வேலூர் மத்திய சிறையில் இன்று ஜீவசமாதி அடைவதில் முருகன் உறுதி

2017-08-18@ 00:41:58




வேலூர் : வேலூர் சிறையில் ஆயுள் தண்டனை கைதி முருகன் இன்று ஜீவசமாதி அடைவதில் உறுதியாக உள்ளதாகவும், அவரை தீவிர கண்காணிப்பின்கீழ் வைத்திருப்பதாகவும் சிறைத்துறை நிர்வாகம் தெரிவித்துள்ளது. முன்னாள் பிரதமர் ராஜிவ்காந்தி கொலை வழக்கில் முருகன், பேரறிவாளன், சாந்தன் ஆகியோர் வேலூர் மத்திய சிறையில் ஆயுள் தண்டனை அனுபவித்து வருகின்றனர். முருகனின் மனைவி நளினி, வேலூர் பெண்கள் தனிச்சிறையில் தண்டனை அனுபவித்து வருகிறார். இவர்களில் முருகன், ஆகஸ்ட் 18ம் தேதியன்று சிறையிலேயே ஜீவசமாதி அடைய தன்னை அனுமதிக்க வேண்டும் என்று கடந்த மாதம் சிறைத்துறை ஏடிஜிபி அலுவலகத்திற்கு மனு அளித்தார்.

இதைத்தொடர்ந்து, பழங்களை மட்டுமே உணவாக உட்கொண்டு வந்தார். அவரிடம் சிறைத்துறை போலீசார் நேற்று பேச்சுவார்த்தை நடத்தினர். அப்போது முருகன், ஜீவ சமாதி அடைவது உறுதி என்று போலீசாரிடம் தெரிவித்ததாக கூறப்படுகிறது. இதனால் சிறைத்துறை போலீசார் முருகன் அடைக்கப்பட்டுள்ள உயர்பாதுகாப்பு பிரிவில், அவருடன் தங்கி உள்ள கைதிகள் மூலமும், சிறைத்துறை போலீசாரும் தீவிரமாக கண்காணித்து வருவதாக சிறைத்துறை அதிகாரிகள் தெரிவித்தனர். மேலும், ஜீவசமாதி அடைவதை தடுக்கும் விதமாக போலீசார் தொடர்ந்து பேச்சுவார்த்தை நடத்தி வருகின்றனர்.