நாளை திருக்கல்யாணம் : மதுரை விழாக்கோலம்

Added : ஏப் 26, 2018 04:03

மதுரை: மதுரை மீனாட்சி அம்மன் கோவில் சித்திரை திருவிழாவில், முத்திரை பதிக்கும் நிகழ்வாக மீனாட்சி சொக்கர் திருக்கல்யாணம், நாளை காலை, 9:05 மணிக்கு மேல், 9:29 மணிக்குள் நடக்கிறது. விழாவை முன்னிட்டு மதுரை விழாக்கோலம் பூண்டது.மீனாட்சி அம்மனுக்கு நேற்று பட்டாபிஷேகம் நடந்தது. மீனாட்சி அம்மன் திக்கு விஜயம் இன்று நடக்கிறது.

200 டன், 'ஏசி' : மீனாட்சி சொக்கர் திருக்கல்யாணம் நாளை காலை, 9:05 மணிக்கு மேல், 9:29 மணிக்குள் நடக்கிறது. இதற்காக மணமேடை வண்ண மலர்கள், வெட்டி வேர்களால் அலங்கரிக்கப்பட்டு வருகிறது. 200 டன், 'ஏசி' வசதி செய்யப்பட்டுள்ளது. திருக்கல்யாணம், எல்.இ.டி., அகண்ட திரை களில் கோவிலுக்குள், வெளியே நேரடி ஒளிபரப்பு செய்யப்படும். வரும், 28 காலை, 6:00 மணிக்கு தேரோட்டம் நடக்கிறது.

மதுரை சித்திரை திருவிழாவில், கள்ளழகர் ஆற்றில் இறங்கும் நிகழ்ச்சிக்காக ஆண்டுதோறும் வைகை அணையிலிருந்து தண்ணீர் திறக்கப்படும். கடந்த ஆண்டு, நீர் இருப்பு குறைவாக இருந்ததால் திறக்கப்படவில்லை.
நாளை நீர் திறப்பு : சில நாட்களாக, பெரியாறு அணையில் இருந்து வைகை அணைக்கு நீர் வரத்து தொடர்கிறது. இதனால், அணை நீர் மட்டம் நேற்று, 37.96 அடியாக உயர்ந்தது.வரும், 30ல் கள்ளழகர் ஆற்றில் இறங்கும் நிகழ்ச்சிக்காக, வைகை அணையில் இருந்து, நாளை காலை, 6:00 மணிக்கு தண்ணீர் திறக்கப்பட உள்ளது, என, பொதுப்பணித் துறையினர் தெரிவித்தனர்.