சாரத்திலிருந்து கீழே விழுந்ததால் மூச்சு நின்ற இளைஞர் உயிர் பிழைத்த அதிசயம்: ஸ்ரீஇராமச்சந்திரா மருத்துவரின் சிகிச்சையால் தப்பினார்

Published : 05 Jun 2018 11:16 IST

சென்னை



தீவிர சிகிச்சைப் பிரிவில் சிகிச்சை பெற்று வரும் மனோகரன்.

சாரத்திலிருந்து விழுந்தவருக்கு அந்த வழியாக வந்த ஸ்ரீ இராமச்சந்திரா மருத்துவமனை இதய நல மருத்துவர் நேரடியாக சிகிச்சை அளித்து உயிர் பிழைக்கச் செய்துள்ளார்.

இதுகுறித்து ஸ்ரீ இராமச்சந்திரா மருத்துவமனை வெளியிட்டுள்ள செய்திக் குறிப்பு:

பூந்தமல்லி அருகே உள்ள ஒரு கிராமத்தைச் சேர்ந்தவர் மனோகரன்(46). பந்தல் போடும் கூலித்தொழில் செய்து வருகிறார். இவர் கடந்த சனிக்கிழமை காலை போரூர் மேம்பாலம் அருகே சாரத்தில் ஏறி வேலையில் ஈடுபட்டபோது கீழே விழுந்து மயங்கிக் கிடந்தார்.

அப்போது அதிர்ஷ்டவசமாக அந்த வழியாக காரில் வந்த ஸ்ரீ இராமச்சந்திரா மருத்துவமனை இதயநல மருத்துவர் டாக்டர் நாகேந்திர பூபதி இறங்கிச் சென்று பார்த்தார்.

சுற்றியிருந்தவர்கள் மின்சார அதிர்ச்சியால் மனோகரன் கீழே விழுந்திருக்கக் கூடும் என கூறியதைக் கேட்டு அவரை பரிசோதித்தார்.

அப்போது மனோகரனுக்கு நாடித்துடிப்பு இல்லாததும், மூச்சு இல்லாததும் தெரிந்தது. உடனே அவரது நெஞ்சை மீண்டும் மீண்டும் அழுத்தி செயற்கை முறையில் செயல்படச் செய்ய முயன்றார். ஆம்புலன்ஸை அழைப்பதற்காக அருகில் இருந்த சவீதா பல்கலைக்கழக மாணவர் ஒருவரிடம் நெஞ்சை தான் செய்தபடியே அழுத்திக் கொண்டே இருக்கச் சொல்லிவிட்டு ஸ்ரீ இராமச்சந்திரா அவசர சிகிச்சைப் பிரிவுக்கு போன் செய்தார்.

ஆம்புலன்ஸ் வந்தவுடன் அதில் அவரை ஏற்றி டிஃபிபிரிலேட்டர் மூலம் மின்சார ஷாக் கொடுக்கப்பட்டது. உடன் வாய் வழியாக குழாயை செலுத்தி நுரையீரலுக்கு ஆக்ஸிஜன் செலுத்தப்பட்டது. பின்னர் அவசர சிகிச்சைப் பிரிவில் சேர்த்து செயற்கை சுவாசக் கருவி பொருத்தப்பட்டது.

ஸ்ரீ இராமச்சந்திரா மருத்துவமனையில் தீவிர சிகிச்சைப் பிரிவில் சேர்க்கப்பட்டுள்ள மனோகரனுக்கு தற்போது செயற்கை சுவாசக் கருவி விலக்கப்பட்டு, நன்றாக குணமடைந்து வருகிறார். இன்று அவருக்கு ஆஞ்சியோகிராஃபி எடுக்கப்பட்டு, ஏற்கெனவே அவருக்கு இதய நோய் இருந்ததா என கண்டறிந்து சிகிச்சை அளிக்கப்படும்.

இவ்வாறு செய்திக்குறிப்பில் தெரிவிக்கப்பட்டுள்ளது.

தமிழ் வழியில்நீட் தேர்வு தேர்வெழுதியவர்களுக்கு 49 வினாக்களுக்கு கருணை மதிப்பெண் வழங்க கோரிய வழக்கு: வரும் 11 ஆம் தேதிக்கு ஒத்திவைப்பு

Published : 05 Jun 2018 17:35 IST




நீட் தேர்வில் தமிழ் வழியில் தேர்வெழுதிய மாணவர்களுக்கு 49 வினாக்களுக்கு கருணை மதிப்பெண் வழங்கக் கோரிய மனுவினை இம்மாதம் 11 -ம் தேதிக்கு ஒத்திவைத்து உயர் நீதிமன்ற மதுரைக்கிளை உத்தரவிட்டுள்ளது.

மார்க்சிஸ்ட் கம்யூனிஸ்ட் ராஜ்யசபா எம்.பி. டி கே.ரங்கராஜன் உயர் நீதிமன்ற மதுரைக்கிளையில் பொதுநல மனுவினை தாக்கல் செய்திருந்தார். அதில்,

  “நாடு முழுவதும் 2018 - 2019 ஆம் ஆண்டிற்கான மருத்துவ படிப்பிற்கான நுழைவு தேர்வு எனப்படும் நீட் தேர்வுக்கான விண்ணப்ப விநியோகம் மார்ச் 9 ஆம் தேதி முதல் தொடங்கியது. இதற்கு விண்ணப்ப கட்டணமாக பொதுப்பிரிவு மாணவர்களுக்கு ரூபாய் 1,400 பெறப்பட்டது.

