மாதம் ரூ.2.50 லட்சம் சம்பாதிக்கும் 14 வயது சிறுவன் பிரபல கம்பெனியில் சி.இ.ஓ.,வாக பணிபுரிய அழைப்பு!




கடலுார்:கடலுார் அருகே, புதிய மொபைல், 'ஆப்'களை உருவாக்கி அசத்தும், 14 வயது சிறுவனுக்கு, பிரபல கம்பெனியில், சி.இ.ஓ.,வாக பணியாற்ற அழைப்பு வந்துள்ளது.

கடலுார் மாவட்டம், மங்கலம்பேட்டையை சேர்ந்தவர் அனில்குமார்; தனியார் பள்ளி ஆசிரியர். இவரது மனைவி பெட்டா, போலீஸ் எஸ்.ஐ.,யாக இருக்கிறார். இவர்களது மகன் ரிஷிகுமார், 14, தனியார் பள்ளியில், 9ம் வகுப்பு படித்து வருகிறார். படிப்பில் சுட்டியான இவர், 'மொபைல் ஆப்' உருவாக்குவதிலும் வல்லவர்.

'ரோபோ' உருவாக்கம்:

சமீபத்தில், பாலி கார்பனேட் பிளாஸ்டிக் மூலம் இவர் உருவாக்கிய, 'ரோபோ' அனைவரையும் அசத்தி வருகிறது. நான்கு அடி உயரமுள்ள இந்த ரோபோ, 1,118 பாகங்களுடன், 128 எம்.பி., பதிவுத்திறன் கொண்டது. 39 ஆயிரம் ரூபாய் செலவில் உருவாக்கிய இந்த ரோபோ, உரிமையாளர் குரலை கேட்டதும், தானாக செயல்பட துவங்குகிறது. பிரத்யேக, 'ஆப்' மூலம் கட்டுப்படுத்தும் வகையில் உருவாக்கப்பட்டுள்ள இந்த ரோபோ, அதன் முன் நிற்பவரின் முகம் பார்த்து, அவரை பற்றிய விபரங்களை கூ வியக்க வைக்கிறது.

புதிய 'ஆப்'கள்:

மாணவர் ரிஷிகுமார், ஆண்ட்ராய்டு மற்றும் ஆப்பிள் போன்களில் பயன்படுத்தும் வகையில், 'மோஷன் டிரேடர்' எனும், 'ஆப்' ஒன்றை உருவாக்கி உள்ளார். இதன் மூலம், சி.சி.டி.வி., கேமராவில் பதிவாகும் முகங்களை, அவரவர் மொபைல் போனில் பதிவு செய்யவும்; மொபைல் போன்களில் கேமராவை ஆன் செய்யாமல், சென்சார் மூலம் முகங்களை பதிவு செய்யும் வசதி உள்ளது. 72க்கும் மேற்பட்ட கேம்ஸ் ஆப் உருவாக்கி, 30 ஆப்களை, கம்பெனிகளிடம் விற்பனை செய்துள்ளார்.

பேஸ்புக், கூகுள் போன்ற சமூக வலைதளங்களில் ஏற்படும் பிரச்னைகளை சரி செய்தும் தருகிறார். மேலும், 4.3 வோல்ட்டில் செயல்படக் கூடிய வகையில், 'ஜார்விஸ் மினி' என்ற கம்ப்யூட்டர் சி.பி.யு.,வை, 50 கிராம் எடையில் உருவாக்கி அசத்தி உள்ளார். இதில், 4 யு.எஸ்.பி., இன்டர்நெட் கனெக்டர், ஹெட்போன் உட்பட, ஏழு வகை ஸ்லாட்கள், வைபை, ப்ளூடூத் வசதிகள் உள்ளன. இன்டெலுக்கு அடுத்ததாக, ப்ராட்காம் சாப்ட்வேரில் செயல்படுகிறது. இதில் கேம்ஸ், இன்டர்நெட், மொழிகள், பில்லிங் உள்ளிட்ட வசதிகள் உள்ளன.
இவரது, https:/robotrishi2020.wixsite.com/robonautics என்ற இணையதளத்தில், தான் உருவாக்கிய ஆப் மற்றும் செயல்பாடுகளை பதிவு செய்து வருகிறார்.'ரோபோனாட்டிக்ஸ்' என்ற கம்பெனியை உருவாக்கி, நடத்தி வரும் மாணவர் ரிஷிகுமார் கூறியதாவது:

'இன்டர்நெட் மூலம் ஆப்களை உருவாக்கவும், ரோபோக்களை செயல்படுத்தும் புரோகிராம்களை உருவாக்கவும் கற்றேன். 'மோஷன் ட்ரேடர்' ஆப் முதலில் உருவாக்கி, அதை கூகுள் பிளே ஸ்டோரில் பதிவு செய்து, செயல்படுத்தினேன்.
நான் உருவாக்கி உள்ள ஜார்விஸ் மினி சி.பி.யு.,வை, குறைந்த விலைக்கு விற்பதன் மூலம் மாதம், 2.50 லட்சம் ரூபாய் சம்பாதிக்கிறேன். இதில், 50 சதவீத தொகையை என் கண்டுபிடிப்புகளுக்கும், 30 சதவீதத்தை ஆதரவற்றோர், ஏழை மாணவர்கள் கல்வி செலவுக்கும் உதவி வருகிறேன்.
நோபல் பரிசுக்கு பரிந்துரைக்கப்பட்ட, கென்விதானே படேல் கம்பெனியில், சி.இ.ஓ.,வாக பணியாற்ற, எனக்கு அழைப்பு வந்துள்ளது. மேலும், பல கம்பெனிகளில் வேலை வாய்ப்புகள் தேடி வருகின்றன, என்றார்.