அடிச்சது 2 மணி நேரம்; ரெஸ்ட் ஒரு மணி நேரமா?’ - வடிவேலு காமெடி நிஜமான கதை
 
விகடன் 16 hrs ago

 


கலவரத்தை அடக்க ஒரு திரைப்படத்தில் ஏட்டு வடிவேலு வித்தியாசமான கெட்டப்பில் போவார். சீருடை அணியாத அவரை மற்ற போலீஸார் அடித்து துவைத்து தொங்கப் போட்டுவிடுவார்கள். அதேபோல நிஜத்திலும் ஒரு சம்பவம் நிகழ்ந்துள்ளது. சென்னையில் நேற்று கோட்டையை முற்றுகையிட ஜாக்டோ- ஜியோ அமைப்பினர் முயன்றனர். போராட்டத்தில் ஈடுபட்டவர்களைப் போலீஸார் கைது செய்தனர். சம்பவ இடத்தில் சி.பி.சி.ஐ.டி போலீஸ் சுப்புராஜ் என்பவர் வெள்ளை உடையுடன் கண்ணாடி அணிந்து துப்பறியும் பணியில் ஈடுபட்டுக்கொண்டிருந்தார்.

இந்தச் சமயத்தில் பல இடங்களில் ஓடி ஒளிந்த ஆசிரியர்களையும் அரசு அலுவலர்களையும் போலீஸார் விரட்டி விரட்டி கைது செய்து போலீஸ் வேனில் ஏற்றிக்கொண்டிருந்தனர். சுப்புராஜும் பார்ப்பதற்கு ஆசிரியர்போல காணப்பட்டதால், போலீஸார் அவரையும் வேனில் ஏறுமாறு கூறினர். அவரோ... 'சார் நான் போலீஸ் நான் போலீஸ்' என்று கத்தினார். அதை, காதில் வாங்கிக்கொள்ளாத இன்ஸ்பெக்டர் ஒருவர் சுப்புராஜுவின் கன்னத்தில் ஓங்கி அடித்து போலீஸ் வேனில் ஏற்ற முயன்றார். அடிவாங்கிய பின்னரே, தன் அடையாள அட்டையை எடுத்து சுப்புராஜ் காட்டினார். அதைப் பார்த்து அதிர்ச்சியடைந்த போலீஸார், 'முதலிலேயே உங்க அடையாள அட்டையைக் காண்பிச்சுருக்கலாமே' என்றவர்கள் தலையைச் சொறிந்தனர். பின்னர், அடித்தற்காக சி.பி.சி.ஐ.டி உதவி ஆய்வாளரான சுப்புராஜிடம் மன்னிப்புக் கேட்டுக்கொண்டு நழுவினார். 'தனக்கு நேர்ந்த கொடுமையை எங்கே போய் சொல்வது' என்று நொந்தவாறு சுப்புராஜும் இடத்தைக் காலி செய்தார்.