நீட் தேர்விற்காக 170 தேர்வு மையங்கள் அமைக்கப்பட்டிருந்தன. 13 லட்சத்து 23 ஆயிரத்து 672 மாணவர்கள் நீட் தேர்விற்கு விண்ணப்பித்தனர். இதில் தமிழகத்தில் இருந்து ஒரு லட்சத்து 7 ஆயிரத்து 288 மாணவர்கள் விண்ணப்பித்தனர். இதில் 24 ஆயிரத்துக்கும் அதிகமான மாணவர்கள் தமிழ் வழி வினாத்தாளை தேர்வு செய்து தேர்வு எழுதினார்கள்.

நாடு முழுவதும் மே 6 ஆம் தேதி காலை 10 மணி முதல் மதியம் 1 மணி வரை நீட் நுழைவு தேர்வு நடைபெற்றது. மூன்று மணி நேரம் நடைபெற்ற நீட் தேர்வில் இயற்பியல், வேதியியல் மற்றும் உயிரியல் உள்ளிட்ட மூன்று பாடப்பிரிவுகளில் இருந்து 180 வினாக்கள் கேட்கப்பட்டது.

நான்கு விடைகள் அளிக்கப்பட்டு ஒரு சரியான விடையை தேர்ந்தெடுக்கும் முறையில் வினாத்தாள்கள் அமைக்கபட்டிருந்தன. சிபிஎஸ்இ பாடத்தினை அடிப்படையாக கொண்டே நீட் தேர்வு வினாக்கள் இடம் பெற்றிருந்தன. ஆனால் தமிழகத்தில் சமச்சீர் கல்வி நடைமுறையில் உள்ளது. சிபிஎஸ்இ கல்வி முறை தேசிய கல்வி ஆராய்ச்சி மற்றும் பயிற்சி கவுன்சில் என்ற அமைப்பின் கல்வி முறையை பின்பற்றுகிறது.

இதனால் சிபிஎஸ்இ மாணவர்களுக்கு நீட் தேர்வு எளிமையாக இருந்தது. ஆனால், சமச்சீர் கல்வி முறையில் உள்ள இயற்பியல், வேதியியல், உயிரியல் பாடப்பிரிவுகளில் இருந்து நீட் தேர்வு வினாக்கள் பின்பற்றவில்லை. இதனால் தமிழக மாணவர்கள் நீட் தேர்விற்காக தனி கவனம் செலுத்தி புதிய பாடங்களை படித்தனர். இதனால் தமிழ் வழியில் பயின்ற மாணவர்கள் நீட் தேர்வுக்காக கோச்சிங் சென்டர்கள் சென்று அதிகளவில் பணம் செலுத்தி பயின்றனர்.

மே 6 ஆம் தேதி நடத்த நீட் தேர்வில் தமிழில் மொழி பெயர்ப்பு செய்த வினாத்தாளில் 49 வினாக்கள் தவறாக கேட்கபட்டிருந்தன. தமிழில் மொழிமாற்றம் செய்த வினாத்தாளில் இயற்பியல் பாடப்பிரிவில் 10 வினாக்களும், வேதியியல் பாடப்பிரிவில் 6 வினாக்களும், உயிரியல் பாடப்பிரிவில் 33 வினாக்களும் தவறாக கேட்கபட்டிருந்தன.

குறிப்பாக வினா எண் 50,75,77,82 ஆகிய வினாக்கள் உள்பட 49 வினாக்கள் தவாறாக இருந்தன. இதனால் தமிழ் மொழியில் தேர்வெழுதிய மாணவர்களுக்கு தமிழில் மொழிமாற்றம் செய்யப்பட்ட வினா தாளில் தவறாக கேட்கப்பட்டிருந்த 49 வினாக்களுக்கு தலா 4 மதிப்பெண்கள் வீதம் 196 மதிப்பெண்கள் கூடுதலாக வழங்க வேண்டும்.

இதுதொடர்பாக மே 10 ஆம் தேதி சிபிஎஸ்இ மற்றும் முதல்வர் தனிபிரிவுக்கு புகார் அளித்தேன். மேலும் எந்தெந்த வினாக்கள் தவறு என தனிதனியாக குறிப்பிட்டு பிரதமர் உள்ளிட்ட அதிகாரிகளுக்கு மனு அனுப்பினேன். 49 வினாக்கள் தவறாக உள்ளன என புகார் அளிக்கபட்ட நிலையில் எனது மனுவை பரிசீலனை செய்யாமல் மே 24 ஆம் தேதி விடைதாள் வெளியிடப்பட்டது.

சரியான முறையில் தமிழில் மொழிமாற்றம் செய்யப்படாமல் இருந்த வினாத்தாளால் தமிழ் வழி மாணவர்கள் அதிக மதிப்பெண்கள் பெற முடியாமல் போக வாய்ப்புள்ளது.

