ஐ.ஆர்.சி.டி.சி., ஊழல் : ரப்ரி தேவிக்கு, 'சம்மன்'
பதிவு செய்த நாள்20செப்
2017
20:41

புதுடில்லி: ஐ.ஆர்.சி.டி.சி., எனப்படும், இந்திய ரயில்வே உணவு வழங்கல் மற்றும் சுற்றுலா கழகத்தில் நடந்த ஊழல் தொடர்பாக, பீஹார் முன்னாள் முதல்வரும், ராஷ்ட்ரீய ஜனதா தளம் தலைவர், லாலு பிரசாத் யாதவின் மனைவியுமான, ரப்ரி தேவிக்கு, அமலாக்கத் துறை, 'சம்மன்' அனுப்பி உள்ளது. பீஹார் முன்னாள் முதல்வரும், ராஷ்ட்ரீய ஜனதா தளம் தலைவருமான, லாலு பிரசாத் யாதவ், ரயில்வே அமைச்சராக இருந்தபோது, ஐ.ஆர்.சி.டி.சி.,யில் நடந்த ஊழல் தொடர்பாக, அவரிடமும், அவர் மகன் தேஜஸ்வி யாதவிடமும் விசாரணை நடத்த, சி.பி.ஐ., நடவடிக்கை மேற்கொண்டுள்ளது

. இந்த ஊழல் விவகாரம் குறித்து, ரப்ரி தேவியிடம் விசாரணை நடத்த, அமலாக்கத்துறை, நேற்று, 'சம்மன்' அனுப்பி உள்ளது. ஐ.ஆர்.சி.டி.சி., முன்னாள் உயரதிகாரி உட்பட மேலும் இருவருக்கும், சம்மன் அனுப்பப்பட்டுள்ளது; இவர்களிடம், அடுத்த வாரம் விசாரணை நடத்தப்பட உள்ளதாக, அமலாக்க அதிகாரிகள் தெரிவித்தனர்.

ஐ.ஆர்.சி.டி.சி.,யில், ஓட்டல் நடத்துதல், பராமரிப்பு உள்ளிட்ட பணிகளுக்கான ஒப்பந்தங்களை வழங்க, பீஹார் தலைநகர் பாட்னாவில், மூன்று ஏக்கர் நிலம், லஞ்ச மாக வழங்கப்பட்டதாகவும், அந்த இடம், தேஜஸ்வி, ரப்ரி தேவி பெயர்களுக்கு மாற்றப்பட்டுள்ளதாகவும், சி.பி.ஐ., அமலாக்கத்துறை அதிகாரிகள் குற்றஞ்சாட்டுகின்றனர்.