இரு போக்குவரத்து கழகங்கள் இணைப்பு

Added : மே 12, 2018 02:09

சென்னை: நிதி நெருக்கடியை சமாளிக்க, அரசு போக்குவரத்து கழகங்களான, நெல்லை போக்குவரத்துக் கழகம், மதுரை போக்குவரத்துக் கழகத்துடன் இணைக்கப்பட்டுள்ளது. இதற்கான, அரசாணை நேற்று வெளியிடப்பட்டுள்ளது.திண்டுக்கல், விருதுநகர், தேனி மற்றும் மதுரை மாவட்டங்களுக்கு, மதுரை போக்குவரத்துக் கழகமும், கன்னியாகுமரி, துாத்துக்குடி மற்றும் நெல்லை மாவட்டங்களுக்கு, நெல்லை போக்கு வரத்துக் கழகமும் அரசு பஸ்களை இயக்கி வந்தன.இந்நிலையில், நெல்லை போக்குவரத்துக் கழகம், கடனை திருப்பி செலுத்த முடியாமல், நிதி நெருக்கடியில் சிக்கி தவிப்பதாக, 2016, மார்ச்சில் நடந்த, இயக்குனர்கள் குழு கூட்டத்தில் தெரிவிக்கப்பட்டது. இதற்கு தீர்வு காண, நெல்லை போக்குவரத்துக் கழகத்தை, மதுரை போக்குவரத்துக் கழகத்துடன் இணைக்கலாம் என, ஆலோசனை முன் வைக்கப்பட்டது.இதற்கான சாத்தியக்கூறுகளை ஆய்வு செய்ய, போக்குவரத்து துறை தலைவர் உள்ளிட்ட, ஆறு பேர் குழு அமைக்கப்பட்டது. அந்த குழு, 'நெல்லை போக்குவரத்துக் கழகத்தை, மதுரை போக்குவரத்துக் கழகத்துடன் இணைக்க வேண்டும்; இல்லாவிட்டால், நெல்லை போக்குரவரத்துக் கழகத்தை நடத்த முடியாது' என, அறிக்கை அளித்தது.இதைத்தொடர்ந்து, இரண்டு போக்குவரத்துக் கழகங்களையும் இணைக்க, அவற்றின் இயக்குனர்களுக்கு அரசு உத்தரவிட்டுள்ளது. இதற்கான அரசாணையை, தமிழக அரசு நேற்று வெளியிட்டுள்ளது.