இலவச கேஸ் திட்டம்: ஆதாரை இணைக்க செப்.30 வரை நீட்டிப்பு


பதிவு செய்த நாள்06ஆக
2017
05:02




புதுடில்லி:இலவச சமையல் கேஸ் திட்டத்தில் ஆதாரை இணைக்க காலக்கெடுவை செப்டம்பர் 30ந் தேதி வரை நீட்டித்து மத்திய அரசு அறிவித்துள்ளது.வறுமைக்கோட்டுக்கு கீழ் வாழும் குடும்பங்களுக்கு இலவசமாக சமையல் கியாஸ் இணைப்பு வழங்கும் வகையில் 'பிரதம மந்திரி உஜ்வாலா யோஜனா' என்ற திட்டம் கடந்த ஆண்டு தொடங்கப்பட்டது.

இந்த திட்டத்தின் கீழ் 5 கோடி ஏழை பெண்களுக்கு 3 ஆண்டுகளுக்குள் இலவச கியாஸ் இணைப்பு வழங்க இலக்கு நிர்ணயிக்கப்பட்டு உள்ளது.இந்த திட்ட பயனாளிகளுக்கு ஆதார் கட்டாயம் என கடந்த மார்ச் மாதம் அறிவித்த மத்திய அரசு, இந்த திட்டத்துக்கு விண்ணப்பிப்போர் தங்கள் விண்ணப்பத்துடன் ஆதாரை இணைக்க வேண்டும் அல்லது மே 31ந் தேதிக்குள் ஆதாருக்கு விண்ணப்பித்து அதற்கான பதிவு அட்டை அல்லது விண்ணப்ப நகலை கேஸ் இணைப்பு விண்ணப்பத்துடன் இணைக்க வேண்டும் என அறிவித்தது.

இந்த காலக்கெடுவை தற்போது அடுத்த மாதம் (செப்டம்பர்) 30ந் தேதி வரை நீட்டித்து மத்திய அரசு அறிவிப்பு வெளியிட்டு உள்ளது. அதன்படி இலவச கேஸ் இணைப்புக்கு விண்ணப்பிக்க விரும்பும் வறுமைக்கோட்டுக்கு கீழ் உள்ள பெண்கள், தங்களிடம் ஆதார் அட்டை இல்லாதபட்சத்தில் அடுத்த மாதம் 30ந் தேதிக்குள் அதற்காக விண்ணப்பித்து அதன் நகலை இணைத்துக்கொள்ளலாம் என அறிவிக்கப்பட்டுள்ளது.