எனவே மே 6 ஆம் தேதி நடைபெற்ற நீட் தேர்வில் தமிழில் தேர்வெழுதிய மாணவர்களுக்கு தவறாக தமிழில் மொழிமாற்றம் செய்யபட்டிருந்த 49 வினாக்களுக்கு மதிப்பெண் வழங்கி உத்தரவிட வேண்டும் அல்லது +2 தேர்வு மதிப்பெண் அடிப்படையில் மருத்துவ சேர்க்கை நடத்த அனுமதி அளித்து உத்தரவிட வேண்டும். மேலும், நீட் தேர்வு முடிவுக்கு இடைக்கால தடைவிதித்து உத்தரவிட வேண்டும்” என மனுவில் கூறியிருந்தார்.

இந்த வழக்கை மனுதாரர் வழக்கறிஞர் அவசர மனுவாக விசாரிக்க வேண்டும் என திங்கள்கிழமை நீதிபதிகள் முன்பு முறையிட்டனர். அப்போது அரசு தரப்பில் நீட் தேர்வு முடிவுகள் வெளியிடப்பட்டன என தெரிவிக்கப்பட்டது.

இதனையடுத்து இந்த வழக்கினை விசாரிக்க அவசரம் இல்லை என்றனர் நீதிபதிகள். எனவே மனுதாக்கல் செய்யும் பட்சத்தில் பட்டியலிடப்பட்டு முறையாக விசாரணைக்கு வரும் என்றனர் நீதிபதிகள்.

இந்த மனு இன்று (செவ்வாய்க்கிழமை) நீதிபதிகள் சி.டி.செல்வம், பஷீர் அகமது அமர்வு முன்பு விசாரணைக்கு வந்தது. அப்போது நீட் தேர்வு தொடர்பான வழக்குகளை கீழமை நீதிமன்றங்கள் விசாரிக்கக் கூடாது என உச்ச நீதிமன்றம் உத்தரவிட்டிருப்புதால் இந்த வழக்கினை இங்கு விசாரிக்க இயலாது என்றனர் நீதிபதிகள்.

மேலும் மனுதாரர் தரப்பில் மூத்த வழக்கறிஞர் ஆஜராக காலஅவகாசம் கோரியதால் வழக்கினை வரும் 11 ஆம் தேதிக்கு ஒத்திவைத்து உத்தரவிட்டனர்.

தமிழ் இசையே நீ வாழீ!

Published : 04 Jun 2018 07:06 IST
 
இசைஞானி என்று ரசிகர்களால் போற்றப்படும் இளையராஜாவின் பவள விழா ஆண்டு இது. 1976-ல் ‘அன்னக்கிளி’ படத்தில் தொடங்கி ஆயிரக்கணக்கான பாடல்கள், இணையற்ற பின்னணி இசைக்கோவைகள் என்று அதே அர்ப்பணிப்புடன் உற்சாகமாக இயங்கிவருகிறார் இளையராஜா. தமிழ், தெலுங்கு, மலையாளம், கன்னடம், இந்தி, மராத்தி, ஆங்கிலம் என்று 1,000-க்கும் மேற்பட்ட படங்களுக்கு இசையமைத்திருக்கும் இளையராஜாவைக் கவுரவிக்கும் விதமாக, இந்தியாவின் மிக உயர்ந்த இரண்டாவது விருதான பத்மபூஷண் இந்த ஆண்டில் வழங்கப்பட்டிருப்பது சாலப் பொருத்தம்.

தேனி மாவட்டம், பண்ணைபுரத்தில், 1943 ஜூன் 2-ல் பிறந்தவர் இளையராஜா. தனது அண்ணன் பாவலர் வரதராசனின் இசைக் குழுவில் தொடங்கிய பயணம் அவருடையது. திரைத் துறைக்குள் ஒரு கிட்டார் இசைக் கலைஞராக நுழைந்து, பிரபல இசையமைப்பாளர் ஜி.கே.வெங்கடேஷின் பிரதான உதவியாளராகப் பணிபுரிந்தவர். திரையிசையின் பல்வேறு நுட்பங்களைக் கற்றுத் தேர்ந்ததுடன், தன்ராஜ் மாஸ்டர் எனும் இசை ஆசிரியரிடம் பயின்று, லண்டன் டிரினிட்டி இசைக் கல்லூரியில் ‘கிரேடு -8’ முடித்தவர். பரபரப்பான பணிகளுக்கு இடையில் புதிய விஷயங்களைக் கற்றுக்கொள்வதில் அசாத்திய உழைப்பு காட்டியவர். இசையமைப்பாளராகப் புகழ்பெற்ற பின்னரும், கர்னாடக இசையைக் கற்க, அதிகாலையிலேயே செல்லும் பழக்கத்தைப் பின்பற்றியவர்.

