார்க்கை கணக்கிடலாம்

Added : மே 25, 2018 22:32



சென்னை 'நீட்' தேர்வுக்கான விடைக்குறிப்பு மற்றும் மாணவர்களின் விடைத்தாள்கள் இணையதளத்தில் வெளியிடப்பட்டுள்ளன.பிளஸ் 2 முடித்த மாணவர்கள் அலோபதி, இயற்கை மருத்துவம் மற்றும் பல் மருத்துவ படிப்புகளில் சேர நீட் நுழைவு தேர்வில் தேர்ச்சி பெற வேண்டும். நீட் தேர்வு தரவரிசையின் அடிப்படையில் மட்டுமே மாணவர்கள் சேர்க்கப்பட உள்ளனர்.வரும் கல்வி ஆண்டில் மருத்துவ படிப்புக்கான நீட் தேர்வு மே 6ல் நடந்தது. இதில் 13 லட்சம் பேர் பங்கேற்றனர். இந்த தேர்வுக்கான விடைக்குறிப்புகள் நேற்று சி.பி.எஸ்.இ.,யின் நீட் இணையதளத்தில் வெளியிடப்பட்டன. மாணவர்கள் தங்கள் வினாத்தாள் வகைக்கான விடைக்குறிப்பு மற்றும் விடைத்தாள்களில் அளித்த பதில்களின் நகலை https://cbseneet.nic.in என்ற இணையதளத்தில் தெரிந்து கொள்ளலாம்.இந்த விடைக்குறிப்பை பயன்படுத்தி மாணவர்கள் தங்கள் மதிப்பெண்ணை தாங்களே கணக்கிட்டு கொள்ளலாம். விடைகள் தவறாக இருந்தால் சரியான பதிலுக்கான ஆதாரங்களுடன் சி.பி.எஸ்.இ.,க்கு விண்ணப்பிக்கலாம் என அறிவிக்கப்பட்டுள்ளது.விடைக்குறிப்புகளையும், விடைத்தாள்களையும் நாளை மாலை 5:00 மணி வரை மட்டுமே ஆன்லைனில் பார்க்க முடியும்; அதன்பின் தேர்வர்களால் பார்க்க முடியாது என சி.பி.எஸ்.இ., அறிவித்துள்ளது.



Advertisement

இணையதள வழிமின் கட்டணம் நிறுத்தம்

Added : மே 25, 2018 22:24

சென்னை, பராமரிப்பு பணி காரணமாக, திருச்சி, கரூர் உள்ளிட்ட ஏழு மாவட்டங்களில், நாளை வரை, இணையதள மின் கட்டண சேவையை, மின் வாரியம் நிறுத்தியுள்ளது.மின் வாரியத்தின், மின் கட்டண மையங்களில் மட்டுமின்றி, இணையதளம் மற்றும், 'மொபைல் ஆப்' என்ற செயலி வாயிலாகவும், மின் கட்டணத்தை செலுத்தலாம். சென்னை, கோவை, திருச்சி உட்பட, ஒன்பது மண்டலங்களாக, மின் வாரியம் செயல்படுகிறது.திருச்சி மண்டலத்தின் மின் கட்டண, 'சர்வரில்' பராமரிப்பு பணி நடக்கிறது.இதனால், கரூர், திருச்சி, நாகை, புதுக்கோட்டை, தஞ்சை, பெரம்பலுார், திருவாரூர் மாவட்டங்களை சேர்ந்த நுகர்வோர், நேற்று முதல், நாளை மாலை, 5:00 மணி வரை, இணையதளம் வாயிலாக, மின் கட்டணத்தை செலுத்த முடியாது என, மின் வாரியம் தெரிவித்துள்ளது.