முகப்பேர் பகுதிவாசிகள் ரசாயன காற்றால்...பீதி! கண்டு கொள்ளாத மாசு கட்டுப்பாட்டு அதிகாரிகள்

மழைநீர் வடிகாலில் விடப்படும் ரசாயனம் கலந்த கழிவுநீரால், முகப்பேர்வாசிகள் அவதிப்பட்டு வருகின்றனர். ரசாயனம் கலந்த கழிவுநீரை விடும் தொழிற்சாலைகள் மீது நடவடிக்கை எடுக்க, மாசுக் கட்டுப்பாட்டு வாரிய அதிகாரிகள் தயங்கி வருவது, அப்பகுதியினருக்கு, சந்தேகத்தை ஏற்படுத்தியுள்ளது.

அம்பத்துார் தொழிற்பேட்டையில் இருந்து, மதுரவாயல் - பூந்தமல்லி நெடுஞ்சாலை வரை, 4 கி.மீ., துாரத்திற்கு, மழைநீர் வடிகால் அமைந்துள்ளது. இந்த வடிகால் முகப்பேர், 3 மற்றும் 6வது பிளாக் வழியாக செல்கிறது. அங்கு, 300க்கும் மேற்பட்ட குடும்பங்கள் வசிக்கின்றன.

கழிவுநீர்திறந்த நிலையில், உள்ள மழைநீர் வடிகாலில், பல இடங்களில் கழிவுநீர் கலக்கிறது. குறிப்பாக, அம்பத்துார் தொழிற்பேட்டை சுத்திகரிப்பு நிலையத்தில் இருந்து வெளியேறும் ரசாயனம் கலந்த கழிவுநீர், மழைநீர் வடிகாலில் விடப்படுகிறது. 

இந்த ரசாயனம் கலந்த கழிவு நீரிலிருந்து வெளியேறும் ரசாயன வாயு, காற்று மண்டலத்தில் கலக்கிறது. இதனால், 3 மற்றும் 6வது பிளாக்கில் அமைந்துள்ள வீடுகளில் உள்ள, குளிர்சாதன பெட்டி, 'டிவி' போன்ற மின்னணு பொருட்கள் அனைத்தும், அடிக்கடி பழுதடைகின்றன.அதேபோல், வெள்ளி, வெண்கலம், எவர்சில்வர் பாத்திரங்கள், சில நாட்களில் கருமை நிறத்தில் மாறி விடுகின்றன. மேலும், குழந்தைகள் மற்றும் முதியவர்கள் மூச்சுத்திணறல், அலர்ஜி போன்ற நோய்களால் பாதிக்கப்பட்டு வருகின்றனர். இச்சம்பவம் குறித்து, நமது நாளிதழில், 2015 ஜனவரியில் செய்தி வெளியானது.
ரூ.40 கோடிஅதையடுத்து, குடிநீர் வாரியம், மாசு கட்டுப்பாட்டு வாரியம் மற்றும் மாநகராட்சி அதிகாரிகள், அப்பகுதியை ஆய்வு செய்தனர். திறந்த நிலையில் உள்ள மழைநீர் வடிகாலில், சிமென்ட் குழாய் அமைக்க, மழைநீர் வடிகால் துறை சார்பில், 40 கோடி ரூபாய் செலவில், மதிப்பீடு தயாரிக்கப்பட்டது. ஆனால், இன்று வரை, மழைநீர் வடிகால் அமைக்கும் பணிகள் துவங்கப்படவில்லை.

மேலும், மாசுக் கட்டுப்பாட்டு வாரியம் சார்பில், மழைநீர் வடிகாலில், ரசாயனம் கலந்த கழிவுநீரை விட்ட, 15 தொழிற்சாலைகளுக்கு, 'நோட்டீஸ்' வழங்கப்பட்டது. அதன்பின், எந்த நடவடிக்கையும் மேற்கொள்ளவில்லை.பலமுறை கோரிக்கை விடுத்தும், கழிவுநீர் பிரச்னை தீராததை அடுத்து, அப்பகுதிவாசிகள் சாலை மறியல் உள்ளிட்ட, பல போராட்டங்களில் ஈடுபட்டனர். 

மேலும், அரசு விழாவிற்கு வந்த, பால்வளத் துறை அமைச்சர், ரமணாவை முற்றுகையிட்டு, போராட்டத்தில் ஈடுபட்டனர். ஆனால், அரசு அதிகாரிகள், ஏனோ நடவடிக்கை எடுக்கவில்லை.தற்போது, வாடகை வீடுகளில் இருக்கும், பல குடும்பங்கள், வீட்டை காலி செய்து, வேறு இடங்களில் குடியேறி வருகின்றனர். இன்னும், அப்பகுதியில் ரசாயன காற்று பீதி தொடர்ந்து கொண்டே இருக்கிறது.

சந்தேகம்இது குறித்து பகுதிவாசிகள் கூறியதாவது:வாடகைக்கு வசித்தோர், ரசாயன கழிவுநீர் பிரச்னையால், வீட்டை காலி செய்து சென்று விட்டனர். சொந்த வீடு கட்டியுள்ள எங்களை போன்றோர், வேறு இடத்திற்கு செல்ல இயலாமல், இங்கேயே இருக்கிறோம். கழிவுநீரில் இருந்து வரும் ரசாயன காற்றால், நாங்கள் பல்வேறு நோய்களுக்கு உட்படுகிறோம். 

இவ்விவகாரத்தில், குடிநீர் வாரியம், மாநகராட்சி மற்றும் மாசுக் கட்டுப்பாட்டு வாரிய அதிகாரிகள், மாறி மாறி, கையை காட்டி தப்பித்து கொள்கின்றனர். ரசாயனம் கலந்த கழிவுநீரை வெளியேற்றும் தொழிற்சாலைகள் மீது, நடவடிக்கை எடுக்க, மாசு கட்டுப்பாட்டு அதிகாரிகள் தயங்கி வருவது, சந்தேகத்தை ஏற்படுத்துகிறது.இவ்வாறு அவர்கள் கூறினர்.
இது குறித்து மாசுக்கட்டுப்பாட்டு வாரிய அதிகாரி கூறுகையில், 'அப்போது இருந்த அதிகாரிகள், இட மாற்றம் பெற்று சென்று விட்டனர். இந்த பிரச்னைக்கு, அவர்கள் என்ன நடவடிக்கை எடுத்துள்ளனர் என, ஆய்வு செய்கிறோம். மேலும், அந்த பகுதியை உடனடியாக ஆய்வு செய்து தகுந்த நடவடிக்கை எடுக்கப்படும்' என்றார்.

ஆய்வு செய்ய வேண்டும்அப்பகுதி வெளிமண்டலத்தில், துருப்பிடிக்க கூடிய, வாயுக்கள் அதிகமாக இருக்க வாய்ப்புள்ளது. இதனால் தான், வெங்கலம் மற்றும் வெள்ளி பொருட்கள், கருமை நிறத்தில் மாறி விடுகின்றன. இதன் தாக்கம், அப்பகுதிவாசிகளின் நுரையீரலையும் பாதிக்க வாய்ப்புள்ளது. ரசாயனம் கலந்த தண்ணீரை, முறையாக ஆய்வு செய்ய வேண்டும்.வேதியியல் துறை பேராசிரியர்


- நமது நிருபர் -