55 வயது மேற்பட்ட போலீசாருக்கு விடுப்பு

Added : மார் 26, 2020 21:35

சென்னை : 'நீரிழிவு மற்றும் மன அழுத்தத்திற்கு மாத்திரை உட்கொள்ளும், 55 வயதுக்கு மேற்பட்ட போலீசார், பணிக்கு வர வேண்டாம்' என, போலீஸ் உயர் அதிகாரிகள் உத்தரவிட்டுள்ளனர்.

மாவட்ட எஸ்.பி.,க்களுக்கு, மண்டல ஐ.ஜி.,க்கள் அனுப்பியுள்ள சுற்றறிக்கை:கொரோனா வைரஸ் பரவி வருவதால், காவல் நிலையங்களில், 55 வயதுக்கு மேற்பட்ட போலீசார், முழு நேர பணியில் ஈடுபட வேண்டாம்.

அதேபோல, நீரிழிவு மற்றும் மன அழுத்தத்திற்கு மாத்திரைகள் உட்கொள்ளும், 55 வயதுக்கு மேற்பட்ட போலீசாரும், பணிக்கு வர வேண்டாம். போலீசாருக்கு உடல் நலக்குறைவு ஏற்பட்டால், உடனடியாக டாக்டர்களை அணுக வேண்டும்; அலட்சியமாக இருக்க கூடாது. பணியில் உள்ள போலீசார் அனைவரும், முக கவசம் அணிவது உள்ளிட்ட, பாதுகாப்பு நடவடிக்கைகளை கட்டாயம் மேற்கொள்ள வேண்டும்.

தேவையில்லாமல், காவல் நிலையங்களில், போலீசார் அதிக எண்ணிக்கையில் பணியில் இருக்க கூடாது. போலீசார் சுழற்சி முறையில் பணியாற்ற, டி.எஸ்.பி.,க்கள் மற்றும் இன்ஸ்பெக்டர்கள் உத்தரவிட வேண்டும்.உடல் நலக்குறைவு உள்ள போலீசாருக்கு, உடனடியாக விடுப்பு அளிக்க வேண்டும். போலீசாரை தொடர்ச்சியாக, இரண்டு நாட்கள் பணியில் ஈடுபடுத்தக் கூடாது.இவ்வாறு, அதில் கூறப்பட்டுள்ளது.