அடிக்கடி பழுதாகி நிற்கும் அரசு பஸ்களால் தவிப்பு:என்று தீரும் இந்த சோகம்: பயணிகள் கொதிப்பு

பதிவு செய்த நாள்14ஜூன்2017 02:12

முதுகுளத்துார்;முதுகுளத்துார், கமுதி பகுதிகளில் அடிக்கடி நடுவழியில் பழுதாகி நிற்கும் அரசு பஸ்களால் வெளியூர்களுக்கு குறித்த நேரத்தில் செல்ல முடியாமல் பயணிகள் தவிக்கின்றனர்.முதுகுளத்துார், கமுதியிலிருந்து மதுரை, ராமேஸ்வரம், சென்னை, திருநெல்வேலி, கோவை உட்பட தமிழகத்தின் முக்கிய பகுதிகளுக்கு அரசு பஸ்கள் இயக்கப்படுகிறது. கிராம புறங்களுக்கு இயக்கப்படும் அரசு பஸ்களின் மேற்கூரை சேதத்தால் மழை, வெயில் காலங்களில் பயணிகள் பஸ்களில் பயணிக்க முடியாமல் எரிச்சலில் உள்ளனர். பாடாவதியான அரசு பஸ்களால், தனியார் பஸ்களின் வசூல் அதிகரித்துள்ளதால், அரசு போக்குவரத்து கழகம் நஷ்டத்தில் உள்ளது. நேற்று அருப்புக்கோட்டையிலிருந்து கமுதி, முதுகுளத்துார், ராமநாதபுரம் வழியாக ராமேஸ்வரத்துக்கு மதியம் 2:00 மணிக்கு சென்ற அரசு பஸ், பேரையூர் பஸ் ஸ்டாப்பில் நடுரோட்டில் பழுதாகி நின்றது. இதனால் ராமேஸ்வரம் கோயில், ராமநாதபுரம் மாவட்ட தலைமை அலுவலகங்களுக்கு சென்ற அரசு அலுவலர்கள், பணியாளர்கள், பயணிகள் குறித்த நேரத்திற்குள் செல்ல முடியாமல் தவித்தனர்.

இதுகுறித்து ராமநாதபுரம் கஜேந்திரன் கூறுகையில், “ உறவினர் இல்ல விழாவிற்கு செல்ல அரைநாள் விடுப்பு எடுத்து, மதியம் 3 :00 மணிக்குள் ராமநாதபுரம் அலுவலகத்திற்கு சென்றுவிடலாம் என அரசு பஸ்சில் பயணித்தால், பாடாவதியாக நடுவழியில் பழுதாகி நின்றது. இதனால் குறித்த நேரத்திற்கு அலுவலகத்திற்கு செல்ல முடியாமல் இழப்பு ஏற்பட்டு, அதிகாரிகளின் நடவடிக்கைக்கு ஆளாகும் அவலம் உள்ளது”, என்றார்.