இவை அனைத்துமே, திரையிசையில் அளப்பரிய சாதனை கள் புரிய அவருக்கு உதவின. கிராமியக் கதை, நகரப் பின்னணி கொண்ட கதை, காதல் கதை, அறிவியல் புனை கதை, திகில் கதை, சாகசக் கதை என்று எல்லாவிதமான படங் களுக்கும் மிகச் சிறப்பான பங்களிப்பை வழங்கியிருக்கிறார். தனது இசையின் மூலம், படங்களின் வெற்றிக்கு உதவிய துடன், பல பாடகர்களை, பாடலாசிரியர்களை அறிமுகம் செய்திருக்கிறார். ‘ஹவ் டு நேம் இட்’, ‘நத்திங் பட் விண்ட்’, ‘24 ஹவர்ஸ் இந்தியா’, ‘மியூசிக் மெஸையா’ உள்ளிட்ட அவரது இசைத் தொகுப்புகள் திரையிசைக்குள் அடக்கிவிட முடியாத அவருடைய இசை ஞானத்துக்கான எளிய சான்றுகள். சர்வ தேச ஆல்பங்களிலும் அவரது பாடல்கள் இடம்பெற்றிருக்கின்றன. 1992-ல் லண்டன் ஃபில்ஹார்மோனிக் இசைக் குழுவுக்காக சிம்பொனி எழுதியது அவரது சாதனைகளுள் ஒன்று. ஹங்கேரியின் புடாபெஸ்ட் சிம்பொனி இசைக் குழுவைப் பயன்படுத்தி அவர் உருவாக்கிய ‘திருவாசகம் இன் சிம்பொனி’ ஆல்பம் புகழ்பெற்றது.

ஒரு குக்கிராமத்தின் எளிய குடும்பப் பின்னணியிலிருந்து வந்து, பெரும் இசை சாம்ராஜ்ஜியத்தை உருவாக்கியவர் இளையராஜா. கோடிக்கணக்கான சாமானிய மக்களின் இசை முகமாக மிளிர்பவர். தமிழ் மண்ணின் மிகச் சிறந்த சாதனையாளர்களில் ஒருவரான இளையராஜாவுக்கு அவருடைய வாழ்வின் முக்கியமான தருணம் ஒன்றில் வாழ்த்துகளைப் பகிர்ந்துகொள்வதில் உளமார்ந்த மகிழ்ச்சிகொள்கிறது ‘இந்து தமிழ்’ நாளிதழ். இளையராஜா வாழீ நீர்!

காற்றில் கரையாத நினைவுகள் 14: பள்ளிக்கூடம் போகலாம்!

Published : 05 Jun 2018 09:36 IST
 
வெ.இறையன்பு








அருகில் இருக்கும் பள்ளியே அழகான பள்ளி. அன்று சில குடும்பங்களில் அத்தனை வசதிகள் இருந்தாலும், பொங்கிப் பெருகும் செல்வம் கொழித்தாலும் நகரத்துக்குச் சென்று பிள்ளைகள் படித்து வருகிற வழக்கமில்லை. அப்பா, அம்மாவுடனேயே குழந்தைகள் தங்கி, கிராமத்துப் பள்ளியில் படிப்பதே வாடிக்கை. இன்றிருப்பதுபோல விடுதியில் தங்கிப் படிக்க வைப்பதும், மதிப்பெண்களைக் கொட்ட வைக்கும் பள்ளிகளில் அனுமதித்து, பெற்றோர் அங்கேயே அறையெடுத்துத் தங்கும் அவலமும் அன்றில்லை.

பள்ளி என்பது படிக்க மட்டுமல்ல; ஒன்றாகச் சேர்ந்து விளையாடவும், அன்பையும் பண்பையும் கற்கவும் அது நாற்றங்கால். கட்டிடம் முக்கியமல்ல. தரையின் ஜொலிப்பு அவசியமல்ல. நடத்தும் ஆசிரியரின் ஆளுமையும் முக்கியமல்ல. காலை முதல் மாலை வரை பள்ளி வளாகத்தில் குழந்தைகள் பட்டாம்பூச்சியாகச் சிறகடித்துப் பறந்தால் போதுமென பெற்றோர் நினைத்த காலம் அது.

பள்ளியில் சேர பிறப்புச் சான்றிதழ் கூட அன்று தேவையில்லை. வலது கையால் தலைக்கு மேல் வைத்து இடது காதை முழுமையாகத் தொட் டால் படிக்கிற வயது வந்துவிட்டது என்று பொருள். குள்ளமாக இருந்த தால் எனக்கு எட்டவில்லை. இருந்தா லும் சேர்த்துக் கொண்டனர். இன்று வரை எட்டாமல்தான் இருக்கிறது. பள்ளிக்கு முதல் நாள் செல்ல அன்று குழந்தைகள் அழுததில்லை. வீட்டில் யாரும் பொத்திப் பொத்தி வளர்க்காத தால் பள்ளி எங்களை பயமுறுத்தவில்லை.

பாட்டும், எழுத்தும் படிப்பு

அன்று பெரும்பாலும் மாணவர்கள் நடந்தே வருவார்கள். ஒரு சில வசதி யான குடும்பங்கள் குழந்தைகளை மிதிவண்டியில் கொண்டுவந்து விட ஆள் வைத்திருப்பார்கள். பள்ளியில் தாமதமானால் மகன்களைத் தேடும் தந்தையுமில்லை, அழைத்துச் செல் லும் அயர்ச்சியும் இல்லை. படிப்பைக் காற்றடிப்பதுபோல கஷ்டப்பட்டு மூளைக்கு அனுப்பும் முயற்சியும் இல்லை. தனிப்பாடம் என்பது ஆரம்பப் பள்ளியில் கிடையவே கிடையாது. படிப்பு என்பது பாட்டும், எழுத்தும்.

