படுத்திய மோதிரம்: பதறிய மாப்பிள்ளை
பதிவு செய்த நாள்
ஆக 19,2017 00:32


திருவனந்தபுரம்: திருவனந்தபுரம் நெடுமங்காட்டை சேர்ந்த ஜோனி ஜோன்ஸ் என்பவரின் திருமணம் காயங்குளத்தில் நடந்தது. திருமண மண்டபத்தில் மணமக்களுடன் உறவினர்கள் போட்டோ எடுத்துக் கொண்டிருந்தனர். நேரம் செல்லசெல்ல மாப்பிள்ளையின் முகம் இறுக்கமாக மாறுவதை கண்ட புகைப்பட கலைஞர், விசாரித்தார். 'நண்பர் ஒருவர் போட்ட மோதிரம் விரலில் இறுகி வீக்கம் ஏற்பட்டு வலி இருக்கிறது' என மாப்பிள்ளை கூறினார். இதையடுத்து விரலில் மோதிரத்தை கழற்றும் முயற்சி நடந்தது; ஆனால் முடியவில்லை. தீயணைப்பு நிலையத்துக்கு தகவல் கொடுக்கப்பட்டது. அத்துறை வீரர்கள் 'கட்டர்' மூலம் மோதிரத்தை வெட்டி எடுத்தனர். அதன் பிறகே மாப்பிள்ளை முகத்தில் சிரிப்பை பார்க்க முடிந்தது.