தெரிந்த பெயர், தெரியாத விவரம்: சென்னை முதலைப் பண்ணை

Published on : 22nd November 2017 04:23 PM  

* "புலி இருக்கும் காடு மிகவும் வளமானது என்பது எவ்வளவு உண்மையோ, அதே அளவு உண்மை முதலை இருக்கும் நீர்நிலை மிகவும் தூய்மையானது என்பதும்'. அப்படிப்பட்ட முதலைகளை காத்து பராமரித்து வருகிறது The Madras Crocodile Bank எனப்படும் "சென்னை முதலைப் பண்ணை'.

* சென்னையில் இருந்து மகாபலிபுரம் செல்லும் கிழக்கு கடற்கரைச் சாலையில் வடநெம்மேலியில் அமைந்துள்ள இந்த முதலைப் பண்ணை 1976-ஆம் ஆண்டு தொடங்கப்பட்டது.

* அமெரிக்கரான ரோமுலஸ் விட்டேகரும் அவரது மனைவி சாய் விட்டேகரும் இணைந்து இந்தப் பண்ணையை ஆரம்பித்தனர்.

* பிறப்பால் அமெரிக்கரான விட்டேகர், ஏழு வயதிலேயே குடும்பத்துடன் இந்தியாவுக்குக் குடிபெயர்ந்தவர். முதலை, பாம்புகள் ஆகியவை குறித்து ஆழமான ஆய்வுகளை மேற்கொண்டவர்.

* உலகின் மிகச் சிறந்த ஊர்வனவியலாளர்கள் பட்டியலைத் தயாரித்தால், அதில் முதன்மை இடங்களில் இடம்பிடித்திருக்கும் பெயர் சென்னையின் ரோமுலஸ் விட்டேகர்.

* 2005- ஆம் ஆண்டு "பசுமை ஆஸ்கர்' எனப்படும் மிக உயரிய விருதான "ஒய்ட்லி' விருதைச் சுற்றுச்சூழல் பாதுகாப்புக்காகப் பெற்றார்.

* அழியும் நிலையில் உள்ள முதலைகளைக் காப்பாற்றும் ஒரு மரபணு வங்கியாக இந்தப் பண்ணை திகழ்கிறது. ஆரம்பக் காலத்தில் இவ்வாறு அழிவு நிலையில் உள்ள முதலைகளை "அடைப்பிட இனப்பெருக்கம்' மூலம் வளர்த்து, பின் அவற்றைக் காடுகளில் உள்ள நீர்நிலைகளில் விட்டுவந்தனர்.

* இப்போது காடுகளின் பரப்பளவு குறைந்துவரும் காரணத்தால் முதலைகளை முன்பு போல இயற்கையான வாழிடத்துக்கு அனுப்ப முடிவதில்லை.

* 3000-க்கும் மேற்பட்ட முதலைகள் இங்கு உள்ளன.

* உலகளவில் 23 வகை முதலைகள் இருக்கின்றன. அதில் 17 வகையான முதலைகள் இங்கு உண்டு.

* முதலையின் பார்வை சக்தி கூர்மையானது. சதுப்புநில முதலை 300 அடிக்கு அப்பாலுள்ள இரையைக்கூட கண்டுபிடிக்கும் திறன் கொண்டது.

* தண்ணீரில் மூழ்கியிருக்கும்போதும் கூட முதலையால் ஒலியைத் துல்லியமாகக் கேட்க முடியும்.

* பிரதான உணவு மீன். தவிர, தவளை, நண்டு வகைகள், ஆமைகள், பறவைகள் மற்றும் சிறு பாலூட்டிகளையும் உண்ணும்.

* சதுப்பு நில மற்றும் உப்புநீர் முதலைகளால் மான், குரங்கு, நாய், எருமை போன்ற பெரிய மிருகங்களைக் கூட உண்ண முடியும்.

* உப்புநீர் முதலை மற்றும் நைல் முதலை மனிதனைத் தின்றதாக செய்திகள் உள்ளன. ஆனால், சதுப்புநில முதலைகள் மனிதனைத் தின்றதாக போதிய ஆதாரம் இல்லை.

* முதலைகள் தண்ணீருக்கு அடியில் உள்ள நிலத்தில் முட்டையிடுகின்றன. சதுப்பு நில முதலை மண்ணில் குழிதோண்டி முட்டைகளைப் புதைக்கின்றன. உப்புநீர் முதலை இலை மற்றும் மண்ணால் கூடுகட்டி முட்டையிடுகின்றன.

* ஒரு முதலையின் வாழ்நாளில் 5 ஆயிரம் முதல் 7 ஆயிரம் பற்கள் வளரும். காரணம், அடிக்கடி கடிப்பதால் அதன் பற்கள் உடைந்து உள்ளிருந்து வளர்ந்து கொண்டே இருக்கும்.

* முக்கர் முதலை, செம்மூக்கு முதலை, கரியால், யாக்கரே கைமன், குட்டை கைமன், அமெரிக்க முதலை, சியாமிய முதலை, நைல் முதலை, கருமுதலை ஆகியவை பண்ணையில் உள்ளன.

* பாம்புகளில் கருநாகம், இந்திய மலைப் பாம்பு, ராஜ மலைப்பாம்பு வெளிறிய இந்திய நாகம், 5 அனகோண்டா ஆகியவை உள்ளன.

* இதுதவிர நீர் உடும்புகள் மற்றும் கொமோடோ ராட்சத பல்லி இந்தோனேசியாவில் இருந்து வரவைக்கப்பட்டுள்ளது.

* ஆமைகள், பல்லி இனங்கள், பாம்புகள் ஆகியவையும் உள்ளதால் 2003-ஆம் ஆண்டு முதல் இந்தப் பண்ணைக்கு "தி மெட்ராஸ் க்ரோக்கடைல் பேங்க் டிரஸ்ட் மற்றும் சென்டர் ஃபார் ஹெபர்டாலஜி' எனப் பெயர் வைத்தனர்.

* சென்னை முதலைப் பண்ணை காலை 8.30 மணி முதல் மாலை 5.30 மணி வரை திறந்திருக்கும். திங்கட்கிழமை வார விடுமுறை.

* பெரியவர்களுக்கு ரூ. 40 ரூபாயும், குழந்தைகளுக்கு ரூ.20 ரூபாயும் பார்வையாளர் கட்டணமாக வசூலிக்கிறார்கள்.

* தினசரி இரவு 7 முதல் 8.30 மணி வரை "நைட் சஃபாரி' என்ற இரவு நேர அனுபவத்தைக் கொடுக்கிறார்கள். இதற்கு முன்கூட்டியே முன்பதிவு செய்ய வேண்டும். பெரியவர்களுக்கு ரூ.200, குழந்தைகளுக்கு ரூ.100.

* ஆண்டுக்கு சுமார் 4 லட்சம் பேர் இந்தப் பண்ணையைப் பார்வையிடுகிறார்கள்.

* முதலைப் பண்ணைக்கு வரும் பார்வையாளர்களுக்கு இங்கிருக்கும் உயிரினங்களைப் பற்றி பொறுமையாக விளக்கம் கொடுக்கப்படுகிறது.

* உயிரினங்களைத் தத்தெடுப்பது, ஒருநாள் விலங்கு காட்சி சாலைப் பொறுப்பாளராக இருப்பதற்கான வாய்ப்புகளை வழங்குவது, ஊர்வன பாதுகாப்பு தொடர்பான வகுப்புகளும் நடத்தப்படுகிறது.
- ஆர்.ஜி.ஜெகதீஷ்