வரத்து குறைவால் சின்ன வெங்காயம் விலை உயர்வு: ஆக.15 வரை நீடிக்கும் என தகவல்

By DIN | Published on : 02nd July 2017 12:23 AM |

வரத்து குறைந்ததால் சின்ன வெங்காயம் விலை கிலோ ரூ.120-க்கு விற்பனை செய்யப்படுகிறது. ஆகஸ்ட் 15 வரை இந்த நிலை நீடிக்கும் என வியாபாரிகள் தெரிவித்தனர்.

விருதுநகர் மாவட்டம் மட்டுமல்லாது தமிழகம் முழுவதும் தற்போது சின்ன வெங்காய வரத்து குறைந்துள்ளது. தமிழகத்தில் சத்தியமங்கலம், பொள்ளாச்சி மற்றும் மேற்கு தொடர்ச்சி மலையை ஒட்டிய கேரளா மற்றும் ஆந்திர பகுதிகளில் ஆண்டு தோறும் அதிகளவு சின்ன வெங்காயம் பயிரிடப்படும். கடந்தாண்டு மழை பொய்த்ததால், இப்பகுதியில் வெங்காய விவசாயம் பாதி அளவிற்கு குறைந்து விட்டது. மேலும், கோடை காலத்தில் அதிகளவு வெப்பம் காரணமாக எதிர்பார்த்த அளவு மகசூல் கிடைக்க வில்லை. இதனால், 100 மூட்டைகள் வர வேண்டிய இடத்தில் 50 மூட்டைகள் மட்டுமே வருகின்றன. இதன் காரணமாக சின்ன வெங்காயம் கிலோ ரூ. 120 வரை விற்பனை செய்யப்படுறது.

அதே சமயம் பல்லாரி வரத்து அதிகரித்துள்ளது. அது கிலோ ரூ. 20-க்கு விற்பனை செய்யப்படுவதால் பொதுமக்கள் மட்டுமல்லாது, ஓட்டல் நடத்துபவர்களும் அதை வாங்கி பயன்படுத்த தொடங்கி விட்டனர். மேலும், சின்ன வெங்காயம் விலை உயர்வு ஆகஸ்ட் 15-ஆம் தேதி வரை குறைவதற்கான வாய்ப்பில்லை என விருதுநகர் மொத்த வெங்காய வியாபாரிகள் தெரிவித்தனர்.