கோவை - ஜபால்பூர்: சிறப்பு ரயில் இயக்கம்

பதிவு செய்த நாள்15செப்
2017
22:42

கோவை:பயணிகளின் தேவை கருதி கோவை - ஜபால்பூர் இடையே, வாராந்திர சிறப்பு ரயில், வரும், 30ம் தேதி முதல் அக்., 30ம் தேதி வரையும், ஹவுரா - திருவனந்தபுரம் இடையே கோவை வழியாக சிறப்பு ரயிலும் இயக்கப்படுவதாக தெற்கு ரயில்வே அறிவித்துள்ளது.

ரயில்வே ஸ்டேஷன்களில் கூட்ட நெரிசலை கட்டுப்படுத்தும் விதமாக சிறப்பு ரயில்கள் அவ்வப்போது இயக்கப்படுவது வழக்கம். இந்நிலையில், கோவை - ஜபால்பூர் (மத்தியபிரதேசம்) இடையே வரும், 30ம் தேதி முதல் அக்., 30ம் தேதி வரை வாராந்திர சிறப்பு ரயில் சேவை வழங்கப்படுகிறது.

ஜபால்பூரில் இருந்து வாரந்தோறும் சனிக்கிழமை காலை, 11:00 மணிக்கு புறப்படும் ரயில், உடுப்பி, மங்களூர், கோழிக்கோடு, பாலக்காடு உள்ளிட்ட ஸ்டேஷன்களின் நின்று ஒரு நாள் கழித்து திங்கள் காலை, 5:00 மணிக்கு கோவை வந்தடைகிறது. இந்த ரயில் வரும், 30 முதல் அக்., 28ம் தேதி வரை இயக்கப்படுகிறது.அதேபோல், கோவையில் இருந்து அக்., 2ம் தேதி முதல், 30ம் தேதி வரை ஜபால்பூருக்கு ரயில் இயக்கப்படுகிறது. வாரந்தோறும் திங்கட்கிழமை இரவு, 7:00 மணிக்கு கோவையில் இருந்து புறப்படும் ரயில், போத்தனுார், பாலக்காடு, மடகான், ஹர்டா உள்ளிட்ட ஸ்டேஷன்களில் நின்று ஒரு நாள் கழித்து, புதன் மதியம், 12:45 மணிக்கு ஜபால்பூர் சென்றடைகிறது.
அதேபோல், ஹவுரா(கொல்கத்தா) - திருவனந்தபுரம் இடையே வரும், 17 மற்றும், 21ம் தேதிகளில் சிறப்பு ரயில் இயக்கப்படுகிறது. திருவனந்தபுரத்தில் இருந்து, 17ம் தேதி மதியம், 12:40க்கு புறப்படும் ரயில், பாலக்காடு, கோவை, திருப்பூர், சேலம், சென்னை வழியாக, 19ம் தேதி காலை, 10:55 மணிக்கு ஹவுரா சென்றடைகிறது.

மறுமார்கமாக, 21ம் தேதி மதியம், 1:05 மணிக்கு ஹவுராவில் இருந்து புறப்படும் ரயில் மறுநாள் இரவு, 10:35 மணிக்கு திருவனந்தபுரம் செல்லும் என, தெற்கு ரயில்வே அறிவித்துள்ளது.