ஆரம்பப் பள்ளியில் அத்தனை பாடத்துக்கும் ஒரே ஆசிரியர். காலை முதல் மாலை வரை வகுப்பறை அந்த ஒருவர் கண்காணிப்பில் தவழும் தாய்மடி. கை பிடித்து சின்னப் பலகையில் ஆனா, ஆவன்னா எழுதக் கற்றுத் தருவார்கள். பல்பத் தால் எழுதிய பாடத்தை அழித்த பிறகும் சுவடுகள் இருக்கும். பள்ளித் தோழன் பலகை யைத் துடைக்க கற் றுத் தந்த உத்தி ஒன்று. உள்ளங்கைகள் இரண்டையும் அதன் மேல் வைத்து ‘காக்கா காக்கா தண்ணி போடு, குருவிகிட்ட சொல்லாதே’ என்போம். கை வியர்வையை தண்ணீர் என நினைத்து பலகையைச் சுத்தம் செய்வோம். நண்பன் ஒருவன் இலை ஒன்றைக் காண்பித்து படிப்புத் தழை என்று பறித்து பையில் வைப்பான். அதை வைத்தால் படிப்பு நன்றாக வருமாம். நானும் செய்திருக்கிறேன். அது அழுகி துர்நாற்றம் வந்ததோடு சரி. மாம்பழம் வரைய தமிழ் எழுத்து ‘மு’வை எழுதி சுழிப்பதைச் செய்து உள்ளிருப்பவற்றை அழிப்பது எளிய வழி.

அன்று அகல உழுவதைவிட ஆழ உழுதது அதிகம். எங்களுக்கு முதல் வகுப்பில் சரஸ்வதி டீச்சர். மாணவர்களுக்கு இன்னொரு தாயாய் இருப்பார். எந்தக் குழந்தையையும் அவர் திட்டியது இல்லை. காலையில் பள்ளியில் பிரார்த்தனை நடக்கும்.

முதல் பூ டீச்சருக்குத்தான்

இரண்டாம் வகுப்பில் பென்சில் அறிமுகமாகும். காகிதம் எழுதத் தரப் படும். எங்களுக்குச் சொல்லிக் கொடுத்த சாவித்திரி டீச்சர் கத்தரிக் காய் எவ்வளவு நல்லது என்று வகுப்பெடுத்தார். அதுவரை கத்தரிக்காயைத் தொடாமல் இருந்த நான், அதற்குப் பிறகு சுவைத்துச் சாப்பிடத் தொடங்கினேன். ஆசிரியர் வாக்கே வேத வாக்கு.

மூன்றாம் வகுப்பில் ஜோதி டீச்சர். அவ்வளவு எளிமையாக எங்களுக்கு ஆங்கிலத்தை அறிமுகப்படுத்தினார். அத்தனை மாணவர்களிடமும் சிரித்த முகத்துடன் நடந்துகொள்வார். மூன் றாம் வகுப்பில்தான் ஆங்கில எழுத்துகள் கற்றுத் தரப்பட்டன. எழுதப் பேனாவும் எங்களுக் குத் தரப்படும். ஆண்டு தொடக்கத்தில் பெறுகிற பேனாவை முழுஆண்டுத் தேர்வு வரை பாதுகாக்க வேண்டும். அவ்வப்போது கீழே விழுந்து உடைந்து முள் (நிப்) முறியும். புது முள்ளுக்கு 3 பைசா. நீல மசியை நிரப்ப 3 பைசா. கருப்பு மையை நிரப்ப 4 பைசா. நாளடைவில் தேய்ந்து முள் பட்டையடிக்க ஆரம்பிக்கும். புது முள் கொஞ்சம் அழுத்தமாக எழுத, அதன் நடுவே பிளேடை விட்டு நெம்புவதும் உண்டு. சமயத்தில் பேனா லீக்கடித்து சட்டைப் பை மசியால் நனைவதும் உண்டு. நான்காம் வகுப்பிலும், ஐந் தாம் வகுப்பிலும் கமலாட்சி டீச்சர். பள்ளி முடியும் வரை கண்டிப்பு, அதற்குப் பிறகு கனிவு.

வீட்டுப் பாடம் என்பது அரை மணி நேர வேலை. ஒன்றாம் வகுப்பில் சின்னக் கரும்பலகையின் இரண்டு பக்கமும் எழுதும் அளவே வீட்டுப் பாடம். இரண்டாம் வகுப்பில் 16-ம் வாய்ப் பாடு வரை பலமுறை எழுதி எதைக் கேட்டாலும் உடனடியாகச் சொல்ல வேண்டும். திண்ணையிலேயே அமர்ந்து வீட்டுப் பாடத்தை முடித்த பிறகு உள்ளே நுழைவோம். அதற்குப் பிறகு விளையாட்டு மட்டுமே. இருட்டும் வரை விளையாட்டு. பின்னர் வீட்டுக்கு வந்து கை, கால் அலம்பி சாப்பிட்ட பிறகு சுகமான தூக்கம். வீட்டில் எப்போதும் ஆசிரியர் பற்றியே பேச்சு இருக்கும். ஒவ்வோர் ஆண்டும் வகுப்பாசிரியருக்கு பொங்கல் வாழ்த்து அட்டையை கைப்பட வரைந்து, அனுப்புவதற்கு காசு இல்லாததால் அப்படியே வைத்திருப்போம். வீட்டுச் செடியில் முத லில் பூத்த சாமந்தியை டீச்சருக்கு எடுத்துச் செல்வதில் அப்படியொரு பெருமை.

