1 கிலோ 10 ரூபாய்! தக்காளி விலை சரிவு
பதிவு செய்த நாள்03அக்
2017
00:01

வரத்து அதிகரிப்பின் காரணமாக, சென்னையில், 1 கிலோ தக்காளி, 10 ரூபாய்க்கு விற்பனைசெய்யப்படுகிறது.தமிழகத்தில், தர்மபுரி, கிருஷ்ணகிரி, சேலம், தேனி, கோவை மாவட்டங்களில், தக்காளி அதிகளவில் சாகுபடி செய்யப்படுகிறது. மேலும், தமிழகத்தின் தேவைக்காக, கர்நாடகா, ஆந்திர மாநிலங்களில் இருந்தும் வரத்து உள்ளது. தற்போது, தமிழகம் மட்டுமின்றி, கர்நாடகாவிலும், ஆந்திராவிலும் தக்காளி விளைச்சல் களை கட்டி வருகிறது. இதன் எதிரொலியாக, அவை அதிகளவில் அறுவடை செய்யப்பட்டு வருகின்றன. சென்னை கோயம்பேட்டிற்கு மட்டும், நாள்தோறும், 60க்கும் மேற்பட்ட லாரிகளில், தக்காளி வரத்து உள்ளது.வரத்து அதிகரிப்பால், அவற்றின் விலை கடும் வீழ்ச்சி அடைந்து வருகிறது. 1 கிலோ தக்காளி, சில்லரை விலையில், 10 - 20 ரூபாய்க்கு விற்கப்படுகிறது.தக்காளிக்கு உரிய விலை கிடைக்காததால், விவசாயிகள் மற்றும் வியாபாரிகள் ஏமாற்றம் அடைந்துள்ளனர்.

- நமது நிருபர் -