நீட்' தேர்வு முடிவு வந்தாச்சு விண்ணப்பம் எப்போது?

பதிவு செய்த நாள்24ஜூன்
2017
00:08

சென்னை : 'நீட்' தேர்வு முடிவுகள் வெளியான நிலையில், எம்.பி.பி.எஸ்., படிப்புக்கான விண்ணப்ப வினியோகம் எப்போது துவங்கும் என, மாணவர்கள் எதிர்பார்த்துள்ளனர்.மருத்துவப் படிப்புகளுக்கான நுழைவுத்தேர்வான, 'நீட்' முடிவுகள் நேற்று வெளியாகின. இதனால், விண்ணப்ப வினியோகம் எப்போது துவங்கும் என, மாணவர்கள் எதிர்பார்ப்பில் உள்ளனர். இது தொடர்பாக, தலைமைச் செயலகத்தில், சட்ட நிபுணர்களுடன் சுகாதாரத்துறை அதிகாரிகள் நேற்று மாலை, ஆலோசனை நடத்தினர்.அதுபற்றி, சுகாதாரத்துறை அதிகாரி ஒருவர் கூறியதாவது: முதல்வர் டில்லி சென்றுள்ளார். 'நீட்' தேர்வில், தமிழகத்துக்கு விலக்கு கோரிய, அவசர சட்டத்துக்கு, ஜனாதிபதி ஒப்புதல் அளிக்க, மத்திய அரசிடம் அவர் வலியுறுத்துவார். வரும், 26ம் தேதி, எம்.பி.பி.எஸ்., படிப்புகளுக்கான அறிவிக்கை வெளியிட்டு, 27ம் தேதி முதல், விண்ணப்பம் வினியோகிக்க திட்டமிடப்பட்டுள்ளது.அதேபோல், மத்திய அரசு ஒப்புதல் அளிக்காத பட்சத்தில், 'நீட்' தேர்வு அடிப்படையில், தமிழக பாடத்திட்ட மாணவர்களுக்கு, 85 சதவீதமும், மத்திய பாடத் திட்ட மாணவர்களுக்கு, 15 சதவீதம் உள் ஒதுக்கீடு வழங்க ஆலோசிக்கப்பட்டது. இதற்கான அறிவிப்பு விரைவில் வெளியாகும்.இவ்வாறு அவர் கூறினார்.