நண்பனை காணவில்லை

ஆண்டுத் தொடக்கத்தில் வாங்கித் தருகிற இரண்டு, மூன்று ஜோடி சீருடை மட்டுமே. அவற்றில் கழுத்துப் பட்டை நுனியில் மஞ்சள் தடவி அணிந்து செல்வோம். முக்கால்வாசி மாணவர்கள் மதிய இடைவேளையில் வீட்டுக்கு வந்து உணவருந்திவிட்டுச் செல்வார்கள். குடிநீர்க் குப்பிகளை தூக்கிச் செல்லும் வழக்கமில்லை. பள்ளியின் குடிநீர்க் குழாயில் கைகளைக் குவித்து கவ லையின்றி நீர் பருகி நிம்மதியாக இருந்தோம். பள்ளி வேலைகளை குழுவாக மாணவர் செய்த காலம் அது. அடுப்புக் கரி, ஊமத்தங்காய் ஆகியவற்றை அரைத்து வகுப்பறைக் கரும்பலகையில் மாணவர்கள் அவ்வப்போது பூசுவார்கள். மண் பானை யில் தண்ணீர் கொண்டு வர ஒரு குழு. பெருக்க ஒரு குழு. பிரார்த்தனை மைதானத்தை கூட்டுவதற்கு ஒரு குழு.

என்னோடு மூன்றாம் வகுப்பு வரை ஒன்றாகப் பள்ளிக்குச் சேர்ந்து செல் கிற நண்பன் ஒருவன் உண்டு. நான்காம் வகுப்பு தொடங்கும்போது என்னை அழைத்துச் செல்ல அவன் வரவில்லை. காத்திருந்து பார்த்திருந்துவிட்டு, களைத்துப் போய் அவசர அவசரமாக பள்ளிக்கு ஓடினேன். வகுப்பிலும் அவன் இல்லை. ஒரு வாரம் கழித்து நான் படித்த மூன்றாம் வகுப்பைக் கடக்கும்போது அவனை அங்கு பார்த்தேன். எல்லாக் காலத்திலும் தேர்ச்சி பெறாமல் போவது ஒருவித சோகம்தான்.

நாங்கள் துவைத்த உடையோடு பள்ளிக்குச் செல்கையில் ஓரிரு மாணவர்கள் அங்கங்கே சலவை செய்த கூர்மையான உடைகளுடன் பள்ளிப் பேருந்துக்கு காத்திருப்பதைப் பார்ப்போம்.

சீருடை கூர்மையும் புத்தி கூர்மையும்

எங்கள் கையில் அத்தனை புத்தகங்களையும் அட்டவணை என்கிற பாகுபாடே இல்லாமல் சுமக்கும் பை. அவர்களிடமோ பளபளக்கும் சின்ன அலுமினியப் பெட்டி. அவர்கள் மிகவும் உயர்ந்த படிப்பைப் படிக்கிறார்கள் என்கிற எண்ணம். உயர்நிலைப் பள்ளி யில் சேர்ந்து ஆறாம் வகுப்பில் அவர்கள் வந்து எங்களோடு இணையும்போது அது எவ்வளவு பெரிய தவறு என்பது புரியும். சீருடையின் கூர்மைக்கும், புத்திக் கூர்மைக்கும் எந்தத் தொடர்பும் இல்லை.

இன்று மழலையர் பள்ளியில் சேர்வதற்கே மகத்தான கூட்டம். முதல் நாளே சென்று விண்ணப்பம் வாங்க வீதியில் படுத்து பெற்றோர் காத்திருக் கும் பள்ளிகளும் உண்டு. பள்ளி இறுதி வரை கங்காரு குட்டிகளைச் சுமப்பதுபோல பெற்றோர் காபந்து செய்யும் நடைமுறை.

படிப்பு என்பது நிகழ்காலத்தைத் தவறவிட்டு எதிர்காலத்தை மட்டுமே கருத்தில் கொள்ளும் திட்டமிட்ட முதலீடு இன்று.

- நினைவுகள் படரும்...

வியாழன் முதல் 10 நாட்களுக்கு நெல்லை, தேனி, கன்னியாகுமரி, நீலகிரி மாவட்டங்களில் கனமழை: தமிழ்நாடு வெதர்மேன் தகவல்

Published : 05 Jun 2018 19:59 IST

போத்திராஜ்
 


‘தமிழ்நாடு வெதர்மேன்’ பிரதீப் ஜான் : கோப்புப்படம்

வரும் வியாழக்கிழமை முதல் அடுத்த 10 நாட்களுக்கு மேற்கு தொடர்ச்சி மலையோர மாவட்டங்களான கன்னியாகுமரி, நெல்லை, தேனி, கோவை, நீலகிரி உள்ளிட்ட மாவட்டங்களில் கனமழை பெய்யும் என்று தமிழ்நாடு வெதர்மேன் தெரிவித்துள்ளார்.

