ரஷ்ய பல்கலைகளில் சேர்வது எப்படி? 3 நகரங்களில் கல்வி கண்காட்சி

Added : ஜூன் 07, 2018 01:06

சென்னை:தமிழக மாணவர்கள் ரஷ்ய கல்வி நிறுவனங்களில், மருத்துவம், இன்ஜினியரிங் படிப்புகளில் சேர உதவும் வகையில், ரஷ்ய துாதரகம் சார்பில், சென்னை, சேலம், திருச்சியில் கண்காட்சி நடத்தப்படுகிறது.
ரஷ்ய கூட்டமைப்பின், தென்னிந்திய துாதரக கலாசார பிரிவு துணை துாதர், மிகைல் கார்ப்டோவ், துணை துாதர், யூரி பிலோவ், நேற்று நிருபர்களுக்கு அளித்த பேட்டி:ரஷ்ய உயர்கல்வி கண்காட்சி, தமிழகத்தில், 20ம் ஆண்டாக நடத்தப்படுகிறது. சென்னை, ஆழ்வார்பேட்டையில் உள்ள, ரஷ்ய கலாசார மையத்தில், வரும், 9, 10ம் தேதிகளில் கண்காட்சி நடத்தப்படும்.
சேலம், ஜி.ஆர்.டி., கிராண்ட் ஸ்டான்சியா ஓட்டலில், ஜூன், 11; திருச்சி, ரம்யாஸ் ஓட்டலில், ஜூன், 12ல் கல்வி கண்காட்சி நடத்தப்படும்.ரஷ்யாவின் பிரபலமான, 10க்கும் மேற்பட்ட பல்கலைகளின் பிரதிநிதிகள் பங்கேற்கின்றனர். ரஷ்ய பல்கலைகளில் படிக்க விரும்புவோருக்கு, சி.இ.டி., மற்றும், ஐ.இ.எல்.டி.எஸ்., போன்ற முன்தகுதி தேர்வுகள் தேவையில்லை. மருத்துவ படிப்பு படிக்க, இந்தியாவில் நடத்தப்படும், 'நீட்' தேர்வில் தேர்ச்சி பெற்றிருக்க வேண்டும்.நான்கு ஆண்டு கால, இன்ஜினியரிங் படிப்பு மற்றும் ஆறு ஆண்டு கால மருத்துவ படிப்புக்கு முன், ரஷ்ய மொழி முன் தயாரிப்பு படிப்பை, ஓராண்டு படித்திருக்க வேண்டும்.

இந்திய மாணவர்களுக்கு, ரஷ்ய அரசு, கல்வி கட்டண சலுகை வழங்கு கிறது. இதற்கான விபரங்களை, கண்காட்சியில் தெரிந்து கொள்ளலாம்.இவ்வாறு அவர்கள் கூறினர்.