கணவரை இழந்த மனைவிக்கு ரூ.1.8 கோடி

Added : ஜன 19, 2020 23:50

சென்னை:வாகன விபத்தில் கணவனை இழந்த மனைவிக்கு, 1.82 கோடி ரூபாய் இழப்பீடு வழங்க, சென்னை மோட்டார் வாகன விபத்து இழப்பீடு தீர்ப்பாயம் உத்தரவிட்டுள்ளது.

சென்னை, முகப்பேரை சேர்ந்தவர் சவுந்தரராஜன், 50. இவர், கட்டுமான நிறுவனத்தில் மேலாளராக பணிபுரிந்தார். 2013 மே மாதம், கட்டுமான பணி நடந்த இடத்தில், நின்று கொண்டிருந்தார். அப்போது, வேகமாக வந்த டிப்பர் லாரி, சவுந்தரராஜன் மீது மோதியது. இதில், படுகாயமடைந்த அவர், சம்பவ இடத்திலேயே உயிரிழந்தார்.கணவரின் இறப்பிற்கு இழப்பீடு வழங்கக் கோரி, சவுந்தரராஜனின் மனைவி புஷ்பலதா, சென்னை மோட்டார் வாகன விபத்து இழப்பீடு தீர்ப்பாயத்தில் வழக்கு தொடர்ந்தார்.

இந்த வழக்கு, நீதிபதி எஸ்.உமா மகேஷ்வரி முன் விசாரணைக்கு வந்தது. விசாரணையின் போது, 'லாரியை சராசரி வேகத்தில் தான், டிரைவர் இயக்கினார். மனுதாரரின் கணவர், திடீரென லாரியின் முன் விழுந்து விட்டார். உடனடியாக சுதாரித்த டிரைவர், லாரியை நிறுத்த முயன்றார்; முடியவில்லை. அதனால், அவர் இறந்துவிட்டார். இதற்கு மனுதாரரின் கணவரே பொறுப்பு' என, லாரி உரிமையாளர் தரப்பில் வாதிடப்பட்டது.

விசாரணைக்குப் பின் நீதிபதி பிறப்பித்த உத்தரவு: மனுதாரரின் கணவர் இறப்பிற்கு, லாரியை அஜாக்கிரதையாகவும், வேகமாகவும் ஓட்டியதே காரணம் என்பது, விசாரணையில் நிரூபணமாகி உள்ளது. எனவே, மனுதாரருக்கு இழப்பீடாக, 1.82 கோடி ரூபாயை, ஸ்ரீ ராம் ஜெனரல் இன்சுரன்ஸ் நிறுவனம் வழங்க வேண்டும்.இவ்வாறு, உத்தரவில் கூறப்பட்டுள்ளது.