தளம் புதிது: படம் பார்க்க வாங்க! ................ சைபர்சிம்மன்

ஹாலிவுட் படங்களின் முன்னோட்டத்தை எல்லாம் ஒரே இடத்தில் பார்க்க முடிந்தால் எப்படி இருக்கும்? ‘ஸ்க்ரீனா' இணையதளம் இதற்கு உதவுகிறது. இந்தத் தளத்தில் புதிதாக வெளியாக உள்ள ஹாலிவுட் படங்களின் முன்னோட்டங்களைப் பார்க்கலாம். அந்தப் படங்கள் தொடர்பான தகவல்களையும் தெரிந்து கொள்ளலாம்.

அது மட்டுமல்லாமல் படத்தின் முன்னோட்டம் பிடித்திருக்கிறதா, அந்தப் படத்தைப் பார்க்க வேண்டும் என்று நினைக்கிறீர்களா, அப்படி எனில் அந்தப் படத்தை மறக்காமல் இருக்கவும் இந்தத் தளம் உதவி செய்கிறது.

முன்னோட்டத்தைப் பார்த்ததும், படத்தைப் பார்க்க விரும்புகிறேன் என தெரிவித்தால் (இதற்காக ஆம் மற்றும் இல்லை என இரண்டு கட்டங்கள் கொடுக்கப்பட்டுள்ளன) அந்தப் படத்தை உடனே உங்கள் விருப்பப் பட்டியலுக்கு மாற்றிக்கொள்ளலாம். இந்தப் பட்டியல் மூலம் முன்னோட்டத்தில் பார்த்து ரசித்த படம் ரிலீசாகும்போது மறக்காமல் இருக்கலாம்.

முன்னோட்டத்தைப் பார்த்தோமே, அது என்ன படம், அடடா மறந்துவிட்டதே என குழம்ப வேண்டிய நிலை இனி இருக்காது என்கிறது இந்தப் புதிய இணையதளம்.

இணையதள முகவரி: http://www.screenah.com/