தொப்பை போலீசாருக்கு ஜனாதிபதி பதக்கம் கிடையாது!
பதிவு செய்த நாள்16செப்
2017
00:18

புதுடில்லி: தொப்பை இல்லாமல், நல்ல உடல் தகுதியுள்ள போலீசாரை மட்டுமே, பதக்கங்களுக்கு பரிந்துரைக்க வேண்டும், என்று மத்திய உள்துறை அமைச்சகம் அறிவித்துள்ளது.

ஆண்டுதோறும், மாநில மற்றும் தேசிய அளவில் சிறப்பாக பணிபுரிந்த, போலீசாருக்கு, ஜனாதிபதி பதக்கம் உள்ளிட்ட பல பதக்கங்கள் வழங்கப்படுகின்றன.

இந்நிலையில், மாநில அரசுகள் மற்றும் மத்திய போலீஸ் அமைப்புகளுக்கு, மத்திய உள்துறை அமைச்சகம் அனுப்பிய சுற்றறிக்கையில் கூறியிருப்பதாவது:

சிறந்த சேவைக்காக பதக்கம் பெறுவதற்கு பரிந்துரைக்கப்படும் போலீசார், அவர்களின் பணி மூப்பு மற்றும் சேவை மட்டுமல்லாமல், நல்ல உடல் தகுதியும் பெற்றிருக்க வேண்டும். தொப்பை இல்லாமல், பதவிக்கு சரியான நபராக இருக்க வேண்டும். தொப்பை உள்ள போலீசாரின் பெயர்கள் பரிசீலனைக்கு அனுப்பக்கூடாது.

போலீசாரின் உடல் தகுதி, ஷேப் - 1, ஷேப் - 2 என இரண்டு விதமாக பிரிக்கப்பட்டுள்ளது. இதில், ஷேப் - 1ல் உள்ள போலீசார் மட்டுமே, ஜனாதிபதி பதக்கம் பெறுவதற்கு பரிசீலிக்கப்படுவர்.
இவ்வாறு அதில் கூறப்பட்டுள்ளது.