சரியாக செயல்படாத கல்லூரி: பல்கலைகளை மூட திட்டம்

புதுடில்லி;சரியாக செயல்படாத, கல்லுாரி, பல்கலைகளை மூட அல்லது மற்றொரு கல்லுாரி, பல்கலையுடன் இணைக்க, மத்திய அரசு திட்டமிட்டுள்ளது.யு.ஜி.சி., எனப்படும் பல்கலை மானியக் குழு நிர்வாகத்தில் பல்வேறு மாற்றங்கள் மேற்கொள்ளப்படுகின்றன. இதற்கிடையே, நாடு முழுவதும் உள்ள கல்லுாரி, பல்கலைகளின் தரத்தை ஆராய, மத்திய மனிதவள மேம்பாட்டு துறை திட்டமிட்டுள்ளது.

இது குறித்து அதிகாரிகள் கூறியதாவது:பல்கலைகள் மற்றும் கல்லுாரிகள் மூன்று பிரிவுகளாக தரம் பிரிக்கப்பட உள்ளன. இதற்காக ஒவ்வொரு பல்கலை மற்றும் கல்லுாரிகளில் ஆய்வு மேற்கொள்ளப்படும். மிகச் சிறந்தவை, மேம்படுத்த வாய்ப்புள்ளவை, மிக மோசமானவை என, மூன்று வகைகளாக தரம் பிரிக்கப்படும்.மிகச் சிறந்த கல்லுாரிகளுக்கு கூடுதல் வசதிகள், மானியங்கள் வழங்கப்படும். மேம்படுத்த வாய்ப்புள்ள கல்லுாரி அல்லது பல்கலைக்கு, என்னென்ன முன்னேற்றங்கள் மேற்கொள்ள முடியும் என்ற ஆலோசனை வழங்கப்படும்.

மிக மோசமானவை பிரிவில் உள்ள கல்லுாரி, பல்கலைக்கு கடைசியாக ஒரு வாய்ப்பு அளிக்கப்படும். யு.ஜி.சி.,யின் கட்டுப்பாட்டில் இவற்றை மேம்படுத்த வாய்ப்பு அளிக்கப்படும். அதன்பின்னும், முன்னேற்றம் ஏற்படாதபட்சத்தில், அவை மூடப்படும் அல்லது மற்றொரு கல்லுாரியுடன் இணைக்கப்படும்.இவ்வாறு அதிகாரிகள் தெரிவித்தனர்.