'நீட்' தேர்வு மதிப்பெண்ணில் மாற்றுத்திறனாளிகளுக்கு சலுகை

Added : ஜன 02, 2020 21:00

சென்னை: 'நீட்' தேர்வில் மதிப்பெண் சலுகை உள்ளதால், அதிகமானோர் பங்கேற்கும்படி, மாற்றுத் திறனாளி மாணவர்களுக்கு அறிவுறுத்தப் பட்டுள்ளது.

பிளஸ் 2 முடிக்கும் மாணவர்கள், மருத்துவ படிப்பில் சேர, தேசிய அளவிலான நீட் நுழைவு தேர்வில் தேர்ச்சி பெற வேண்டும். நடப்பு கல்வி ஆண்டில், பிளஸ் 2 மாணவர்களுக்கான நீட் தேர்வு, மே, 3ல் நடக்கிறது. இதற்கான ஆன்லைன் விண்ணப்ப பதிவு, டிசம்பர், 2ல் துவங்கியது. பதிவுக்கான அவகாசம், டிசம்பர், 31ல் முடிய இருந்த நிலையில், ஜனவரி, 6 வரை நீட்டிக்கப் பட்டுள்ளது. இந்நிலையில், அனைத்து பள்ளிகளுக்கும் மாற்றுத் திறனாளிகள் நல இயக்குனரகம் அனுப்பியுள்ள சுற்றறிக்கை:மாற்றுத் திறனாளிகளுக்கான உரிமைகள் தொடர்பான சட்டத்தின்படி, அவர்களுக்கு உயர்கல்வியில், 5 சதவீத இட ஒதுக்கீடு வழங்கப்படுகிறது.

இதன்படி, மருத்துவ படிப்பில் மாற்றுத் திறனாளி மாணவர்கள் சேரும் வகையில், அவர்களுக்கு, நீட் தேர்வு மதிப்பெண்ணிலும் சலுகை வழங்கப்படுகிறது. இச்சலுகையை மாணவர்கள் பலர் பயன்படுத்தாததால், 5 சதவீதத்துக்கும் குறைவான மாணவர்களே, மருத்துவ படிப்பில் சேர்வதாக, மருத்துவ கல்வி இயக்குனரக ஆய்வில் தெரியவந்துள்ளது. எனவே, மாற்றுத் திறனாளி மாணவர்களுக்கு, அவர்களுக்கான சலுகைகளை தெரிவித்து, நீட் தேர்வில் அதிகம் பங்கேற்க, தலைமை ஆசிரியர்கள் விழிப்புணர்வு ஏற்படுத்த வேண்டும்.இவ்வாறு, அதில் கூறப்பட்டுள்ளது.