தென்மேற்கு பருவமழை வழக்கமாக ஜூன் 1-ம் தேதி தொடங்கும். ஆனால், இந்த ஆண்டு வழக்கத்துக்கு மாறாக, 3 நாட்கள் முன்பாக, அதாவது 29-ம் தேதியே கேரளாவில் பருவமழை தொடங்கியது. அப்போது முதல் கேரளா, மேற்கு தொடர்ச்சி மலையோர மாவட்டங்களில் அவ்வப்போது மழை பெய்து வருகிறது.

இந்நிலையில், 7-ம் தேதி அல்லது 8-ம் தேதியில் இருந்து பருவமழை தீவிரமடையும், மும்பை முதல் கன்னியாகுமரி வரையிலான மேற்குதொடர்ச்சிமலையோரப் பகுதியில் உள்ள மாவட்டங்களில் கனமழைக்கு வாய்ப்புள்ளது என்று தமிழ்நாடு வெதர்மேன் தெரிவித்துள்ளார்.

பேஸ்புக்கில் தமிழ்நாடு வெதர்மேன் என்ற பெயரில் வானிலை குறித்த பதிவுகளை வெளியிட்டுவரும் பிரதீப் ஜான் தி இந்து ஆன்லைனுக்கு அளித்த பிரத்யேகப் பேட்டியில் கூறியதாவது:

தென்மேற்கு பருவமழை வரும் 7-ம் தேதி அல்லது 8-ம் தேதி முதல் தீவிரமடையும். அதன்பின் அடுத்த 10 நாட்களுக்கு மேற்குதொடர்ச்சி மலையோர மாவட்டங்களில் கனமழை இருக்கும்.

தமிழகத்தின் உள்மாவட்டங்களில் வெப்பச்சலனம் காரணமாக இடியுடன் நாளை மழை பெய்ய வாய்ப்பு உண்டு. ஆனால், 7-ம் தேதிக்கு பின் பருவமழை தீவிரமடையும் போது, தமிழகத்தின் உள்மாவட்டங்களில் மழை இருக்காது. சென்னை, வடமாவட்டங்களில் நாளை இடியுடன்கூடிய மழையை எதிர்பார்க்கலாம்.

சென்னைப் பொறுத்தவரை புறநகர்பகுதிகளில் நாளை மழை பெய்யக்கூடும் வியாழக்கிழமைக்கு பின் மழைக்கு வாய்ப்பு இல்லை. தென்மேற்கு பருவமழை தீவிரமடைந்தபின், சென்னையில் வெயிலின் தாக்கமும் இயல்பை ஒட்டியே இருக்கும். அதிகமான வெயில் இருக்காது.

வியாழக்கிழமை அல்லது 8-ம் தேதி முதல் பருவமழை தீவிரமடைகிறது என்பதால், மும்பை முதல் கன்னியாகுமரி வரையிலான மேற்கு தொடர்ச்சி மலையோர மாவட்டங்கள், மேற்கு கடற்கரைஓர மாவட்டங்களில் கனமழைக்கு வாய்ப்பு உண்டு. கர்நாடகத்தின் காவிரி நீர்ப்பிடிப்பு பகுதிகளில் கனமழை பெய்யக்கூடும். இதனால், தமிழகத்துக்கான நீர்வரத்து அதிகரிக்கலாம்.

மேற்கு தொடர்ச்சிமலையோரத்தில் உள்ள கன்னியாகுமரி, நெல்லை, தேனி மாவட்டத்தின் பகுதிகள், பெரியாறு அணை நீர்ப்பிடிப்பு பகுதிகள், கோவை மாவட்டத்தின் சில பகுதிகள், நீலகிரி மாவட்டம், வால்பாறை, சத்தியமங்கலம் பகுதிகளில் கனமழை, முதல் மிககனமழை இருக்கும். அடுத்து வரும் 10 நாட்களில் ஒட்டுமொத்தமாக நாள் தோறும், கனமழை முதல் மிககனழை வரை தொடர்ந்து பெய்யக்கூடும். .

இவ்வாறு பிரதீப்ஜான் தெரிவித்தார்.

13 கிலோ மனுக்களை சுமந்து வந்த தாய் - மகன்

Added : ஜூன் 05, 2018 22:23




கடலுார் : கடலுாரில் தாய், மகன் இருவரும், தங்களது நிலத்தை மீட்டுத் தரக்கோரி, 11 ஆண்டுகளாக அதிகாரிகளிடம் கொடுத்த மனுக்களின் நகல்களை, மூட்டையாக கட்டி, தலையில் சுமந்து வந்து, கலெக்டரை சந்தித்ததால், பரபரப்பு ஏற்பட்டது.

விழுப்புரம் மாவட்டம், கள்ளக்குறிச்சி அடுத்த கூத்துக்குடியைச் சேர்ந்தவர் மாயவன் மனைவி குண்டுப்பிள்ளை, 62; இவரது மகன் முனுசாமி, 37; விவசாயி. இருவரும் கடலுார் கலெக்டர் அலுவலகத்திற்கு, தலையில் பெரிய மூட்டைகளை சுமந்தபடி வந்தனர். அவர்களை கலெக்டர் தண்டபாணி விசாரணை செய்தார்.

அப்போது அவர்கள் கூறுகையில், 'தங்களுக்கு கடலுார் மாவட்டம், வேப்பூர் அடுத்த ஐவதுகுடியில், 2 ஏக்கர், 4 சென்ட் நிலம் இருந்தது. அந்த இடத்தை, அதே பகுதியைச் சேர்ந்த சிலர், போலி ஆவணங்கள் தயாரித்து மனைகளாக மாற்றி, விற்றுள்ளனர்.

'அவர்கள் மீது நடவடிக்கை எடுத்து, நிலத்தை மீட்டு தரக்கோரி, 11 ஆண்டுகளாக அதிகாரிகளிடம் தொடர்ந்து மனு கொடுத்து வருகிறோம். இதுவரை நடவடிக்கை இல்லாததால், கொடுத்த அனைத்து மனுக்களின் நகல்களை மூட்டையாக கட்டி துாக்கி வந்தோம்' என்றனர். மனுக்களின் மூட்டை, 13 கிலோ எடை இருந்தது.

அரசு பஸ் ஊழியர் சங்கங்கள் மீண்டும், 'ஸ்டிரைக் நோட்டீஸ்'

Added : ஜூன் 05, 2018 21:20

சென்னை: பல்வேறு கோரிக்கைகளை வலியுறுத்தி, அரசு போக்குவரத்து தொழிற்சங்கங்கள், 'ஸ்டிரைக் நோட்டீஸ்' வழங்கி உள்ளன.தொ.மு.ச., - சி.ஐ.டி.யு., - ஏ.ஐ.டி.யு.சி., - எச்.எம்.எஸ்., உள்ளிட்ட, 10 தொழிற்சங்க கூட்டமைப்பு நிர்வாகிகள் ஆலோசனை கூட்டம், நேற்று சென்னை, பல்லவன் இல்லத்தில் நடந்தது.

பின், நிர்வாகிகள் கூறியதாவது:தமிழ்நாடு அரசு போக்குவரத்துக் கழகங்கள், 8,000 வழித்தடங்களில், லாப நோக்கமற்று, பஸ்களை இயக்குகின்றன. இதனால், மாநகரம், நகரம், கிராமம் மற்றும் மலை வழித்தடங்களில், போக்குவரத்து எளிதாகி உள்ளது.

நிலுவை : இதனால் ஏற்படும் நஷ்டத்தை, அரசு ஏற்க வேண்டும் என்ற, கோரிக்கையை முன்வைத்தோம். அதற்கு பதில் அரசு, பஸ் கட்டணத்தை உயர்த்தியது. அத்துடன், டீசல் மானியத்தையும் நிறுத்தியது. கட்டண உயர்வுக்கு முன், 2.40 கோடியாக இருந்த பயணியர் எண்ணிக்கை, தற்போது, 1.50 கோடியாக குறைந்துள்ளது. ஏற்கனவே, ஒரு நாளைக்கு, எட்டு கோடி ரூபாயாக இருந்த நஷ்டம், தற்போது, ஒன்பது கோடி ரூபாயாக உயர்ந்துள்ளது. கட்டண உயர்வுக்குப் பின், டீசல் விலை, லிட்டருக்கு, ஐந்து ரூபாய்க்கும் மேல் உயர்ந்துள்ளது.இது போன்ற செலவுகளால் ஏற்படும் நிதிச் சுமையை சமாளிக்க, நிர்வாகம், ஊழியர்களிடம் பிடிக்கப்பட்ட பணத்தை செலவு செய்கிறது. அதனால், ஊழியர்களுக்கு தர வேண்டிய நிலுவை, தற்போது, 6,000 கோடி ரூபாயாகி உள்ளது.போக்குவரத்து ஊழியர்கள் ஊதிய ஒப்பந்த முரண்பாடுகளை நீக்கி, நிலுவை தொகையை, உடனே வழங்க வேண்டும்.பணி ஓய்வுபெறுவோருக்கு, அப்போதே பணப் பலன்களை வழங்க வேண்டும். பெட்ரோல், டீசல் விலையை, மத்திய, மாநில அரசுகள் முறைப்படுத்த வேண்டும்.வேலை நிறுத்தம்இந்த கோரிக்கைகளை, அரசு உடனே நிறைவேற்ற வேண்டும். இல்லையேல், வரும், 19ம் தேதியோ அல்லது அதன் பிறகோ, போக்குவரத்து தொழிற்சங்கங்கள், வேலைநிறுத்தத்தில் ஈடுபடும்.இதற்கான, ஸ்டிரைக் நோட்டீசை, போக்குவரத்து கழக மேலாண் இயக்குனர்கள், செயலர் மற்றும் தொழிலாளர் நல கமிஷனர் ஆகியோருக்கு வழங்கி உள்ளோம்.இவ்வாறு அவர்கள் கூறினர்.